Read Ozolotepec Zapotec Marcos 10 Bible Online

Marcos 10 - Ozolotepec Zapotec bible

Marcos 10

¹Tsa mroo Jesús yez Capernaúm ngwa Jesús yezlyu Judea, tedib lad roo yoo Jordán, tya mre mkaltaa re men lo Jesús, tsa mloo Jesús lo re men, taxal ntsowka Jesús.

²Tsa mzin re fariseo, ne mnaabdiz zha lo Jesús, ne nzhab zha: ―¿Kwaan nzhab lo ley? ¿Chu tak laa thib mbyi tsaal mbyi? Tata nzhab zha, tak nlaaz zha keki zha Jesús, tsa tak ten zha Jesús.

³Tsa nzhab Jesús lo re zha: ―¿Xomod nzhab lo ley chaan Moisés?

⁴Tsa nzhab re zha: ―Moisés nzhab, tak laa mbyi tsaal mbyi, anta ndoblo taa mbyi thib yeets kuu mroo yuulow, ta nzhab lee mbyi mtso rop tsaal.

⁵Tsa nzhab Jesús lo re zha: ―Tata nzhab Moisés lo re teyaa tak kwathoz nad zha.

⁶Per leettsa mdexkwaa Diox yezlyu, thibka mbyi ne thibka ngot mtsaal Diox.

⁷Kona nzhab Diox: “Lee mbyi ndoblo roo zhaa mbyi lo xut mbyi ne lo xnaa mbyi, tsa tseya mbyi kon ngot mbyi,

⁸ne lee rop zha gak taxal thibka zha”. [Gn. 2:24] Kona nagt raa zha chop zha, sinke thibka men nak zha rop zha.

⁹Diox mtsaal rop zha, kona ndoblot laa mbyi tsaal mbyi.

¹⁰Leettsa ndoʼa Jesús kon re zha kuu ngeteed lo Jesús yuu, tsa mnaabdiz re zha lo Jesús leeka kona.

¹¹Tsa nzhab Jesús lo re zha: ―Loka cho mbyi kuu laa tsaal, ne kaa mbyi tedib ngot, ndaa mbyi thib falt ro lo tsaal mbyi kuu ner,

¹²noga ngot kuu laa tsaal, ne kaa ngot tedib mbyi, ndaa ngot thib falt ro lo tsaal ngot kuu ner. Jesús mnaab tsow Diox kuu wen lo re ndyeen bzhizh (Mt. 19:13‑15; Lc. 18:15‑17)

¹³Ne myaadno re men re ndyeen bzhizh lo Jesús, tsa xoob Jesús yaa Jesús yek re ndyeen, per lee re men kuu ndyaadno ndyeen mkox lo re zha kuu ngeteed lo Jesús.

¹⁴Or mwii Jesús kona, mnayii Jesús lo re zha kuu ngeteed lo Jesús, ne nzhab Jesús: ―Laa goo yaad re ndyeen lon, ne towt goo lo ndyeen, tak Diox nabee leettsoo re zha kuu nak taxal re ndyeen.

¹⁵Wlipaa na kuu nin lo goo, loka cho goo taat diiz nabee Diox leettsoo goo, taxal re ndyeen ree, gagt tab goo ta nabee Diox.

¹⁶Ne mdeez Jesús re ndyeen, ne mxoob Jesús yaa Jesús yek re ndyeen, ne mnaab Jesús lo Diox tsa kenap Diox re ndyeen. Jesús ne zha rik (Mt. 19:16‑30; Lc. 18:18‑30)

¹⁷Thib wiz or ndaroo Jesús roo yez, mrozhonn thib zha ne mtobxub zha lo Jesús, ne nzhab zha: ―Maestr wen, ¿kwan tsowʼn tsa tsowʼn gan yalnaban kuu thitanax?

¹⁸Jesús mkab lo zha: ―¿Chebee, zha wen neʼa lon? Neeka thib zha wen yent, beeta Diox nak zha wen.

¹⁹Ne, neʼa lu re kuu mtaan Diox tsowa. Kuu nak re koree:Kuthta tabena,gagt ropa kon thib zha kuu nagt tsaala,lowannta,kedita,bke leettsooʼa xuta ne xnaaʼa.

²⁰Tsa mkab zha ne nzhab zha: ―Desde lutʼn ngetsowʼn reta kona.

²¹Jesús mwii lo zha ne mke leettsoo Jesús zha, tsa nzhab Jesús lo zha: ―Thibka kuu ter tsowa, tyee ne btho reta kuu napa ne btaay lo re prob, tsa kenoʼa kwaro kwaa yibaa, ne bteke ditsʼn.

²²Per leettsa mbin zha tata nzhab Jesús lo zha, kwathoz nabil ngoo leettsoo zha, tak naroob kwaa nap zha, ne ngoo zha net ndya zha.

²³Tsa mwii Jesús lo re zha kuu ngeteed lo Jesús, ne nzhab Jesús: ―Kwathoz nagan laa thib zha rik nabee Diox leettsoo zha.

²⁴Ne kwathoz mzegey leettsoo re zha kuu ngeteed lo Jesús, leettsa mbin zha kona, per lee Jesús mre mni lo re zha, ne nzhab: ―Re goo kuu nak taxal Xgann na, aka kwathoz nagan tab thib zha rik ta nabee Diox.

²⁵Mas nagant rid thib kamey yeer kuu le ngutlo abuj, nake tab thib zha rik ta nabee Diox.

²⁶Reta zha kuu ngeteed lo Jesús kwathoz ntsow zha xgab, ne nzhab zha: ―Os leey tabaay, ¿cho kuu tsow gan ndya yibaa tsa?

²⁷Jesús mwii lo re zha, ne nzhab lo re zha: ―Lo re men yezlyu ree gagte, per lee Diox reta kuu tak tsow Diox.

²⁸Tsa lee Pey nzhab lo Jesús: ―Per lee re nee, reta kuu mlaa nee, ne ndeke nee ditsa.

²⁹Ne lee Jesús nzhab: ―Wlipaa na nin, loka cho zha laa liz, wets, btan, xut, xnaa, zhiinn, o yu zha, tak nyelaaz zha na ne nlaaz zha taa zha kwent Diiz Chul chaan da,

³⁰wlipaa na gayoo welt tebre, liz zha, wets zha, btan zha, xnaa zha, zhiinn zha, ne yu zha lo zha, per noga teteriid re zha zha yalti lo yezlyu ree, per tetsin wiz kuu lee zha kayaa yalnaban kuu thitanax.

³¹Wiza lee zha kuu nataak nal gak zha kuu nataagt raa tsya, ne lee zha kuu nataagt nal zhaʼa gak zha kuu nataak tsya. Myon welt mndaa Jesús kwent naa xomod gath Jesús (Mt. 20:17‑19; Lc. 18:31‑34)

³²Tsa ngoo Jesús net nda Jesús yez Jerusalén, ne mndener Jesús lo re men kuu ndeke dits Jesús, ne kwathoz mzegey leettsoo re zha, ne kwathoz ntsow zha xgab. Tsa mndeno Jesús re zha kuu ngeteed lo Jesús tedib lad, ne nzhab Jesús re kuu rid Jesús lo re zha.

³³Ne nzhab Jesús: ―Bin goo koree. Nda goo reʼaa Jerusalén ta taa zha na Kuu Mtaal Diox Ngok Men, lo re ngwleyy kuu nabee lo re ngwleyy, lo re maestr kuu nloo xkiiz Diox, ne lo re zha kuu nagt zha Israel, tsa kuth re zha na.

³⁴Zhizno zha na, kin zha na, tsuk zha lon ne kuth zha na, per leettsa tsaal tson wiz lee na roban. Santiag ne Juan mnaab thib kuu nagan (Mt. 20:20‑28)

³⁵Santiag ne Juan kuu nak rop xgann Zebedeo, ngwa lo Jesús ne nzhab: ―Maestr, nlaaz nee tsowa thib yalwen kuu naab nee loʼa.

³⁶Tsa mkab Jesús ne nzhab Jesús: ―¿Kwan nlaaz goo?

³⁷Tsa lee rop zha nzhab: ―Taa diiz tob thib nee lad ban ne lee tedib nee tob lad beg loʼa, leettsa nabeeʼa.

³⁸Tsa nzhab Jesús lo rop zha: ―Net goo kwan ngenaab goo. ¿Chu texek goo rid goo yalti kuu mera riidʼn, ne gath goo taxal gathʼn?

³⁹Tsa nzhab rop zha: ―Texek nee. Jesús nzhab lo rop zha: ―Wli teriid goo yalti taxal rid nay ne gath goo taxal gathʼn.

⁴⁰Per tobʼn goo lad ban ne lad beg lon, nagt na cho taa kona. Leey kayaa re zha kuu naka diiz kayaay.

⁴¹Ne or mbin tedib tsii zha kuu ngeteed lo Jesús kona, tsa mnayii zha mne zha Juan rop Santiag.

⁴²Tsa mrez Jesús re zha, ne nzhab Jesús lo re zha: ―Wen ne goo, lee re zha kuu nabee lo yezlyu ree, kwathoz nabee zha lo re zha kuu nzi lo zha, ne tataga re zha kuu nataak kwathoz nabee zha lo re zha zha.

⁴³Per lee lo re goo, gagte tata, zhaa gake, loka cho nlaaz gak zha kuu nataak lo re goo, zhaʼa ndoblo gak zha kuu lortsin lo goo.

⁴⁴Ne loka cho nlaaz nabee lo re goo, zhaʼa gak zha kuu lortsin lo re goo.

⁴⁵Tak na nak Zha Kuu Mzin Ngok Men, ne ndyaltʼn tsa lortsin re men lon, sinke lee na ndyalʼn tsa lortsin na lo re men, ne gathʼn por re men, tsa telaan naroob men lo yalguth, ne tan yalnaban lo re zha. Jesús mtegwe ngutlo Bartimeo (Mt. 20:29‑34; Lc. 18:35‑43)

⁴⁶Tsa ngwa re zha yez Jericó, ne leettsa lee Jesús ndarooʼa roo yeza kon re zha kuu ngeteed lo Jesús, ne kon re men kuu mndeke dits Jesús. Tsa lee thib zha syeg kuu le Bartimeo ndob ngenaab gon roo net, zhaʼa nak xgann Timeo.

⁴⁷Leettsa mbin syeg lee Jesús zha yez Nazaret nda tya, tsa mndelo syeg mrez dib gan ne nzhab: ―Jesús xgann David, blat leettsooʼa neʼa na.

⁴⁸Tsa lee tyen zha mnayii lo syeg, ne nzhab zha lo syeg: ―¡Tow rooʼa! Per lee syeg masraa mrez, ne nzhab: ―Jesús xgann David, blat leettsooʼa neʼa na.

⁴⁹Tsa mlet Jesús ne nzhab Jesús: ―Brez goo zha. Tsa mrez zha syeg ne nzhab zha lo syeg: ―Wen bloo leettsooʼa ne gwateli, tak lee Jesús ngebez lu.

⁵⁰Lee syeg mkee thibka brink ne mlobi xabits thib lad ne mbig lo Jesús.

⁵¹Tsa mnaabdiz Jesús lo syeg, ne nzhab Jesús: ―¿Kwaan nlaaza tsowʼn loʼa? Lee syeg mkab ne nzhab: ―Maestr, nlazʼn yeni lon.

⁵²Lee Jesús nzhab lo zha: ―Tyee, tak kon dib ndroo leettsooʼa ngwalaaza leeʼa gwe, kona mgweʼa. Ne oraaka lee lo zha mzhaal, ne mndeke zha dits Jesús.