Read Ozolotepec Zapotec Marcos 14 Bible Online

Marcos 14 - Ozolotepec Zapotec bible

Marcos 14

¹Nzhak falt techop wiz par gak ani kuu le Paskw, leettsa ntelaaz re zha Israel, naa xomod mloo Diox re tey zha, zha ndala Egipto, lo ani kuu nzhow zha pan kuu nyoot lebadur. Tsa lee re ngwleyy kuu nabee lo re ngwleyy kon re maestr kuu nloo xkiiz Diox, zheta mkwaan zha mod ten zha Jesús, tsa kuth zha Jesús.

²Per nzhab zha: ―Tsowt leey leen ani, tsa net re mene ne yiit re men. Thib ngot mloo perfum kuu chul ndetsi kwerp Jesús (Mt. 26:6‑13; <a href='B:500 12:1'>Jn.12 :1‑<a href='B:500 08:1'>8)

³Leettsa ndo Jesús Betania, liz Simún kuu mzhaak yiz kuu nteyaaz kwerp, ne or ndob Jesús roo mes. Tsa mzin thib ngot kuu myaadno thib bot kuu natexkwaa kon ke kuu le alabastr, kuu tseta nzo perfum kuu chul ndetsi, perfum kuu ngoo zha thib ya kuu le nardo, ne kwathoz naap perfuma, ne mle ngot bot tsa mzhaal bot, ne mloo ngot perfum kwerp Jesús.

⁴Per lee chop tson re zha kuu nzi tya mnayii lo ngot, ne nzhab zha lo altaa zha: ―¿Chebee tabaata mlux perfum ree?

⁵Lee perfum ree masraa nataak nake kuu tsow men gan thib liin, ngok gadoy tsa gataaʼaa temi lo re zha prob. Tsa mndelo re zha mnayii zha lo ngota.

⁶Per lee Jesús nzhab lo re zhaʼa: ―Blaa goo ngot; ¿chebee nayii goo lo ngot? Lee kuu mtsow ngot lon nak thib kuu kwathoz wen.

⁷Lee re prob thibka nzi lo goo, ne tak tsow goo wen lo prob leettsa nlaaz goo, per lee na ndotʼn lo goo thitanax.

⁸Lee ngot ree mtsow loka kuu takta tsow ngot, ner mloo ngot perfum na, leettsa terka gaatsʼn.

⁹Wlipaa na nin, dita lo yezlyu ta taa zha kwent Diiz Chul chaan da, teteth zha kuu mtsow ngot ree, tsa telaaz zha ngot. Judas mndaa Jesús lo re zha tsa kuth zha Jesús (Mt. 26:14‑16; Lc. 22:3‑6)

¹⁰Tsa lee Judas Iscariote kuu nak thib zha lo re tsiibchop zha kuu ngeteed lo Jesús, ngwanii lo re ngwleyy kuu nabee lo re ngwleyy, tsa myaan Judas diiz taa Judas Jesús lo re ngwleyy.

¹¹Or mbin re zha kona, kwathoz wen ne naley ngoo leettsoo re zha. Ne nzhab re zha lo Judas: ―Nal kix nee kaaʼa. Tsa lee Judas mkwaan mod par taa Jesús lo re zha. Rtsee chaan Zha Nabee (Mt. 26:17‑29; Lc. 22:7‑23; <a href='B:500 13:1'>Jn.13 :<a href='B:500 21:1'>21‑30; <a href='B:500 01:1'>1Co<a href='B:500 11:1'>.11 :23‑26)

¹²Ner wiz kuu ndelo ani, leettsa nzhow zha pan kuu nyoot lebadur, ne nzhow zha mbak zhiil yeen, tsa ntelaaz zha naa xomod mloo Diox re tey zha, zha ndala Egipto. Tsa lee re zha kuu ngeteed lo Jesús mnaabdiz lo Jesús ne nzhab: ―¿Pa nlaaza yatexkwaa nee kuu dow rtseeʼaa nal ani Paskw?

¹³Tsa mtaal Jesús chop zha kuu ngeteed lo Jesús, ne nzhab Jesús lo rop zha: ―Gwa goo yez, ne tya tsaal goo thib mbyi kuu ne thib ree nit, bteke goo dits zha,

¹⁴ne loka pa tab zha, gab goo lo zha kuu nak chaan yuu: “Lee maestr ne, nlazʼn wun kon re zha kuu ngeteed lon rtsee chaan Paskw. ¿Pa ndob yuu kuu ta wu rtsee nee?”

¹⁵Tsa loo zha thib yuu naro lo goo, kuu ndob asta yek yuu ta nzo reta kwaa, tya texkwaa goo kuu dow rtseeʼaa.

¹⁶Ne mroo rop zha kuu ngeteed lo Jesús nda zha yez, ne mzal zha zha kuu nzhab Jesús lo rop zha, ne mdexkwaa rop zha rtsee kuu le Paskw.

¹⁷Ne or mkow yezlyu, tsa mzin Jesús kon re tsiibchop zha kuu ngeteed lo Jesús.

¹⁸Leettsa ndob re zha roo mes ngeyow rtsee re zha, tsa nzhab Jesús lo re zha: ―Wlipaa na nin lo re goo, thib goo kuu ngeyow kon na taan lo re men.

¹⁹Tsa nabil ngoo leettsoo re zha, ne mndelo re zha thibga thibga zha mnaabdiz lo Jesús, ne nzhab zha: ―¿Chu nay?

²⁰Tsa lee Jesús mkab ne nzhab: ―Thib zha lo re thib tsiibchop gooy, lee zha ntenit pan leen thibka yann kon na.

²¹Wlipaa lee Zha Kuu Mtaal Diox Ngok Men, ndoblo rid zha taxal nke lo xkiiz Diox. Per thitanax went rid zha kuu tan lo re men, mas wen gagalt mbyiʼa.

²²Ne or kuu ndob re zha ngeyow rtsee zha, tsa lee Jesús mzhen pan ne mndaa Jesús texkix lo Diox, ne mtsow rol Jesús pan ne mndaa Jesús pan lo re zha kuu ngeteed lo Jesús, ne nzhab Jesús: ―Dow goo, koree nak beel da.

²³Noga mzhen Jesús bas ne ngwalo mndaa Jesús texkix lo Diox, ne mndaa Jesús bas lo re zha kuu ngeteed lo Jesús, tsa ngwii re zha kuu nzo leen bas.

²⁴Tsa nzhab Jesús: ―Koree nak ren da, leey texkwaa trat kub chaan Diox, ne leey xon kwent chaan naroob men.

²⁵Wlipaa na nin lo goo, nalsi gut raa na xit ub, asta wiz kuu gun kuu kub ta nabee Diox. Pey nzhab nlebeet Pey Jesús (Mt. 26:30‑35; Lc. 22:31‑34; <a href='B:500 13:1'>Jn.13 :36‑38)

²⁶Bluz or ngwalo mbil re zha, tsa ndya zha net yii ta ndab ya olib.

²⁷Tsa nzhab Jesús lo re zha: ―Reta goo laa goo na nal yaal ree, tak lee lo xkiiz Diox nzhab: “Kuthʼn zha kuu nkenap re mbak zhiil, ne lee re maa raats”. [Zac. 13:7]

²⁸Per bluz leettsa roban na, tsa tenerʼn lo re goo ne ya reʼaa yezlyu Galilea.

²⁹Tsa nzhab Pey lo Jesús: ―¡Per tegal reta zha laaʼa, per lee na latʼn lu!

³⁰Jesús nzhab lo Pey: ―Wlipaa na nin loʼa, leeka nal yaal ree, neeka ter kwez ngite chop welt, lee lu gab tson welt nlebeeta na.

³¹Per lee Pey masraa nex mkab ne nzhab: ―Tegal gathʼn kon lu, per gabtʼn: “Leen nlebeetʼn lu”. Ne reta zha tataga nzhab zha. Jesús mndediz lo Diox leen alo Getsemaní (Mt. 26:36‑46; Lc. 22:39‑46)

³²Tsa mzin re zha leen thib alo kuu le Getsemaní, tsa nzhab Jesús lo re zha kuu ngeteed lo Jesús: ―Tob goo nzhee, lee na nda tediz lo Diox.

³³Ne mndeno Jesús Pey, Santiag ne Juan ne mndelo mndebi ne nalatt ngoo leettsoo Jesús.

³⁴Tsa nzhab Jesús: ―Kwathoz nalatt nzo leettsoon, tak mera gathʼn, nzheeta yaan goo, kenap goo goo ne gatta goo.

³⁵Tsa nda Jesús tut kwat ne mtobxub Jesús asta mdiinn yeklo Jesús lo yu. Ne mnaab Jesús lo Diox, tsa ridt Jesús yalti kuu ndoblo Jesús rid Jesús.

³⁶Ne nzhab Jesús: ―¡Pa! Reta kuu tak tsowa. Btelaan lo yalti kuu riidʼn, per nlaztʼn gake taxal nlazʼn, sinke taxal nlaaza tata gake.

³⁷Leettsa mre Jesús ta nzi re zha, lee re zha naxat, tsa nzhab Jesús lo Pey: ―Simún, ¿chu naxata? ¿Chu mxegta lo mkaal neeka thib or?

³⁸Nzheeta yaan goo ne gatta goo, bnaab goo lo Diox, tsa kedit Maxuuy goo. Wlipaa na nin, nlaaz zha tsow zha kuu nlaaz Diox, per lee kwerp zha xegt tsowe.

³⁹Tsa ngwa Jesús tedib welt ne mndediz Jesús lo Diox, ne nzhab Jesús leeka re diiz kuu nzhab Jesús ner.

⁴⁰Leettsa mretab Jesús lo re zha kuu ngeteed lo Jesús ne lee re zha naxata tedib welt, tak ngwatin zha mkaal. Ne neeka net zha naa kwan kab zha lo Jesús.

⁴¹Ora ngwa Jesús myon welt, ne mre Jesús nzhab lo re zha: ―¡Nalsi, bneyy goo ne bdat goo! Wii goo, mzina or kuu lee na Zha Kuu Mtaal Diox Ngok Men, taa zha na lo re zha kuu ndab falt.

⁴²Gwache goo tsa ndaa goo, tak ndyaada zha kuu taan lo re men. Mzhen re men Jesús (Mt. 26:47‑56; Lc. 22:47‑53; <a href='B:500 18:1'>Jn.18 :2‑<a href='B:500 11:1'>11)

⁴³Ne lee Jesús bee ngenika, lee Judas kuu nak thib zha lo re tsiibchop zha kuu mteed lo Jesús mzin. Ne kwathoz men ndeke dits Judas kon espad ne kon ya, lee re zhaʼa ndyaad kwent chaan re ngwleyy kuu nabee lo re ngwleyy, kwent chaan re maestr kuu nloo xkiiz Diox ne kwent chaan re zha gol.

⁴⁴Ne mndaaʼa Judas thib seny lo re zhaʼa: Or nzhab Judas: ―Loka cho zha kuu wun thib chut kwat, zhaʼa ten goo ne teno goo.

⁴⁵Ne or mzin Judas, ne mbig Judas lo Jesús ne nzhab Judas: ―¡Maestr! ¡Maestr! Ne mdow Judas chut kwat Jesús.

⁴⁶Tsa mzhen re zha Jesús ne ndano zha Jesús.

⁴⁷Per lee thib zha kuu ndo lo Jesús mloo espad ne mga nza mos ngwleyy kuu nabee lo reta ngwleyy.

⁴⁸Tsa nzhab Jesús lo re men: ―¿Chebee ndyaad goo kon espad ne kon ya, ten goo na taxal thib wann?

⁴⁹Reta wiz mndon lo goo, ne mloon lo re men lee roo gwodoo, ne neeka thib welt mzhent goo na. Per koree ngeyak, tsa gak kuu nzhab lo xkeets Diox.

⁵⁰Tsa lee re zha kuu mteed lo Jesús mlaa zha Jesús ne mzhonn zha.

⁵¹Per lee thib nde kuu ndeke dits Jesús, nok thib le lar, tsa mzhen re men ndeʼa.

⁵²Per lee ndeʼa mlaa nde xab nde ne cheey nde mzhonn nde. Mndeno zha Jesús lo ngwleyy kuu nabee lo reta ngwleyy (Mt. 26:57‑68; Lc. 22:54‑55, 63‑71; <a href='B:500 18:1'>Jn.18 :<a href='B:500 12:1'>12‑<a href='B:500 14:1'>14, <a href='B:500 19:1'>19‑24)

⁵³Tsa mndeno zha Jesús lo ngwleyy kuu nabee lo reta ngwleyy, ne mkaltaa re ngwleyy kuu nabee lo re ngwleyy, re zha gol ne re maestr kuu nloo xkiiz Diox.

⁵⁴Per lee Pey tith tith mndeke dits re zha, asta mzin Pey lee liz ngwleyy kuu nabee lo reta ngwleyy, ne myaan Pey mbiz Pey kon re polisi kuu ngebiz lo ki.

⁵⁵Ne lee re ngwleyy kuu nabee lo re ngwleyy ne re zha kuu nataak yuulow, mkwaan zha mod, naa xomod keki zha Jesús, tsa kuth zha Jesús, per mzalt mod lo re zha.

⁵⁶Kwathoz zha nkedi, per zhaa kuu mbez thib zha ne zhaa kuu mbez tedib zha.

⁵⁷Tsa lee chop tson zha ngwateli ne mkedi zha ne mkeki zha Jesús nzhab zha:

⁵⁸―Nee mbin leeʼa nzhab: “Na luux gwodoo ree kuu mdexkwaa kon yaa men, ne tsonka wiz tan tedibe, kuu texkwaat kon yaa men”.

⁵⁹Per tegal tata mbez re zha, per nzaalt kuu mbez re zha.

⁶⁰Tsa lee ngwleyy kuu nabee lo reta ngwleyy mndeli xid re zha, ne mnaabdiz lo Jesús, ne nzhab: ―¿Chebee neeka thib kuu nkabta? ¿Kwan re kuu nkeki zha lu?

⁶¹Per lee Jesús mkabt neeka thib kwaa, tsa lee ngwleyy kuu nabee lo reta ngwleyy mre mnaabdiz lo Jesús, ne nzhab: ―¿Chu lu nak Crist kuu Mtaal Diox nabee? ¿Chu lu nak Xgann Diox?

⁶²Lee Jesús mkab ne nzhab: ―Nay. Ne wii goo lee na Zha Kuu Mtaal Diox Ngok Men, tob lad ban lo Diox kuu nzhak ntsow reta kwaa. Ne wii goo lee na yal tedib welt xidth xkow lobee.

⁶³Tsa lee ngwleyy kuu nabee lo reta ngwleyy mchat xab ne nzhab: ―¡Ndechet raa lee tedib testig!

⁶⁴¡Mbina goo ne zha, yewal zha kon Diox! ¿Xa ntsow goo xgab koree? Reta men nzhab: ―¡Ndoblo gath zha!

⁶⁵Tsa lee chop tson zha mndelo mtsuk lo Jesús, ne mtow zha lo Jesús, ne mdin re zha Jesús ne nzhab zha lo Jesús: ―¡Ne, naa cho mkeey yeka! Ne lee re polisi mgaat yaa lo Jesús. Pey nzhab nlebeet Pey Jesús (Mt. 26:69‑75; Lc. 22:55‑62; <a href='B:500 18:1'>Jn.18 :<a href='B:500 15:1'>15‑<a href='B:500 18:1'>18, 25‑29)

⁶⁶Ne lee Pey ndob lee liz ngwleyy. Ora mzin thib ngot kuu nke tsiin lo ngwleyy kuu nabee lo reta ngwleyy.

⁶⁷Ne or mwii ngot lee Pey ngebiz lo ki, yichey mwii ngot lo Pey ne nzhab ngot: ―Noʼa ndiy kon Jesús, zha yez Nazaret.

⁶⁸Per lee Pey nzhab: ―Nlebeetʼn Jesús, neeka netʼn naa kwan ngeniʼa lon. Ne or mroo Pey lee lee ngite mrez thib roo.

⁶⁹Ne tedib welt mwii ngot lo Pey, ne nzhab ngot lo re zha kuu nzi tya: ―Zha ree nak thib zha kuu ndiy kon re zha baa.

⁷⁰Per lee Pey mkab tedib welt ne nzhab: ―Nlebeetʼn mbyi baa. Ne bluz lee re zha kuu nzi tya nzhab lo Pey: ―Wlipaa noʼa nak thib re zha kuu nzo xid re zha baa, tak lu nak zha yezlyu Galilea.

⁷¹Tsa mndelo Pey mde Pey, ne mteth Pey Diox, ne nzhab Pey: ―¡Wlipaa naa nlebeetʼn mbyi kuu nteth goo lon!

⁷²Ne oraaka lee ngite mrez tedib welt, tsa lee Pey mtelaaz kuu nzhab Jesús lo Pey ner: “Terka kwez ngite chop welt ne lee lu gab tson welt nlebeeta na”. Ne or mtelaaz Pey kona, oraaka mndelo Pey mbinn Pey.