Read Ozolotepec Zapotec Marcos 15 Bible Online

Marcos 15 - Ozolotepec Zapotec bible

Marcos 15

¹Kwathoz til mkaltaa re ngwleyy kuu nabee lo re ngwleyy, re zha gol, re maestr kuu nloo xkiiz Diox, ne reta zha kuu nabee lo re zha Israel. Ne ngwalo myaan re zha diiz, tsa mliib zha Jesús ne mndaa zha Jesús lo Pilat.

²Lee Pilat mnaabdiz lo Jesús ne nzhab: ―¿Chu lu nak rey chaan re zha Israel? Lee Jesús mkab nzhab: ―Lu ney.

³Ne lee re ngwleyy kuu nabee lo re ngwleyy mkeki zha Jesús.

⁴Tsa lee Pilat mnaabdiz tedib welt lo Jesús ne nzhab Pilat: ―¿Chebee neeka thib kuu nkabta? ¡Wii naa plal kuu nkeki zha lu!

⁵Per lee Jesús mkabt neeka thib lan diiz. Tsa lee Pilat kwathoz mzegey leettsoo ne net Pilat naa kwan tsow Pilat xgab. Pilat mnabee mbeth zha Jesús (Mt. 27:15‑31; Lc. 23:13‑25; <a href='B:500 18:1'>Jn.18 :38–<a href='B:500 19:16'>19:16)

⁶Ne reta liin lo aniʼa lee Pilat ntelaa thib zha kuu nzo tsib, loka cho zha kuu naab re men yez.

⁷Ne lee thib mbyi kuu le Barrabás, nzo tsib thibka kon thiban zha kuu mbeth men, leettsa mbyo re zha kon re zha gobyern Roma.

⁸Tsa mzin re men, ne mndelo zha mnaab zha lo Pilat, tsa telaa Pilat thib zha taxalka ntsow Pilat reta liin.

⁹Ne lee Pilat mkab ne nzhab: ―¿Chu nlaaz goo telaan Jesús, kuu nak rey chaan re zha Israel?

¹⁰Tata nzhab Pilat, tak neʼa Pilat lee re ngwleyy kuu nabee lo re ngwleyy, nyowt leettsoo zha ndeke tyen men dits Jesús, kona mndaa re zha Jesús lo Pilat.

¹¹Per lee re ngwleyy kuu nabee lo re ngwleyy mtekiil re men, tsa gab re men lo Pilat telaa Pilat Barrabás.

¹²Tsa lee Pilat mnaabdiz tedib welt: ―¿Kwaan nlaaz goo tsowʼn, kon zha kuu mbez goo nak rey chaan re zha Israel?

¹³Ne lee re men mrez dib gan ne nzhab: ―¡Bkee zha lo kruz!

¹⁴Per lee Pilat nzhab: ―¿Kwaan kuu went mtsow zha ree? Per lee re men mre mrez dib gan ne nzhab: ―¡Bkee zha lo kruz!

¹⁵Per lee Pilat nlaaz yaan wen kon re men, kona mtelaa Pilat Barrabás, ne bluz mnabee Pilat mdin re zha Jesús, tsaraa mndaa Pilat Jesús, tsa kee re soldad Jesús lo kruz.

¹⁶Tsa lee re soldad mndeno Jesús par lee liz Pilat, ne mrez zha reta soldad.

¹⁷Ne mtegok zha Jesús thib lar kuu nanexa na, ne mtob zha thib koron kuu natexkwaa kon yits yek Jesús.

¹⁸Ne oraaka mndelo re zha mrez zha dib gan zha, ne nzhab zha: ―¡Kwathoz kuubil rey chaan re zha Israel!

¹⁹Mkee re zhay yek Jesús kon thib le ya, mtsuk zha lo Jesús ne mtobxub re zha lo Jesús taxal lo rey.

²⁰Ne or kuu ngwalo mzhizno zha Jesús, tsa mloo zha lar kuu nanexa na yen Jesús, ne mtegok zha Jesús xabka Jesús, ne mloo re zha Jesús tsa kee zha Jesús lo kruz. Mkee zha Jesús lo kruz (Mt. 27:32‑44; Lc. 23:26‑43; <a href='B:500 19:1'>Jn.19 :<a href='B:500 17:1'>17‑27)

²¹Ne lee thib mbyi zha yez Cirene kuu le Simún, kuu nak xut Alejandr ne xut Rufo ndyaad ngwa wan. Ne or nderid zha tya, tsa mnabee re soldad lo zha gwe zha kruz Jesús.

²²Ne mndeno re zha Jesús thib ta le Gólgota. (Diiz ree nak: “Tsidth yek men”.)

²³Ne mndaa zha xit ub kon thib remed kuu nala kuu le mirra gagu Jesús, per lee Jesús ngwiite.

²⁴Tsa mkee re soldad Jesús lo kruz. Ne mndelo re zha mloo zha swert, tsa naa cho zha tsow gan xab Jesús, ne kwan kuu diinn kadta thib zha.

²⁵Ne til teeka las nueve mkee zha Jesús lo kruz.

²⁶Ne lee letr kuu mkee zha yek kruz nzhab, naa chebee mbeth zha Jesús, ne lee letr nzhab “REY CHAAN RE ZHA ISRAEL”.

²⁷Ne thibka mkee zha Jesús lo kruz kon chop wann, thib zha mkee zha lad ban lee tedib zha mkee zha lad beg lo Jesús.

²⁸Tata ngok tsa mrolo xkiiz Diox kuu nzhab: “Thibka ngok kwent zha kon re wann”.

²⁹Ne lee re zha kuu ndriid tya ntsalzhoo zha Jesús kon ndota diiz, ne nkwin zha yek zha lo Jesús, ne mbez zha: ―¡Lu kuu nlaaz luux gwodoo, ne tsonka wiz taa luy tedib welt,

³⁰os leeʼa kwathoz kuubiʼa laata gatha, leeka lu blaʼa lo kruz!

³¹Ne noga re ngwleyy kuu nabee lo re ngwleyy ne re maestr chaan ley, mzhizno zha Jesús ne nzhab zha lo altaa zha: ―Mlaat zha gagath tedib net zha, per lee zha gagt la zha leeka lee zha lo kruz.

³²Noga nzhab re ngwleyy: ―Lu ne: Lu nak Crist Kuu Mtaal Diox nabee lo re zha Israel. Bla lo kruz nal, tsa ne nee lee lu nap yalnabee, ne tsa yelaaz nee lu. Ne asta rop wann kuu nke lo kruz ntsalzhoo Jesús kon ndota diiz. Yalguth chaan Jesús (Mt. 27:45‑56; Lc. 23:44‑49; <a href='B:500 19:1'>Jn.19 :28‑30)

³³Ne teeka ndrol wiz dita yezlyu mla yaal, ne lee kona mxek tson or.

³⁴Ora lee Jesús mrez dib gan ne nzhab: ―Eloi, Eloi, ¿lama sabactani? (Diiz ree nak: “Diox da, Diox da, ¿chebee mlaaʼa na?”)

³⁵Ne lee chop tson zha kuu nzi tya mbin kuu nzhab Jesús, tsa nzhab zha: ―Bin goo, lee zha ngebez profet Lí zha ndala.

³⁶Oraaka le thib zha mrezhonn mzhen thib le lar, ne mtenit zhay kon xit ub kuu ni, ne mtob zhay yek thib nith ne mndaa zhay ngwii Jesús. Tsa nzhab tedib zha: ―Laa, naa chu tyaad Lí la zha lo kruz.

³⁷Per lee Jesús mrez dib gan ne nguth.

³⁸Tsa lee lar kuu now Ta Kwathoz Nayon leen gwodoo mrat asta yek ne asta xann.

³⁹Ne lee soldad kuu nabee lo thib gayoo soldad ndo lo Jesús, ne mbin zha dib gan Jesús mrez Jesús ne mwii zha naa xa nguth Jesús. Tsa nzhab zha: ―Wlipaa lee mbyi ree nak Xgann Diox.

⁴⁰Noga chop tson ngot nzi tith ngewii, xid re ngota ndo Mari Magdalen ne Mari xnaa Santiag kuu mas yeen lo Che ne lo Salomé.

⁴¹Re ngota mndeke dits Jesús, ne mtsow zha ayud Jesús leettsa mndiy Jesús yezlyu Galilea. Ne tyen ngot kuu ngwa kon Jesús yezlyu Jerusalén nzi tya. Mkaats zha Jesús (Mt. 27:57‑61; Lc. 23:50‑56; <a href='B:500 19:1'>Jn.19 :38‑42)

⁴²Lee wiza nak wiz byern kuu ndexkwaa re zha kuu nzhow zha wiz sabd kuu ndroxkwan zha. Ne mziʼa yezlyu wiza,

⁴³tsa lee Che kuu nak zha yez Arimatea, kuu nak thib zha kuu kwathoz nataak lo re zha Israel, ne lee zha ngebet wiz kuu nabee Diox. Tsa thib mloo zha yek zha ne ngwa zha lo Pilat. Ne mnaab zha kwerp Jesús.

⁴⁴Tsa lee Pilat kwathoz mzegey leettsoo, tak lijer nguth Jesús ne mrez Pilat soldad kuu nabee lo thib gayoo soldad, tsa mnaabdiz Pilat ne nzhab Pilat: ―¿Chu ngutha Jesús?

⁴⁵Lee soldad kuu nabee lo thib gayoo soldad nzhab: ―Ngutha zha. Tsa mndaa Pilat diiz mbe Che kwerp Jesús.

⁴⁶Tsa mzhii Che thib lar wen, ne mchal Che lar kwerp Jesús, ne mloo Che kwerp Jesús leen thib baa kuu natexkwaa cho ke, ne mtow Che thib ke naro roo baa.

⁴⁷Ne lee Mari Magdalen ne Mari xnaa Che mwii zha ta mloo zha Jesús.