Read Ozolotepec Zapotec Marcos 3 Bible Online

Marcos 3 - Ozolotepec Zapotec bible

Marcos 3

¹Tedib welt mndaab Jesús ta nkaltaa re zha nteed zha xkiiz Diox, ne tya ndo thib mbyi kuu mbiz thib yaa.

²Noga nzi thiban zha kuu ngewii, naa chu tetegwe Jesús mbyiʼa wiz kuu nzhool re zha Israel lo Diox, tsa tak keki zha Jesús.

³Tsa lee Jesús nzhab lo mbyi kuu mbiz yaaʼa: ―Gwateli, ne bto ndrol.

⁴Tsa mnaabdiz Jesús lo re zha, ne nzhab Jesús: ―¿Kwan mas wen tsowaa wiz kuu nzhoolaa lo Diox? ¿Chu ndoblo tsowaa kuu wen o kuu went? ¿Chu wen tegwe men thib zha, o chu wen kuth men thib zha? Per lee re zha neeka thib kuu mkabt zha.

⁵Tsa nayii mwii Jesús lo re zha kuu nzi lo Jesús: Ne nabil ngoo leettsoo Jesús, tak kwathoz nad leettsoo re zhaʼa, tsa nzhab Jesús lo mbyiʼa: ―Bteli yaaʼa. Tsa mteli zha yaa zha, ne oraaka mgwe yaa zha taxal tedib yaa zha.

⁶Tsa mkaltaa re fariseo kon re zha rey Herodes, tsa myaan zha diiz, naa xomod tsow zha par kuth zha Jesús. Kwaro men mkaltaa roo nitdoo

⁷Leettsa mroo Jesús tya ne nda Jesús roo nitdoo kon re zha kuu ngeteed lo Jesús, kwaro re zha yezlyu Galilea kon re zha yezlyu Judéa, mndeke dits Jesús.

⁸Ne noga re zha Jerusalén yez naro, kon zha yezlyu Idumea ngwa lo Jesús; noga ngwa re zha kuu nzo tedib lad roo yoo Jordán, re zha yez Tiro ne zha yez Sidón. Ngwa zha tak mbin zha re kuu thoz kuu ntsow Jesús.

⁹Tsa nzhab Jesús lo re zha kuu ngeteed lo Jesús: ―Btolist goo thib kano par keen, tak naroob men ndeke ditsʼn ne kwaro nzhoo re men na.

¹⁰Tak kwaro men mtegwe Jesús, ne lee re mbyiz nzhoo Jesús, tak nlaaz zha diinn zha cho Jesús.

¹¹Ne or ngwii re mbi fyer kuu nzo leettsoo re zha lo Jesús, tsa ntsow mbi fyer ntobxub re zha lo Jesús, ne mbetsyath zha mbez zha: ―Lu nak Xgann Diox.

¹²Kwathoz mkox re mbi fyer lo Jesús, ne nzhab Jesús: ―Yent cho lo gab goo naa cho nakʼn. Jesús mli tsiibchop zha (Mt. 10:1‑4; Lc. 6:12‑16)

¹³Tsa mkendab Jesús yek thib yii, ne mrez Jesús re zha kuu nlaaz Jesús, ne ngwa re zha lo Jesús.

¹⁴Tsa mli Jesús tsiibchop zha par kwin kon Jesús, ne par taal Jesús zha yataa zha kwent xkiiz Diox.

¹⁵Ne mndaa Jesús yalnabee lo re zha, tsa koo zha re mbi fyer kuu nzo leettsoo re men.

¹⁶Tsiibchop re zha ree nak re zha kuu mli Jesús:Simún (kuu mtob le Jesús Pey),

¹⁷Santiag ne Juan (rop zha ree nak xgann Zebedeo, kuu mtob le Jesús Boanerges, diiz ree nak: “Zhiinn bel bti”);

¹⁸Ndres,Lip,Bartolomé,Mateo,Mach,Santiag (zhiinn Alfeo),Tadeo,Simún (kuu ngoo xid partid Cananita),

¹⁹ne Judas Iscariote (kuu mndaa Jesús lo yalguth). Zha kuu ngode lo Mbi Nayon chaan Diox (Mt. 12:22‑32; Lc. 11:14‑23; 12:10)

²⁰Ne mndaab Jesús kon re zha kuu ngeteed lo Jesús leen thib yuu, ne tedib welt kwathoz men mkaltaa lo Jesús, ne neeka myobt gawu re zha.

²¹Ne mbin re zha liz Jesús kona, tsa ngwa zha gaxii zha Jesús, tak nzhab zha: ―Mbix yek Jesús.

²²Ne lee re maestr chaan ley kuu mroo Jerusalén nzhab: ―Wlipaa yalnabee chaan Beelzebú nap Jesús, ne kon yalnabee chaan Beelzebú ngoo Jesús re mbi fyer.

²³Tsa mrez Jesús re zha ne mni Jesús lo re zha kon diiz nanzee, ne nzhab Jesús: ―¿Xomod koo Maxuuy leeka lee Maxuuy Maxuuy?

²⁴Os lee thib yez nzhak chop tant ne ngyo leeka re zha, xegt yeza naroob.

²⁵Ne noga os leen thib yuu nzhak chop zha, ne ngyo leeka re zha, reta zha kuu nzo leen yuuʼa xegt zha naroob tyemp.

²⁶Kona os lee Maxuuy yo kon leeka lee Maxuuy, xegt yalnabee chaan Maxuuy naroob tyemp, gaxta ndo luzhe.

²⁷’Ne leeka tata gagt tab thib zha leen liz thib zha ney, os ter liib zha zha, tsa tak lowann zha re chaan zha.

²⁸’Wlipaa na nin, tekib Diox relota falt kuu ntsow men, asta kuu ngode men Diox.

²⁹Per lee re zha kuu ngode lo Mbi Nayon chaan Diox, thitanax tuyyt Diox falta neeka mas.

³⁰Tata nzhab Jesús lo re zha, tak lee re zha nzhab mbi fyer nzo leettsoo Jesús. Xnaa Jesús ne re wets Jesús (Mt. 12:46‑50; Lc. 8:19‑21)

³¹Tya mzin xnaa Jesús kon re wets Jesús, ne mlet re zha roo yuu, tsa mtaal zha thib zha ngwachez Jesús.

³²Ne lee re zha kuu nzi re ladta lo Jesús nzhab lo Jesús: ―Lee xnaaʼa ne re wetsa nzi lee ndiy nkwaana.

³³Lee Jesús mkab ne nzhab: ―¿Cho nak xnaan ne re wetsʼn?

³⁴Tsa mwii Jesús lo re zha kuu nzi re ladta lo Jesús, ne nzhab Jesús: ―Re zha ree ndakʼn taxal xnaan ne re wetsʼn.

³⁵Tak reta zha kuu ntsow kuu nlaaz Diox, zhaʼa nak wetsʼn, btan na ne xnaan.