Read Ozolotepec Zapotec Marcos 5 Bible Online

Marcos 5 - Ozolotepec Zapotec bible

Marcos 5

¹Ne leettsa mzin re zha tedib lad roo nitdoo yezlyu chaan re zha Gadara.

²Leettsa mla Jesús leen kano, tsa mbig thib zha kuu nzo mbi fyer leettsoo lo Jesús, zhaʼa ndende leen re kelyoo, ta nkaats zha re zha nguth.

³Ne leen re kelyoo ta nkaats zha re zha nguth, tya mtsow zhaʼa taxal liz zha. Ne yent cho ntsow gan liib zha neeka kon kaden.

⁴Tyen welt mliib zha zhaʼa kon kaden, per lee zhaʼa mchuug kaden ne yent cho nye lo zha.

⁵Tse ne yaal ndende zha leen re kelyoo ne leen yii, mbetsyath zha, ne leeka lee zha ngin zha zha cho re ke.

⁶Tith raa ngwani Jesús lo zha, oraaka mrezhonn zha mbig zha ne mtobxub zha lo Jesús.

⁷Tsa nzhab Jesús: ―Mbi fyer broo leettsoo zha ree. Tsa dib gan zha mretsyath zha ne nzhab zha: ―Jesús. ¡Xgann Diox kuu ndob yibaa! ¡Kwan nlaaza kon nee! Naabʼn loʼa tetita nee, leettsa ter tsin wiz kuu tetiʼa nee.

⁹Tsa mnaabdiz Jesús lo zha, ne nzhab Jesús: ―¿Cho bleʼa? ―Nee le kwathoz, tak kwathoz tyen nee ―nzhab zha.

¹⁰Lee re mbi fyer kwathoz mnaab lo Jesús, tsa koot Jesús re mbi fyera yezlyuʼa.

¹¹Ne gax chu yii tya nzi naroob nguch ngeyow.

¹²Tsa lee re mbi fyera kwaro mnaab lo Jesús, ne nzhab: ―Taal nee lo re nguch baa, ne taa diiz tab nee leettsoo re maa baa.

¹³Tsa mndaa Jesús diiz mndaab re mbi fyera leettsoo re ngucha. Ne nzhak teeka chop mil nguch, tsa mrezhonn re maa ne mrethin maa roo kedoo, ne mla maa leen nitdoo ne ngwaap maa nit.

¹⁴Ne lee re zha kuu nkenap re ngucha, mzhonn ngwalo diiz lo re zha yez kuu ngok, ne noga nzhab zhay lo re zha kuu nzi wan. Tsa ngwatwii re zha yez naa kwan ngok.

¹⁵Leettsa mzin re zha ta ndo Jesús, tsa mwii zha mbyi kuu ngoo mbi fyer leettsoo, ndoba nok xab ne mgweʼa mbyi, ora mzeb re zha.

¹⁶Ne lee re zha kuu mwii kuu ngok kon mbyi kuu ngoo mbyi fyer leettsooʼa, ne kuu ngok kon re nguch, nzhab zhay lo re altaa zha.

¹⁷Tsa mnaab re zha yeza lo Jesús ne nzhab zha: ―Broo nzhee.

¹⁸Ne leettsa mretab Jesús leen kano tedib welt, lee zha kuu ngoo mbi fyer leettsooʼa, mnaab lo Jesús ne nzhab: ―Laaʼa teken ditsa.

¹⁹Per lee Jesús mzhyalt, ne nzhab: ―Tyee liza lo re zha liza, ne guz re kuu mtsow Zha Nabee loʼa, ne xa mlat leettsoo zha mne zha lu.

²⁰Tsa ndya zha ne nzhab zha re kuu mtsow Jesús lo zha, lo re zha re tsii yez kuu nak Decápolis, ne reta zha re yeza mzegey leettsoo. Jesús mtegwe thib ngot ne mteroban rtsaap Jairo (Mt. 9:18‑26; Lc. 8:40‑56)

²¹Leettsa ngwalo mriid Jesús tedib lad roo nitdoo, myaanka Jesús leen kano, ne naroob men mkaltaa lo Jesús roo nitdoo.

²²Tsa mzin Jairo thib zha kuu nataak ta nkaltaa re zha kuu nteed xkiiz Diox, ne or mwii zha Jesús, mtobxub zha xann nii Jesús,

²³ne kwaro mnaab zha lo Jesús, ne nzhab zha: ―Lee rtsaapʼn mer gath. De toba yaaʼa dits nzaa, tsa gwe nzaa ne ban nzaa.

²⁴Tsa ngwa Jesús kon lee zha, ne naroob men mndeke dits Jesús, ne kwathoz nzhoo re men Jesús.

²⁵Ne xid re mena ndyaad thib ngot mbyiz, kuu ndaʼa tsiibchop liin nlath ren leettsoo,

²⁶ne kwathoz ndakti zha, reta temi zha kuu nap zha mluuzha zha lo re doctor, ne ngwet zha, leel masraa mndezhoo yiz kuu ndak zha.

²⁷Ne leettsa mbin zha re kuu ngetsow Jesús, tsa mndaab zha xid re men kuu nzi lo Jesús, ne mzin zha par dits Jesús ne mdiinn zha xab Jesús.

²⁸Tak mtsow zha xgab: “Os leen diinn na xab Jesús, tegwen”.

²⁹Ne or mdiinn zha xab Jesús, oraaka mlet kuu nlath ren leettsoo zha, ne myeen zha lee zha mgweʼa lo yiz kuu ndak zha.

³⁰Oraaka myeen Jesús lee Jesús mtegwe thib zha kon yalney chaan Jesús, tsa mtsere lo Jesús, ne mnaabdiz Jesús lo re zha kuu ndeke dits Jesús, ne nzhab Jesús: ―¿Cho mdiinn xabʼn?

³¹Lee re zha kuu ngeteed lo Jesús nzhab: ―¿Chu ngwiita re ladta nzhoo zha lu? Ne naabdiza: “¿Cho mdiinn xabʼn?”

³²Per lee Jesús mwii re ladta, naa cho kuu mdiinn xab Jesús.

³³Tsa lee ngota kwathoz mzeb, tak tata nzhab Jesús, oraaka mbig ngot ne mtobxub ngot lo Jesús, ne nzhab ngot kuu wli.

³⁴Tsa nzhab Jesús lo ngot: ―Rtsaapʼn, tak ngwalaaza na kona mgweʼa. Wen tyee yat leettsooʼa, tak mgweʼa lu lo yiz kuu mzhaaka.

³⁵Bee ngenika Jesús, lee chop tson zha liz Jairo mzin, nzhab lo Jairo: ―Ngutha rtsaapa. ¿Chebee ngenika lu lo maestr?

³⁶Per lee Jesús mbin kona, tsa nzhab Jesús lo Jairo: ―Tsebta. Anta gwalaaz xkizʼn kon dib ndroo leettsooʼa.

³⁷Ne mndaat Jesús diiz gateke choraa dits Jesús, beeta Pey, Santiag ne Juan wets Santiag.

³⁸Or mzin re zha liz Jairo, tsa mwii Jesús lee re zha kuu nzi tya nzhonn ne mbetsyath.

³⁹Tsa mndaab Jesús leen yuu, ne nzhab Jesús: ―¿Chebee kwathoz nkee goo bi ne nzhonn goo? Ngutht nzaa, beeta naxat nzaa.

⁴⁰Tsa mzhizno re zha kuu nzi tya Jesús, per lee Jesús mnabee mroo reta zha leen yuu, ne mndeno Jesús xnaa nzaa, xut nzaa ne re yon zha kuu ngeteed lo Jesús, tsa mndaab re zha leen yuu ta nax nzaa.

⁴¹Tsa mzhen Jesús yaa nzaa ne nzhab Jesús lo nzaa: ―Talita kumi. (Diiz ree nak: “Nzaa, loʼa nin, ¡gwache!”)

⁴²Oraaka ngwache nzaa ne mnde nzaa, ne lee nzaa nap tsiibchop liin. Ne reta zha kuu mwii kona kwathoz mzegey leettsoo zha.

⁴³Per lee Jesús mnabee lo re zha, ne nzhab: ―Yent cho lo gab goo kuu ngok. Noga nzhab Jesús lo zha: ―Taa goo kuu wu nzaa.