Read Ozolotepec Zapotec Marcos 6 Bible Online

Marcos 6 - Ozolotepec Zapotec bible

Marcos 6

¹Mroo Jesús tya ne ndya Jesús laz Jesús, kuu nak Nazaret, kon re zha kuu ngeteed lo Jesús.

²Leettsa ngok wiz sabd, wiz kuu nzhool re nee kuu nak zha Israel lo Diox, tsa mloo Jesús lo re men, ta nkaltaa zha nteed zha xkiiz Diox. Ne kwathoz mzegey leettsoo re zha mbin zha kuu nzhab Jesús, tsa nzhab zha lo altaa zha: ―¿Pa ngwateed zha ree re kuu nzhaak zha? ¿Ne cho mndaa yalnzhaak lo zha? ¡Kona nzhaak ntsow zha re kuu thoz kuu gagt tsow re men yezlyu ree!

³¡Zha ree nak karpinter zhiinn Mari! ¡Ne re wets zha nak: Santiag, Che, Judas ne Simún ne re btan zha nzi loʼaa nzhee! Kona nataagt Jesús lo re zha, ne nzhont zha diiz lo Jesús.

⁴Tsa nzhab Jesús lo re zha: ―Lee re profet kuu ntaal Diox nataak zha reta ta, per lee laz zha ne lo re zha liz zha nataagt zha.

⁵Kona ngogt gatsow Jesús kwaro kwaa laz Jesús, beeta chop tsonta zha mxoob Jesús yaa Jesús yeke ne mtegwe Jesús zha.

⁶Kwathoz mzegey leettsoo Jesús, mne Jesús lee re tawlaz Jesús nyelaazt Jesús. Tsa mroo Jesús tya ne ngwa Jesús re yez kuu nzi gaxta tya, ne mloo Jesús lo re men. Jesús mtaal re zha kuu ngeteed lo Jesús yataa zha kwent xkiiz Diox (Mt. 10:5‑15; Lc. 9:1‑6)

⁷Tsa mrez Jesús re tsiibchop zha kuu ngeteed lo Jesús, ne mtaal Jesús chopga chopga zha, ne mndaa Jesús yalnabee lo re zha, tsa koo zha mbi fyer leettsoo re men.

⁸Noga nzhab Jesús lo re zha: ―Be goo thibka aga ne yent raa kwan gwe goo, neeka bols, neeka kuu wu goo ne neeka temi.

⁹Anta labyid kuu nke nii goo be goo, ne ndoblot gwe goo chop net xab goo.

¹⁰Ne noga nzhab Jesús lo re zha: ―Loka yuu ta tsin goo, tya kwet goo, asta leettsa bi goo tya.

¹¹Ne os thib ta kayaat zha goo, ne neeka tyalt zha gon zha xkiiz goo, broo goo tya ne btsib goo yuyaaz kuu mke nii goo, tsa ne re zha yeza lee re zhaʼa went nak, tak mkayaat zha goo.

¹²Ne mroo re zha ngwataa zha kwent xkiiz Diox ne mbez zha, btsee goo mod went kuu nak goo ne btob yek goo xkiiz Diox.

¹³Noga mloo zha kwaro mbi fyer leettsoo re men, ne mndaab zha aseyt re mbyiz ne mtegwe zha re mbyiz. Xomod nguth Juan kuu mtsowleyy re men (Mt. 14:1‑12; Lc. 9:7‑9)

¹⁴Ne lee rey Herodes mbin re kuu ntsow Jesús, tak reta ta nyath re kuu ntsow Jesús. Tsa nzhab rey Herodes: ―Juan kuu mtsowleyy mroban, tata mod nzhaak ntsow zha re kuu gagt tsow re men yezlyu ree.

¹⁵Lee tedib net zha mbez: ―Lee zha nak Lí kuu ngok profet ndala. Ne tedib net zha nzhab: ―Lee zha nak thib re profet kuu ngoo ndala.

¹⁶Or mbin rey Herodes re kona, tsa nzhab rey Herodes: ―¡Lee zha nak Juan kuu mtaalʼn mchuug zha yek, ne nal mroban zha!

¹⁷Tak kwent chaan Herodías, mnabee rey Herodes mzhen zha Juan, mliib zha Juan kon kaden ne mloo zha Juan tsib. Herodías nak tsaal Lip wets rey Herodes. Per lee rey Herodes nak rop Herodías.

¹⁸Ne lee Juan nzhab lo rey Herodes: ―Went kenoʼa tsaal wetsa.

¹⁹Kona mnayii Herodías mne Juan, ne nlaaz Herodías kuth Juan, per gagt tsow zhay.

²⁰Tak nzeb rey Herodes ne Juan, noga ne rey Herodes lee Juan nak thib mbyi wen ne nayon lo Diox, kona nkenap rey Herodes Juan. Ne or kuu nkenza rey Herodes xkiiz Juan net rey Herodes naa kwan tsow rey Herodes, ne kwathoz nyow leettsoo rey Herodes nzhon xkiiz Juan.

²¹Per mtsow rey Herodes thib ani naro, leettsa mzaal rey Herodes liin, ne mrez rey Herodes re zha kuu nabee lo yezlyu, re zha kuu nabee lo thib mil soldad ne re zha kuu mas nataak kuu nabee yezlyu Galilea. Tsa lee Herodías mwii tak tsow Herodías thib kwaa.

²²Tsa lee rtsaap Herodías mndaab ta nzo ani ne mkani, ne kwathoz myow leettsoo rey Herodes ne re zha kuu nzi tya xa mkani nzaa, tsa nzhab rey Herodes lo nzaa: ―Bnaab loka kuu nlaaza lon, ne lee na tay.

²³Ne mtselo rey kruz ne nzhab rey: ―Loka kuu naaba na taay, ne asta garol yezlyu ta nabeen tatan loʼa nzhab rey.

²⁴Ora mroo nzaa ne mnaabdiz nzaa lo xnaa nzaa, ne nzhab nzaa: ―¿Kwaan naabʼn? Lee xnaa nzaa nzhab: ―Bnaab yek Juan kuu ntsowleyya.

²⁵Oraaka nda nzaa ta ndob rey, ne nzhab nzaa lo rey: ―¡Nalorka nlazʼn taaʼa yek Juan kuu ntsowleyya lon leen thib yann!

²⁶Or mbin rey kona, kwathoz nabil ngoo leettsoo rey, tak mtselo rey kruz nzhab rey lee rey tsowe, ne reta zha kuu nzi lo ani mbin kuu nzhab rey, kona ngogt raa gatsee rey xkiiz rey.

²⁷Oraaka mtaal rey Herodes thib soldad, tsa yaxii soldad yek Juan.

²⁸Tsa lee soldad ngwa leen tsib mga yek Juan, ne mloo zhay leen thib yann, ne ndyaadno zhay ne mndaa zhay lo nzaa, ne lee nzaa mndaay lo xnaa nzaa.

²⁹Or mbin re zha kuu ngeteed lo Juan lee Juan nguth, tsa ngwanaab zha kwerp Juan mkaats zha. Jesús mndaa kuu ndow gaay mil men (Mt. 14:13‑21; Lc. 9:10‑17; <a href='B:500 06:1'>Jn.6 :1‑<a href='B:500 14:1'>14)

³⁰Tsaraa lee re zha kuu ngeteed lo Jesús kuu noga le apóstl, mkaltaa kon Jesús, ne mndaa re zha kwent re kuu mtsow zha ne re kuu mloo zha lo re men.

³¹Tsa nzhab Jesús lo re zha: ―De goo, nda goo anta leeʼaa thib ta yent men, tsa roxkwanaa lut. Tak kwaro men nda ndyaad ne neeka yobt wu re zha.

³²Tsa ngoo Jesús beeta kon re zha kuu ngeteed lo Jesús leen kano, ne ndya re zha thib ta yent men.

³³Ne naroob men mwii lee re zha nda, ne mlebee re men Jesús; tsa reta men re yez nda par tya, ne ner re mena mzin nake Jesús kon re zha kuu ngeteed lo Jesús.

³⁴Leettsa mla Jesús leen kano, mwii Jesús naroob men, tsa mlat leettsoo Jesús mne Jesús re zhaʼa, tak taxal mbak zhiil kuu napt bzhaan nzhak zha, ne mndelo Jesús mloo kwaro kuu lo re zha.

³⁵Ne leettsa ndaʼa or, lee re zha kuu ngeteed lo Jesús mbig lo Jesús, ne nzhab zha: ―Mziʼa yezlyu ne nzhee nak thib ta yubiz.

³⁶Bchaats re men, tsa ya re zha re ranch kuu nzi gax nzhee, tsa tii zha kuu wu zha.

³⁷Per lee Jesús mkab lo re zha, ne nzhab: ―Taa goo kuu wu zha. Tsa nzhab re zha: ―¿Chu nlaaza yati nee chop gayoo denario pan, tsa taa nee kuu wu re zha?

³⁸Lee Jesús nzhab lo re zha: ―¿Plal pan nap goo? ¡Gwa goo gwatwii goo! Ora ngwatwii re zha, tsa nzhab zha: ―Gaay pan ne chop mbel.

³⁹Tsa mnabee Jesús lo re zha tob zha por grupga lo yizhwan.

⁴⁰Ne mndob zha por grupga, nzo ta mrin thib gayooga zha, ne nzo ta mrin garol gayoo zha.

⁴¹Tsa mzhen Jesús re pan ne rop mbel ne mwii Jesús lobee ne mndaa Jesús texkix lo Diox, ne mtsow rol Jesús pan ne mndaa Jesús pan lo re zha kuu ngeteed lo Jesús, tsa taa zhay lo re men, tataka mtsow rol Jesús rop mbel, ne mndaa re zhay lo re men.

⁴²Reta men ndow asta plotha mze leettsoo re men.

⁴³Ne mrozhoob tsiibchop chekwit pan byu ne mbel.

⁴⁴Ne lee re men kuu ndow pan tya ngok teeka gaay mil mbyi. Jesús mnde lo nitdoo (Mt. 14:22‑27; <a href='B:500 06:1'>Jn.6 :<a href='B:500 16:1'>16‑<a href='B:500 21:1'>21)

⁴⁵Leettsa ngwalo ngok kona, ora mtaal Jesús re zha kuu ngeteed lo Jesús, tsa mke re zha leen kano, par rid zha tedib lad roo nitdoo, par tsin zha yez kuu le Betsaida. Lee Jesús myaanka chaats re men.

⁴⁶Or ngwalo mchaats Jesús re men, ora ngwa Jesús yek yii ngwatediz Jesús lo Diox.

⁴⁷Ne leettsa mkow yezlyu lee kano ndaʼa ndrol nit ne lee Jesús myaan thita yubiz,

⁴⁸ne mwii Jesús lee re zha kuu ngeteed lo Jesús, kwathoz ndakti kon kano lo nitdoo, tak kwathoz nax mbi. Ne zhaaraa na lee Jesús nde ndyaad lo nitdoo, mtsow Jesús taxal zha kuu nlaaz ner lo re zha.

⁴⁹Or mwii re zha lee Jesús ndyaad lo nitdoo, mtsow re zha xgab, kuu fyera ne mretsyath re zha;

⁵⁰tak reta zha mwiiy ne mzeb zha. Per ora lee Jesús mni lo re zha ne nzhab: ―¡Bloney goo leettsoo, tsebt goo nay!

⁵¹Tsa mke Jesús leen kano ta nzo re zha, ne lee mbi mlet; kwathoz mzegey leettsoo re zha mwii zha kuu mtsow Jesús.

⁵²Tak myent re zha naa kwan mtsow Jesús kon re pan, tak ter tsow Diox yen zhay, tak mkow yek zha. Jesús mtegwe re mbyiz yezlyu Genesaret (Mt. 14:34‑36)

⁵³Tsa mriid Jesús kon re zha kuu ngeteed lo Jesús tedib lad roo nitdoo, tsa mzin re zha yezlyu Genesaret, tya mkedo zha kano roo nitdoo.

⁵⁴Per or mla re zha leen kano, lee reta men mlebee Jesús.

⁵⁵Tsa lee re men lijer ngwalo diize re yez gax, ne mbe re men re mbyiz ne nxoob zha re mbyiz lo da ne nyadtaan zha mbyiz ta ndo Jesús.

⁵⁶Ne reta ta ndaab Jesús re ranch re yez bzhizh ne re yez naro, nyadtaan zha re mbyiz roo yuulow ne roo net ne naab zha lo Jesús, laa Jesús diinn zha xab Jesús; ne lee re zha kuu ndiinn xab Jesús ngwe zha.