Read Ozolotepec Zapotec Marcos 7 Bible Online

Marcos 7 - Ozolotepec Zapotec bible

Marcos 7

¹Thib wiz mkaltaa thiban fariseo lo Jesús, kon thiban maestr kuu nloo ley, re zhaʼa ndyaad desde yez Jerusalén.

²Or mwii re zhaʼa lee chop tson zha kuu ngeteed lo Jesús, nat zha nzhow zha, tsa mkeki re fariseo re zha Jesús. Tak ntsowt zha kuu mtsow re tey zha.

³Tak lee re fariseo ne reta zha Israel ntsow zha re kuu mloo tey zha lo zha, os lee zha nat zha, wut zha.

⁴Or ndretab zha nya zha lo xbi, wut zha os ter tsow zha kuu mloo tey zha lo zha, kuu nak na zha, ne kwaro re kuu tata ntsow zha, taxal nteech zha re tas, re yann ne re yet wen wen.

⁵Tsa lee re fariseo ne re maestr chaan ley mnaabdiz lo Jesús, ne nzhab zha: ―¿Chebee lee re zha kuu ngeteed loʼa ntsowt zha re kuu mloo teyaa, nat zha nzhow zha?

⁶Jesús mkab lo zha, ne nzhab: ―¡Zha nkedi nak goo, zhaa kuu mbez ne zhaa kuu ntsow goo! Wen wen mndaa profet Isaí kwent naa xomod nak goo. Or kuu nzhab zha:Lee re zha yez ree beeta kon roo zha nzhool zha lon,ne lee leettsoo zha tith ndo lon.

⁷Nataagt nzhool goo lon,tak kuu nloo goo nak leyy chaan re men. [Is. 29:13]

⁸Thib lad nlaa goo xkiiz Diox, leettsa ntsow goo re kuu mloo re tey goo.

⁹Noga nzhab Jesús lo re zha: ―Thib lad nlaa goo kuu nabee Diox tsow goo, leettsa ntsow goo re kuu mloo tey goo lo goo.

¹⁰Tak lee Moisés nzhab: “Bke leettsooʼa xuta ne xnaaʼa”. [Ex. 20:12] Noga nzhab lo ley: “Lee zha kuu ngode xute ne xnaa, beth goo zha”. [Ex. 21:17]

¹¹Per lee goo mbez goo: Tak gab zha lo xut zha ne lo xnaa zha: “Gagt raa tsowʼn ayuda, tak reta kuu nkenon nak korban”. (Diiz ree nak: “Retay mndan lo Diox”.)

¹²Ne noga mbez goo, zha kuu tata gab, ndoblot raa tsow zha ayud xut zha ne xnaa zha.

¹³Tata mod ntsow nataagt goo xkiiz Diox, kon re kuu mloo tey goo lo goo, ne kwaro re kuu tata ntsow goo.

¹⁴Tsa mrez Jesús re men, ne nzhab Jesús lo re zha: ―Bin goo xkizʼn ne byen gooy.

¹⁵Neeka thib kuu ndaab par roo zha, gagt tsow nambite zha lo Diox, sinke re kuu went kuu ntsin leettsoo zha, kona ntsow nzhak nambit zha lo Diox.

¹⁶¡Os lee goo ndob nza goo ndoblo goo yen goo koree!

¹⁷Leettsa mlaa Jesús re men tsa mndaab Jesús leen thib yuu, ne lee re zha kuu ngeteed lo Jesús mnaabdiz lo Jesús, ne nzhab: ―Xomod nak kwent kuu mndaaʼa.

¹⁸Tsa nzhab Jesús: ―¿Chu no goo nyente? ¿Chu nyent goo neeka thib kuu ndaab par roo zha, gagt tsow nambite zha?

¹⁹Tak ndaabte leettsoo zha, leey ndaab leeyy zha, ne tsaraa ndrooy. Kon diiz ree nlaaz Jesús ne, reta kuu tak wu men tak nambiy.

²⁰Ne noga nzhab Jesús: ―Re kuu went kuu ntsin leettsoo zha, kona ntsow nzhak nambit zha lo Diox.

²¹Tak leen leettsoo zha ndroo re xgab went kuu nak:Gak rop zha kon ndota zha,lowann zha,kuth zha taben zha,

²²gak rop zha kon zha kuu nagt tsaal zha,ndablaaz zha keno zha reta kwaa,ntsow zha reta kuu went,nkedi zha,ntsow zha re kuu nlortsint,nawent nzhak leettsoo zha ne zha chaan tedib zha,ndediz zha diiz yix,ndrub zha,ngobeet zha.

²³Reta kuu went ree ntsin leettsoo zha, ne ntsowe nzhak nambit zha lo Diox. Thib ngot tith ngwalaaz Jesús (Mt. 15:21‑28)

²⁴Leettsa mroo Jesús yezlyu Galilea, tsa nda Jesús yezlyu Tiro ne Sidón, ne mndaab Jesús leen thib yuu, tak nlaazt Jesús yeen choraa zha pa ndo Jesús. Per ngogt gakaslo Jesús,

²⁵tak kwathoz lijer myeen thib ngot kuu nap thib nzaa, kuu nzo mbi fyer leettsoo pa ndo Jesús, ngota ndyaad lo Jesús ne mtobxub ngot lo Jesús.

²⁶Lee ngota nak thib zha tith zha yez Sirofenicia, ne mnaab ngota lo Jesús, tsa koo Jesús mbi fyer kuu nzo leettsoo rtsaap ngot.

²⁷Per lee Jesús nzhab lo ngot: ―Laa wu re ndyeen bzhizh ner, tak went kib zha pan lo re ndyeen ne taa zhay lo re mbak.

²⁸Lee ngot mkab ne nzhab: ―Wliy, Zha Nabee, per noga mbak nzhow mbak re kuu kuu ndrethin ya ndyeen nzhab xann mes.

²⁹Lee Jesús nzhab lo ngot: ―Wen mkaba, tyee lee mbi fyer mrooʼa leettsoo rtsaapa.

³⁰Or mzin ngot liz ngot, lee rtsaap ngot ndoba roo luun, ne lee mbi fyer mrooʼa leettsoo rtsaap ngot. Jesús mtegwe thib zha kuu nakwee ne mud

³¹Tsa mroo Jesús yez Tiro ne mriid Jesús yez Sidón ne re tsii yez kuu nak Decápolis, tsa mzin Jesús roo nitdoo chaan Galilea.

³²Ne tya ngwano re men thib zha kuu nakwee ne mud lo Jesús, ne mnaab zha, tsa xoob Jesús yaa Jesús dits zhaʼa.

³³Tsa ndeno Jesús zha thib lad lo re men, ne mtob Jesús kwen Jesús leen nza zha, ne kon nzuk mdiinn Jesús lo loz zha.

³⁴Ora mwii Jesús lobee ne mndii leettsoo Jesús, ne nzhab Jesús lo mbyiʼa: ―¡Efata! (Diiz ree nak: “¡Bxaal!”)

³⁵Oraaka lee nza zha mzhaal, ne lee loz zha mgwe ne wen mndediz zha.

³⁶Tsa mteni Jesús re zha, tsa yent cho lo gab zha kuu mtsow Jesús; per leel masraa mndediz zhay.

³⁷Kwaro mzegey leettsoo re men, ne nzhab re men: ―¡Xomod ntsow zha ree re kuu tenzhee! ¡Ntsow zha nzhaal nza zha kuu nakwee, ne ntsow zha ndediz zha mud!