Read Ozolotepec Zapotec Marcos 9 Bible Online

Marcos 9 - Ozolotepec Zapotec bible

Marcos 9

¹Noga nzhab Jesús: ―Wlipaa na nin lo goo, nzo goo kuu nzi nzhee, gatht goo asta wii goo naa xa nabee Diox, kon yalnabee chaan Diox. Mzee mod na Jesús (Mt. 17:1‑13; Lc. 9:28‑36)

²Leettsa mzaal xoop wiz lee Jesús ndano anta Pey, Santiag ne Juan zhaata, ne ngwa re zha thib yii naro, tya mzee mod na Jesús lo re yon zha.

³Kwathoz mla xni xab Jesús, naguz mlooy, tegal mas teech zha lar, ne tsowt zha gan looy tata.

⁴Ne mloo lo re zha lee Lí ne Moisés ngetediz lo Jesús.

⁵Tsa nzhab Pey lo Jesús: ―Maestr, kwathoz wen nzi nee nzhee; nal taa nee tson ramad, thibe par lu, tedibe par Moisés ne lee tedibe par Lí.

⁶Tata nzhab Pey tak kwathoz mzeb re zha, ne neeka net Pey naa kwan nzhab Pey.

⁷Ne oraaka lee thib xkow mla ne mtow re yon zha, ne xid xkowa mroo thib bos kuu nzhab: ―Zha ree nak xgann na kuu kwathoz nke leettsoon, bin goo diiz lo zha.

⁸Ne or mwii re zha re ladta lo re zha, yent raa cho mwii zha, anta Jesús ndo.

⁹Or kuu ndyaadla re zha mroo zha yek yii, tsa nzhab Jesús lo re zha: ―Yent cho lo gab goo re kuu mloo lo goo, asta tsin wiz kuu lee na, Kuu Mzin Ngok Men roban.

¹⁰Ne mbin re zha diiz, ne yent cho lo nzhab zhay, per kwaro welt naabdiz zha lo altaa zha, naa xomod nak kuu roban men nguth.

¹¹Tsa mnaabdiz re yon zha lo Jesús ne nzhab zha: ―¿Chebee ni re maestr kuu nloo xkiiz Diox, ner profet Lí zha ndala yaad?

¹²Lee Jesús nzhab: ―Wli lee Lí ner yaad, tsa to list zha re kwaa. Ne ¿chebee nzhab xkiiz Diox: “Lee na Kuu Mtaal Diox Ngok Men, ndoblo ridʼn yalti ne tsow nataagt re men na”?

¹³Per lee na ni lo goo, lee Lí myaada ne mtsow re men loka kuu nlaaz re men lo Lí, taxal nkey lo xkiiz Diox. Jesús mtegwe thib zha mndyeen kuu nzo mbi fyer leettsoo (Mt. 17:14‑21; Lc. 9:37‑43)

¹⁴Leettsa mretab Jesús kon Pey, Santiag ne Juan, tsa mzin Jesús ta nzi reta zha kuu ngeteed lo Jesús, tsa mwii Jesús kwaro men nzi lo re zha, ne lee re maestr chaan ley ngeyodiz kon re zha kuu ngeteed lo Jesús.

¹⁵Ne or mwii re zha Jesús, reta zha mzegey leettsoo ne mrezhonn zha mni zha “diox” lo Jesús.

¹⁶Tsa mnaabdiz Jesús lo re zha, ne nzhab Jesús: ―¿Kwan ngeyodiz goo kon tedib net zha baa?

¹⁷Tsa lee thib zha kuu ndo xid re mena mkab ne nzhab: ―Maestr, lee na ndyaadno xgann na loʼa, tak nzo thib mbi fyer leettsoo nyo, ne mtaan mude nyo.

¹⁸Ndota ta ndo nyo lee mbi fyer nden nyo ne ngobiy nyo lo yu; ne ntsowe ndroo btsiin roo nyo ne ntube keley nyo ne nteliy nyo. Kona kwathoz mlache nyo. Ne mnaaba na lo re zha kuu ngeteed loʼa, tsa koo zha mbi fyer baa leettsoo nyo, per ngogt gatsow zhay.

¹⁹Jesús mkab ne nzhab: ―¡Cho klas men nak goo! ¿Chebee nyelaazt goo lee Diox tak tsow koree? ¿Asta pol ton lo goo? ¿Asta pol kez leettsoon nen goo? Deno goo nyo nzhee.

²⁰Tsa ngwano zha nyo lo Jesús, per or mwii mbi fyer Jesús, ora mlobi mbi fyer nyo lo yu ne mtsow mbi fyer mzhaak nyo yizguthye.

²¹Jesús mnaabdiz lo xut nyo ne nzhab: ―¿Pol mndelo yiz ree lo nyo? Lee xut nyo mkab ne nzhab: ―Asta lut nyo mziibe.

²²Ne kwaro welt ngobi mbi nyo lo ki ne lo nit, tak nlaaz mbi kuth mbi nyo, os leeʼa tak kooʼa mbi fyer baa leettsoo nyo, blat leettsooʼa neʼa nee, btsow ayud nee.

²³Lee Jesús nzhab: ―¿Chebee mbeza chu take? ¡Reta kuu tak, os leeʼa nyelaaz luy!

²⁴Tsa lee xut nyo mrez dib gan ne nzhab: ―Nyelaz nay, btsow ayudʼn tsa masraa yelaz nay.

²⁵Ne or mwii Jesús kwaro men ndetsin, tsa mkox mbi fyer lo Jesús ne nzhab Jesús: ―Mbi fyer kuu ntsow nakwee nyo ne kuu tsow mud nyo. Na nabee loʼa, broo leettsoo nyo ne bret raa lu taba leettsoo nyo tedib welt.

²⁶Tsa lee mbi fyer mretsyath ne mtsow mzhaak nyo yizguthye tedib welt, ne mroo mbiʼa leettsoo nyo ne mtaane nyo taxal zha nguth. Ne lee re zha kuu nzi tya nzhab: ―Nguth nyo.

²⁷Per lee Jesús mzhen yaa nyo ne mlit Jesús nyo, tsa ngwateli nyo.

²⁸Tsaraa mndaab Jesús kon re zha kuu ngeteed lo Jesús leen thib yuu, tsa mnaabdiz re zha lo Jesús, ne nzhab zha: ―¿Chebee ngogt gagoo nee mbi fyera?

²⁹Lee Jesús nzhab: ―Reta mbi kuu tabaa gagt rooy tabaata, ner ndoblo naab mene lo Diox. Jesús mndaa kwent tedib welt naa xomod gath Jesús (Mt. 17:22‑23; Lc. 9:43‑45)

³⁰Tsa mroo re zha tya ne mriid zha yezlyu Galilea. Per lee Jesús nlaazt ne re men naa pa ndo Jesús.

³¹Ne mloo Jesús lo re zha kuu ngeteed lo Jesús, ne nzhab Jesús: ―Na nak Zha Kuu mtaal Diox Ngok Men, ne taa zha na lo re zha kuu nak tsiin ne kuth zha na, per leettsa tsaal tson wiz lee na roban.

³²Per lee re zha myent zha kuu nzhab Jesús, ne nzeb zha naabdiz zha lo Jesús. Cho nak zha kuu mas nataak (Mt. 18:1‑5; Lc. 9:46‑48)

³³Ne mzin re zha thib yez kuu le Capernaúm, or mzin re zha thib yuu. Tsa lee Jesús mnaabdiz lo re zha, ne nzhab: ―¿Kwaan mbyodiz goo net?

³⁴Per neeka thib zha mkabt, tak leettsa ndo re zha net nzhab re zha: “¿Choʼaa nak zha kuu mas nataak?”

³⁵Tsa mndob Jesús ne mrez Jesús re tsiibchop zha kuu ngeteed lo Jesús, ne nzhab Jesús lo re zha: ―Os lee thib goo nlaaz gak zha kuu mas nataak, ndoblo gak goo zha kuu lortsin lo re men.

³⁶Ne mto Jesús thib ndyeen lut ndrol, ne mdeez Jesús ndyeen, ne nzhab Jesús:

³⁷―Loka cho nkayaa thib ndyeen lut tak nyelaaz zha na, noga nkayaa zha na, ne noga nkayaa zha, zha kuu mtaal na. Lee re zha kuu nayiit neʼaa nzo zha faboraa (Lc. 9:49‑50; <a href='B:470 10:1'>Mt.10 :42)

³⁸Tsa nzhab Juan lo Jesús: ―Maestr, ne nee lee thib zha ngoo mbi fyer kon leʼa, per nagt zha, zhaʼaa, kona nzhab nee lo zha: “Tsowt raa luy”.

³⁹Tsa nzhab Jesús: ―Blaa goo yent kwan gab goo lo zha. Tak thib zha kuu ntsow thib kuu thoz kon len, ndoblot looz zha na, or ngwalo mtsow zhay.

⁴⁰Tak reta zha kuu nayiit neʼaa nzo zhaʼa faboraa.

⁴¹Wlipaa na nin, loka cho taa thib bas nit gu goo, tak nak goo zha da, wlipaa na lee Diox kizhe lo zha. Koree nak falt (Mt. 18:6‑9; Lc. 17:1‑2)

⁴²’Loka cho tsow lee thib re zha kuu nyelaaz na ne nzhon diiz xkizʼn tsow kuu went, mas wen liib zha thib ke naro yen zhaʼa ne kobi zha zhaʼa leen nitdoo.

⁴³Os lee thib yaaʼa ntsow ntsowa thib kuu went, ta bchuuge mas wen tunka ne tsowa gan yalnaban kuu thitanax, nake nkenoʼa rop yaaʼa ne ndyaʼa gabil ta thitanax nyuyyt bel,

⁴⁴ta neeka mbyaat nluxt, ne neeka nyuyyt bel.

⁴⁵Ne os lee thib niiʼa ntsow ntsowa kuu went taa bchuuge, mas wen tunka ne tsowa gan yalnaban kuu thitanax, nake nkenoʼa rop niiʼa ne ndyaʼa gabil.

⁴⁶Ta neeka mbyaat nluxt ne neeka nyuyyt bel.

⁴⁷Os lee thib ngutloʼa, ntsow ntsowa kuu went, taa blooy mas wen nkenoʼa thibka ngutloʼa ne tsowa gan yalnaban kuu thitanax, nake nkenoʼa rop ngutloʼa ne ndyaʼa gabil,

⁴⁸ta neeka mbyaat nluxt ne neeka nyuyyt bel.

⁴⁹’Reta men gak natsig kon ki.

⁵⁰Wen ted leettsa natsig ted, per os lee ted natsigt raa ted, gagt raa gak natsig ted tedib welt, ndoblo gak natsig goo taxal ted lo re men yezlyu ree, ne wen brin goo re altaa goo.