Read Ozolotepec Zapotec Lucas 1 Bible Online

Lucas 1 - Ozolotepec Zapotec bible

Lucas 1

¹Kwaro zha ngwalaaz gakee reta kuu ngok lo re nee, taxal ngoke,

²re zha kuu mwii re kuu ngok kon prop lo zha, ne mwii zha xomod mndelo re koree ndala, re zhaʼa mkayaa tsiin par taa zha kwent xkiiz Diox, ne mne zhay lo re nee.

³Kona mnaabdiza na wen wen naa xomod nak kwent ree, ne ndakʼn wen keen thibgay lo yeets taxal ngoke, tsa neʼa xomod mndelo re kuu wli kuu mloo zha loʼa amig Tyof. Thib mandad chaan Diox nzhab lee Juan gal

⁴(null)

⁵Leettsa lee Herodes nak rey yezlyu Judea, tsya ngoo thib ngwleyy kuu le Zacarí, thib zha kuu nak zha partid chaan ngwleyy Abías. Ne lee tsaal Zacarí le Elisabet kuu nak zha raz Aarón.

⁶Rop tsaalta zha nali ndo nyelaaz Diox, nzhon zha diiz reta kuu nabee ley chaan Zha Nabee, tata mod neeka thib kuu gagt keki re men rop zha.

⁷Per napt rop tsaal zha mbet, tak mndaat Diox mbet lo Elisabet, ne zha gola rop zha.

⁸Thib wiz, leettsa mdiinn re zha partid Zacarí tsow zha tsiin lo Diox leen gwodoo chaan Diox,

⁹ne lee kostumr re zha nak koo zha swert, ne Zacarí mdiinn tab leen gwodoo chaan Zha Nabee, par teyy zha straak lo Diox.

¹⁰Ne or lee straak ngeyeek, lee re men nzi lee ngenaab lo Diox.

¹¹Tsa lee thib mandad chaan Diox ngwani lo Zacarí, ndeli lad ban lo bkoog ta nteyy zha straak.

¹²Ne or mwii Zacarí lo mandad, kwathoz mzegey leettsoo Zacarí ne mzeb Zacarí.

¹³Per lee mandad nzhab lo Zacarí: ―Zacarí, tsebta, tak mbina Diox kuu mnaaba lo Diox, lee tsaala Elisabet gap thib mbet, ne Juan tob leʼa mbet.

¹⁴Ne kwathoz naley yo leettsooʼa, ne noga kwathoz men naley yo leettsoo tak lee mbet gal,

¹⁵tak lee xganna gak thib zha nataak lo Zha Nabee. Ne gut zha xit ub ne neeka thib re nit kuu nzo xtuz, ne leettsa bee ter gal mbet lee Mbi Nayon chaan Diox nabeeʼa leettsoo mbet.

¹⁶Ne lee xganna tsow, tsa kwaro re zha Israel bre lo Diox kuu nak Zha Nabee.

¹⁷Ne Juan tener lo Zha Nabee, ne keno Juan leeka Mbi Nayon ne yalney chaan Lí, zha kuu ngok profet ndala. Tsa lee re zha wen kwin zha kon re zhiinn zha, ne lee re zha kuu nzhont diiz, teed gon diiz. Tenzhee mod tolist Juan leettsoo re men, tsa kayaa re men Zha Nabee.

¹⁸Tsa mnaabdiz Zacarí lo mandad ne nzhab Zacarí: ―¿Xomod nen wli kuu neʼa lon? Tak zha gola rop tsaal nee.

¹⁹Tsa lee mandad mkab, ne nzhab lo Zacarí: ―Na nak mandad Gabriel, na ntsow tsiin lo Diox. Ne lee Diox mtaalʼn par tedizʼn loʼa, tsa nin re kuu wen ree loʼa.

²⁰Per nal, tak ngwalaazta kuu nin, kona yaana mud, ne gagt tediza asta wiz kuu gak re koree.

²¹Ne lee re men ngebet Zacarí lee roo gwodoo, ne naabdiz zha lo re altaa zha, naa chebee ntsan Zacarí leen gwodoo.

²²Ne leettsa mroo Zacarí gagt raa tediz Zacarí, tsa myeen re zha lee Zacarí mwii thib kwaa leen gwodoo, ne kon seny mni Zacarí lo re zha, tak myaan Zacarí mud.

²³Ne leettsa ngozhoob wiz kuu mtsow Zacarí kuu ndoblo tsow Zacarí leen gwodoo, tsa ndya Zacarí liz Zacarí.

²⁴Bluz leettsa ngwalo mriid re koree, lee tsaal Zacarí Elisabet ngoo zhiinn, ne thitanax mroot ngot liz ngot dita thib gaay mbee, tak mtsow ngot xgab:

²⁵“Mtsow Zha Nabee ayudʼn, mlat leettsoo zha mne zha na, ne mkib zha yalnathoy da lo re men”. Lee mandad Gabriel ngwanii lo Mari

²⁶Xoop mbee bluz lee Diox mtaal mandad Gabriel yez Nazaret kuu nzi yezlyu Galilea,

²⁷ne ngwa mandad lo thib nzaa yeen kuu le Mari, kuu ter gak rop kon neeka thib mbyi, ne nzaa ree naka diiz tseya kon thib mbyi kuu le Che, kuu nak thib zha raz chaan rey David.

²⁸Tsa mndaab mandad ta nzo Mari ne nzhab mandad: ―¡Tsan Mari, naley bloo leettsooʼa, tak kwathoz wen nzo leettsoo Diox ne Diox lu! Ne lee Zha Nabee ndo kon lu.

²⁹Per or mbin Mari kuu nzhab mandad chaan Diox lo Mari, neeka net Mari naa kwan tsow Mari, tsa mtsow Mari xgab na chebee tata nzhab mandad lo Mari.

³⁰Tsa lee mandad nzhab: ―Mari, tsebta, tak wen nzo leettsoo Diox ne Diox lu.

³¹Nal lee lu yo zhiinn ne gapa thib mbet ne tob leʼa mbet Jesús.

³²Lee mbet gak thib zha kuu kwathoz nataak lo Diox, ne Xgann Diox kuu ndob yibaa tob le re men mbet, ne lee Diox kuu nak Zha Nabee, tsow tsa nabee zha taxal mnabee David tey zha, zha ndala,

³³tsa thitanax nabee zha lo re zha Israel. Ne lee yalnabee chaan zha luxt thitanax.

³⁴Tsa lee Mari mnaabdiz lo mandad, ne nzhab: ―¿Xomod tak gak koree? Tak lee na ter gakʼn kon neeka thib mbyi.

³⁵Lee mandad mkab, ne nzhab: ―Lee Mbi Nayon ne lee yalney chaan Diox kuu ndob yibaa la ditsa taxal thib xkow. Kona lee zhiinna kuu gal role Xgann Diox.

³⁶Noga Elisabet zha liza gap thib mbet, tegal zha gola Elisabet, ne tegal mndaat Diox mbet lo Elisabet. Per ndaʼa xoop mbee nzo zhiinn Elisabet.

³⁷Tak lee Diox nzhaak ntsow reta kwaa.

³⁸Tsa lee Mari nzhab: ―Na nak mos chaan Zha Nabee, ndoblo tsow Diox lon taxal neʼa lon. Oraaka lee mandad ndya. Mari ngwatwii lo Elisabet

³⁹Ne leeka thib re wiza, kwathoz nyob leettsoo Mari ngwa Mari thib yez kuu nzi leen yii yezlyu Judea,

⁴⁰ne or mzin Mari liz Zacarí, mni Mari “diox” lo Elisabet.

⁴¹Ne leettsa mbin Elisabet mni Mari “diox” lo Elisabet, lee mbet Elisabet kwathoz naley ngoo leettsoo, ne mwin mbet leettsoo Elisabet, ne oraaka lee Mbi Nayon mnabee leettsoo Elisabet.

⁴²Tsa lee Elisabet nex nzhab: ―¡Kwathoz wen nzo leettsoo Diox ne Diox lu nake tedib net re ngot, ne kwathoz wen nzo leettsoo Diox ne Diox xganna!

⁴³¿Cho nakʼn par ndyaada ndyaadtwiiʼa lon xnaa Zha Nabee lon?

⁴⁴Tak leettsa mbin na mniʼa “diox” lon, kwathoz naley ngoo leettsoo mbet da ne mwiin mbet leettsoon.

⁴⁵¡Kwathoz wen ndaʼa, tak ngwalaaza lee Zha Nabee tsow re kuu ne zha tsow zha loʼa!

⁴⁶Tsa lee Mari nzhab:Lee yalnaban da nzhool lo Zha Nabee,tak lee zha nzhaak ntsow reta kwaa,

⁴⁷ne lee xbi da kwathoz naley nzo leettsoo ne Diox, kuu koon lo yalguth ne lo re falt da.

⁴⁸Ne tegal nataagt, per lee Diox mlin,ne desde nal lee re men telo ni lon zha nataak,

⁴⁹tak lee Diox nap yalney, kona mtsow Diox re kuu thoz lon.¡Ne Nayon nak le Diox!

⁵⁰Thibka nlat leettsoo Diox ne Diox re zha kuu nzhon diiz lo Diox.

⁵¹Ne mtsow Diox re kuu thoz, kon yalney chaan Diox.Ne mluux Diox re xgab re zha kuu naro nak.

⁵²Mkib Diox yalnataak lo re zha kuu nabee,ne mtsow nataak Diox re zha kuu nataagt, kuu nadoo nak.

⁵³Kwaro kwaa mndaa Diox lo re zha kuu nlann,per lee lo re zha rik yent kwan mndaa Diox lo re zha.

⁵⁴Mtsow Diox ayud re nee, zha Israel,ne mlat leettsoo Diox mne Diox nee,mnithlaazt Diox re nee zha kuu nak mos Diox,

⁵⁵taxal nzhab Diox lo teyaa Abraham zha ndala,lo Abraham ne lo re zha raz Abraham.

⁵⁶Tsa mlet Mari teeka tson mbee liz Elisabet, tsaraa ndya Mari liz Mari tedib welt. Leettsa ngol Juan

⁵⁷Ne leettsa mzin wiz gal zhiinn Elisabet, ngop Elisabet thib mbet bi.

⁵⁸Tsa mbin re zha liz Elisabet ne re zha kuu nzo gaxta liz Elisabet, lee Diox mlat leettsoo mne Elisabet, tsa ngwatwii re zha lo Elisabet ne mndaa re zha texkix lo Diox.

⁵⁹Ne leettsa mzaal mbet xon wiz, lee chop tson zha liz Zacarí ngwa mkee seny mbet, kuu nak seny re zha Israel. Ne ngwalaaz re zha gatob le zha mbet Zacarí taxal le xut mbet.

⁶⁰Per lee xnaa mbet nzhab: ―Rolet mbet tabaa, Juan role mbet.

⁶¹Tsa lee re zha nzhab lo Elisabet: ―Neeka thib zha liza let tabaa.

⁶²Tsa kon seny mnaabdiz zha lo xut mbet, tsa naa xomod nlaaz xut mbet role mbet.

⁶³Per lee Zacarí xut mbet mnaab thib le tabl, tsa kee Zacarí lee mbet lo tabl, tsa mkee Zacarí lo tabl: “Juan role mbet”. Ne reta zha kwathoz mzegey leettsoo zha mbin zha kona.

⁶⁴Ne oraaka lee Zacarí mre mndediz tedib welt, ne mndelo Zacarí mbil lo Diox.

⁶⁵Ne reta zha kuu nzo gax liz Zacarí kwathoz mzeb zha por kuu ngok, ne reta zha kuu nzo re yez kuu nzi leen yii chaan yezlyu Judea, mndediz zha re kuu ngok.

⁶⁶Ne reta zha kuu mbin re kuu ngok nda leettsoo zha, ne nzhab zha: “¿Cho nak mbet ree?” Tata mtsow re zha xgab, tak lee Zha Nabee mtsow re kuu thoz lo mbet. Zacarí mbil lo Diox

⁶⁷Ne lee Mbi Nayon mnabee leettsoo Zacarí xut mbet, tsa mndaa Zacarí kwent kuu nzhab Diox lo Zacarí, ne nzhab Zacarí:

⁶⁸¡Kwathoz wen nak Zha Nabee, Diox kuu nak Diox reʼaa zha Israel,tak myaad Diox lo reʼaa kuu wlipaa nak zha yez Diox, ne mtelaa Diox reʼaa lo re faltaa!

⁶⁹Ne mtaal Diox thib zha kuu tak kooʼaa lo yalguth, ne tuyy zha re falt chaanaa kon yalney chaan zha.Zha ree ndyaad lo raz chaan rey David kuu ngok teyaa, ne kuu ngok mos Diox.

⁷⁰Koree nak kuu nzhab re profet kuu ngoo ndala, re zha kuu nambi mndo lo Diox.Leettsa nzhab zha:

⁷¹Diox nak cho telaaʼaa lo re zha kuu nayii neʼaa, ne lo re zha kuu went nzo leettsoo neʼaa. [Sal. 106:10]

⁷²Ne loo Diox xa nlat leettsoo Diox ne Diox reʼaa, tak mnithlaazt Diox re diiz kuu nzhab Diox lo re teyaa, zha ndala.

⁷³Ne koree nak kuu nzhab Diox lo teyaa Abraham:

⁷⁴Nzhab Diox lee Diox telaaʼaa lo re zha kuu nayii neʼaa, tsa tsebtaa tsowaa rtsin Diox.

⁷⁵Ne ndoblo thibka nambi ne nali toʼaa lo Diox, reta wiz kuu nabanaa.Tsa nzhab Zacarí lo xgann Zacarí:

⁷⁶“Lee lu nak profet chaan Diox kuu ndob yibaa, tak lu tener lo Zha Nabee,tsa xaala xnet zha,

⁷⁷ne taaʼa kwent lo re zha kuu nak zha yez chaan Diox,lee Diox tuyy re falt zha,ne taa Diox yalnaban kuu thitanax lo re zha.

⁷⁸Tak nlat leettsoo Diox ne Diox reʼaa,kona ndaa Diox tedib xni kuu taxal xni wiz lo reʼaa,

⁷⁹tsa la xni ree lo re zha kuu nzo lo yalkow,ne lo re zha kuu nzo xann xkal chaan yalguth,ne ko Diox reʼaa net kuu wen kwinaa.”

⁸⁰Ne lee mbet ndezhen raa ne nzhak ney mbet lo Mbi Nayon chaan Diox, ne wan ngoo zha, asta wiz kuu mndelo zha mndaa kwent xkiiz Diox lo re zha Israel.