Read Ozolotepec Zapotec Lucas 10 Bible Online

Lucas 10 - Ozolotepec Zapotec bible

Lucas 10

¹Leettsa ngwalo mriid re koree, tsa lee Zha Nabee mli tson galbtsii chop zha, ne mtaal Jesús chopga chopga zha tener lo Jesús, tsa ya zha re yez ta naka diiz ya Jesús.

²Tsa nzhab Jesús lo re zha: ―Wlipaa na nin lo goo, kwathoz nzo rtsin Zha Nabee, per lutta zha kuu ke rtsin zha nzo. Kona bnaab goo lo Zha Nabee, tsa taal zha masraa zha kuu ke rtsin zha thop yalgonn chaan zha.

³Gwa goo, ne wen wii goo, tak lee na ngetaal goo taxal mbak zhiil xid re mbeez kuu nayii.

⁴Ne neeka thib kwaa gwet goo, gwet goo bols kuu yo re chaan goo, neeka temi, neeka tedib net labyid, ne kwetta goo tediz goo lo neeka thib zha net.

⁵Ne leettsa tab goo leen thib yuu, ner bni goo “diox” gab goo: “Wen kwin re goo kuu nzo yuu ree”.

⁶Ne os lee re zha kuu nzo yuuʼa ndoblo zha kayaa zha re diiz wen kuu ni goo lo zha, tekayaa zhay, per os lee zha ndoblot zha kayaa zhay yaante lo zha.

⁷Ne kwet goo yuuʼa, ne dow goo ne gwii goo loka kuu taa zha lo goo, tak lee zha kuu nke tsiin ndoblo gax kaa zha. Ne yat goo thib yuu tedib yuu.

⁸Ne loka yez ta ya goo ne kayaa zha goo, dow goo loka kuu tsib zha lo goo,

⁹ne btegwe goo re mbyiz kuu nzo yeza, ne gab goo lo re zha: “Lee wiz kuu nabee Zha Nabee lo goo mzin gaxa lo goo”.

¹⁰Per os tsin goo thib yez ta kayaat zha goo, broo goo yeza ne gab goo lo zha:

¹¹“¡Asta yuyaaz laz goo kuu mke nii nee, tsib neey tsa yaane! Tsa ne re tawlaz goo lee goo mkayaat nee. Per ndoblo ne goo koree: Lee wiz kuu nabee Diox mzin gaxa lo goo.”

¹²Tak wlipaa na nin, lee wiz kuu naab Diox kwent lo reta men, lee yalti kuu rid re zha yeza, gak masraa nati nake yalti kuu rid re zha yez Sodoma. Yalti kuu rid chop yez kuu mbint diiz (Mt. 11:20‑24)

¹³’¡Aka nalatt rid re goo zha yez Corazín! ¡Aka nalatt rid re goo zha yez Betsaida! ¡Aka nalatt rid goo yalti! Os leen yez Tiro ne Sidón gagak re kuu thoz ree kuu ngok lo re goo, ndaʼa wiz gatsee zha mod nak zha ne gagok zha lar kuu nambaat ne gatob zha lo di, tsa galoo zha lee leettsoo zha kwathoz nabil nzo por re falt kuu mtsow zha lo Diox.

¹⁴Kona lee wiz kuu naab Diox kwent lo reta men, lee yalti kuu rid goo gak masraa nati, nake yalti kuu rid re zha yez Tiro ne Sidón.

¹⁵Ne lee re goo zha yez Capernaúm, ¿chu ntsow goo xgab lee goo tsin yibaa? ¡Nagte tata, sinke lee goo tsin asta xann ta nak Hades ta nzo xbi re zha nguth!

¹⁶Tsa nzhab Jesús lo re zha kuu mtaal Jesús re yeza: ―Loka zha kuu kenza kuu gab goo, noga kenza zha kuu nin; ne lee zha kuu kayaat goo noga na nkayaat zha, ne lee zha kuu nkayaat na noga nkayaat zha, zha kuu mtaalʼn. Leettsa mretab re tson galbtsii chop zha kuu mtaal Jesús

¹⁷Leettsa mretab re tson galbtsii chop zha kuu mtaal Jesús re yez, kwathoz naley nzo leettsoo re zha, ne nzhab zha: ―Zha Nabee, asta re mbi fyer nzhon diiz lo nee kon yalnabee chaana.

¹⁸Tsa lee Jesús nzhab lo re zha: ―Mwiin lee Maxuuy mrethin yibaa taxal bel bti.

¹⁹’Mndan yalnabee lo goo, tsa lo goo dits mbeel ne dits mbezhub, ne mndan yalnabee lo goo tsow goo gan lo yalney chaan Maxuuy, ne yent kwan tak goo.

²⁰Ne ndoblot yo naley leettsoo goo, tak nzhon re mbi fyer diiz lo goo, sinke naley bloo goo leettsoo goo, tak lee le goo nkeʼa yibaa. Naley ngoo leettsoo Jesús (Mt. 11:25‑27; 13:16‑17)

²¹Ne leeka ora lee Mbi Nayon mtsow kwathoz naley ngoo leettsoo Jesús, ne nzhab Jesús: ―Nzhoolʼn loʼa Xutʼn, Zha Nabee yibaa ne yezlyu, tak mkaatsa koree lo re zha kuu nzhaak, ne lo re zha kuu nyen re kuu, ne mloo luy lo re zha kuu gagt. Xutʼn tabaa mtsow luy tak tabaa nlaaza.

²²’Reta kwaa mndaa Xutʼn lon. Ne neeka thib zha net cho nakʼn, sinke beeta Xutʼn ne cho nakʼn. Ne neeka thib zha net cho nak Xutʼn, sinke beeta na ne cho nak Xutʼn, ne lo re zha kuu nlazʼn lebee zha Xutʼn, tetsowʼn lebee zha Xutʼn.

²³Tsa mwii Jesús lo re zha kuu ngeteed lo Jesús, ne nzhab Jesús lo re zha: ―Wen nda re zha kuu ngwii re kuu ngwii goo.

²⁴Tak wlipaa na nin lo goo, tyen re profet ne tyen re rey ngwalaaz gagwii re kuu ngewii goo, per mwiit zhay, ne ngwalaaz zha gagon zha re kuu ngeyon goo per mbint zhay. Kwent nanzee chaan zha yez Samaria

²⁵Tsa lee thib maestr kuu nloo xkiiz Diox, ngwateli ne mnaabdiz lo Jesús, tak nlaaz zha yetsal zha thib kuu keki zha Jesús, tsa nzhab zha: ―Maestr, ¿kwan ndoblo tsowʼn, tsa tsowʼn gan yalnaban kuu thitanax?

²⁶Jesús mkab ne nzhab: ―¿Kwan nzhab ley? ¿Ne kwan nyena or nlab luy?

²⁷Lee maestr kuu nloo xkiiz Diox mkab, ne nzhab: ―Ndoblo ke leettsooʼa Diox kon dib ndroo leettsooʼa, ne kon dib yalnaban chaana, ne kon dib yalney chaana, ne kon dib xgaba, ne ndoblo ke leettsooʼa tabena taxal nke leettsooʼa leeka lu. [Lv. 19:18; Dt. 6:5]

²⁸Jesús mkab lo zha, ne nzhab: ―Wen mkaba, btsow koree tsa bana.

²⁹Per lee zha nlaaz gab, nyent zha kona, tsa mnaabdiz zha lo Jesús, ne nzhab zha: ―¿Ne cho nak taben da tsa?

³⁰Tsa lee Jesús mkab lo zha, ne nzhab: ―Nal tan thib kwent loʼa. Thib zha mroo yez Jerusalén ndyaadla zha yez Jericó, ne mroo chop tson wann lo zha, tsa mlowann re wann chaan zha; ne mkee wanne yek zha ne mtaan wann zha taxal zha nguth.

³¹Tsa lee thib ngwleyy mriid tya. Per or mwii ngwleyy zha, beeta mwii ngwleyy lo zha, ne thib lad mriid ngwleyy nda ngwleyy.

³²Ne leeka tata mriid thib zha raz Leví, ne or mwii zha zhaʼa, beeta mwii zha zha, ne mriid zha nda zha.

³³Per leettsa mriid thib zha Samaria neta, or mwii zha zhaʼa, mlat leettsoo zha mne zha zha.

³⁴Tsa mbig zha lo zhaʼa, ne mloo zha aseyt ne xit ub lo grid zhaʼa, ne mliib zha lar lo grid zhaʼa. Ne mtob zha zha dits burr zha, ne mndeno zha zha thib yuu ta mbet re men ne mkenap zha zha.

³⁵Ne lee tedib wiza or lee zha Samaria mbi, tsa mloo zha chop temi, ne mndaa zhay lo zha kuu mndaa ta mlet zha, ne nzhab zha lo zhaʼa: “Bkenap mbyi ree, ne os leeʼa tsow raa lu gast, yat leettsooʼa na yizhe loʼa leettsa bretabʼn”.

³⁶Tsa mnaabdiz Jesús lo maestr, ne nzhab Jesús: ―¿Kwan ntsowa xgab? ¿Cho lo re yon zhaʼa nak taben zha kuu mkee re wanne yek?

³⁷Lee maestr kuu nloo xkiiz Diox mkab, ne nzhab: ―Zha kuu mlat leettsoo mne zha kuu mkee wanne yek. Tsa nzhab Jesús lo maestr: ―Tyee, ne tataga btsow. Jesús ngwatwii lo Mart ne lo Mari

³⁸Ne lee Jesús ndaka xnet, tsa mzin Jesús thib yez, ne tya lee thib ngot kuu le Mart mkayaa Jesús lize.

³⁹Ne nap Mart thib bel Mart kuu le Mari. Ne lee Mari mndob lo Jesús, nzhon Mari re kuu nzhab Jesús.

⁴⁰Per lee Mart kwathoz ntsow xgab re rtsin, tsa mbig Mart lo Jesús, ne nzhab Mart: ―Zha Nabee, thita na mlaa belʼn, tsow reta kwaa. Guz lo belʼn tsa tsow zha ayudʼn.

⁴¹Lee Jesús mkab lo Mart, ne nzhab: ―Mart, Mart, kwathoz nda leettsooʼa, ne kwathoz ntsowa xgab,

⁴²per thibka kuu ndoblo tsow men ne lee Mari mli kuu mas wen, ne yent cho kibe lo Mari.