Read Ozolotepec Zapotec Lucas 14 Bible Online

Lucas 14 - Ozolotepec Zapotec bible

Lucas 14

¹Thib wiz sabd, lee Jesús ngwa ndow liz thib fariseo, kuu nabee lo re fariseo, ne lee tedib net fariseo ngewii naa kwan tsow Jesús.

²Ne tya ndo thib zha kuu ndak yiz ki.

³Tsa lee Jesús mnaabdiz lo re maestr chaan ley ne lo re fariseo, ne nzhab: ―¿Kwan nzhab lo ley? ¿Chu tak tegwe men thib mbyiz wiz sabd o gagte?

⁴Per mkabt re zha. Tsa lee Jesús mdiinn mbyiza ne mtegwe Jesús zha ne mtaal Jesús zha ndya zha.

⁵Tsaraa nzhab Jesús lo re fariseo: ―Os lee thib goo nap thib xgann o thib ngon, ne la xgann goo o ngon goo leen pos wiz sabd, ¿chu koot goo xgann goo o ngon goo wiz sabd?

⁶Ne neeka thib zha ngogt gakab lo Jesús. Re zha kuu mrez zha ya lo fandan

⁷Or mwii Jesús lee re zha kuu mrez zha lo ani, ngekwaan zha thib ta mas wen tob zha, tsa mre Jesús mni Jesús kon diiz nanzee lo re zha tedib welt, ne nzhab Jesús:

⁸―Leettsa lee thib zha kweza yaʼa fandan, kwiita ta mas nataak toba, tak cha tsin tedib zha kuu mas nataak nake lu,

⁹tsa lee zha kuu mreza big ne loʼa: “Amig taa ta ndoba tob zha ree”. Tsa nathoy nzhaka yeteliʼa ne yaʼa toba lo bank kuu nzi asta dits re men.

¹⁰Kona mas wen leettsa kwez zha lu yaʼa lo thib fandan, asta par dits re zha toba, ne leettsa yaad zha kuu mreza, tsa ne zha loʼa: “Amig, briid toba asta delant”. Tsasi gaka zha kuu nataak taxal re zha kuu nzi ta nataak.

¹¹Tak lee zha kuu ntsow nataak leeka lee, zhaʼa gak zha kuu nataagt, ne lee re zha kuu ntsow nataagt leeka lee, zhaʼa gak zha nataak.

¹²Tsa nzhab Jesús lo zha kuu mtsow fandan: ―Leettsa tsowa thib ani, kwezta re amiga, neeka re wetsa, neeka re zha liza, ne neeka re zha rik kuu nzo gaxta liza; tak reta zhaʼa tak kwez zha lu wuʼa liz zha, ne tata kix zha kuu ndow zha loʼa.

¹³Kona mas wen leettsa tsowa thib ani, brez re prob, re tunk, re mthans ne re zha syeg,

¹⁴tsa lee Diox taa re kuu wen loʼa, tak lee re zhaʼa gagt kix zha re kuu ndow zha loʼa, per leettsa tsin wiz kuu roban re zha kuu nali ngok lo Diox, tsa leeʼa kayaa kuu wen kuu mtsowa gan. Kwent nanzee chaan rtsee ro

¹⁵Leettsa mbin thib zha kuu ndob roo mes kona, tsa nzhab zha lo Jesús: ―Kwathoz wen nda re zha kuu tab wu pan leen yibaa ta nabee Diox.

¹⁶Tsa lee Jesús mkab lo zhaʼa ne nzhab: ―Thib mbyi mtsow thib rtsee ro, ne mrez zha kwaro men.

¹⁷Ne or mzin or kuu wu rtsee re men, tsa mtaal zha mos zha ngwane lo re zha kuu mrez zha: “De goo, tak reta kuu nziba”.

¹⁸Per lee reta zha mndelo zha nzhab zha lo mos gagt ya zha. Lee thib zha nzhab: “Ngwalota mzhiin thib le yu, ne ndeche yatwiin loy, ta mod gagt yan; gaba lo zha kuu mtaala tsow zha perdon na”.

¹⁹Lee tedib zha nzhab: “Ngwalota mzhiin gaay net ngon, kona gagt yan; gaba lo zha kuu mtaala tsow zha perdon na”.

²⁰Ne lee tedib zha nzhab: “Ngwalota mtseyan, kona gagt yan”.

²¹Tsa lee mos mre ne mndaa kwent kona lo patron. Tsa lee patron mos kwathoz mndak leettsoo, ne nzhab lo mos: “Lijer gwa re net to ne re net thib dita yez, ne yaadnoʼa re zha prob, zha tunk, zha mthans ne re zha syeg”.

²²Ne leettsa mretab mos nzhab mos: “Zha Nabee, mtsowa na kuu mnabeeʼa lon, per bee nzo raa ta tob masraa men”.

²³Tsa lee patron nzhab lo mos: “Gwa re net yez ne re net kuu nda wan, ne btsow fwers re zha tsa yaad zha, tsa tse lizʼn.

²⁴Tak lee na ni, neeka thib re zha kuu mrezʼn ner, wut kuu mtsowʼn.” Kuu ndoblo tsow zha kuu ndeke dits Jesús

²⁵Ne kwathoz men mndeke dits Jesús, tsa mtsere lo Jesús ne nzhab Jesús lo re zha:

²⁶―Os lee thib zha nlaaz teke ditsʼn, ne nket leettsoo zha na masraa nake xut zha ne xnaa zha, ne tsaal zha, ne zhiinn zha, ne wets zha ne btan zha ne leeka lee zha, gagt gak zha, thib zha kuu teke ditsʼn.

²⁷Ne os kot zha leettsoo zha thib gath zha tak nyelaaz zha na, ne teket zha ditsʼn, gagt gak zha thib zha da.

²⁸Tak os lee thib zha nlaaz ta thib yuu, ndoblo koo zha kwent naa chu tegaa temi lo zha par taa zha yuu.

²⁹Tak os lee zha tob zha simyent ne tsowt zha gan taa zha yuu, tsa lee re zha kuu wiiy telo zha zhizno zha zha,

³⁰ne gab zha: “Anta mtob zha baa simyent ne mtsowt zha gan gata zha yuu”.

³¹Ne tataka, os lee thib rey, nlaaz yo kon tedib rey, ner ndoblo tob rey ne tsow rey xgab, naa chu tak yo rey kon tsii mil soldad chaan rey, kon tedib rey kuu ndyaad kon thib gal mil soldad.

³²Ne os lee rey ne rey gagt yo rey kon tedib reya; leettsa lee tedib reya bee ndo tith, tsa ndoblo rey taal thib zha kuu ya ni lo tedib reya, tsa wen kwin re zha ne yot zha.

³³Ne tataka, os lee goo laat goo re kuu nap goo, gagt gak goo zha kuu teke ditsʼn. Wen ted leettsa natsig ted (Mt. 5:13; Mr. 9:50)

³⁴’Wen ted leettsa natsig ted, per os lee ted natsigt raa ted, gagt raa gak natsig ted tedib welt.

³⁵Neeka lortsin raa ted par gak ted beww, neeka par gake yu sinke tabaata kobi zhay. ¡Os lee goo ndob nza goo ndoblo yen goo koree!