Read Ozolotepec Zapotec Lucas 19 Bible Online

Lucas 19 - Ozolotepec Zapotec bible

Lucas 19

¹Tsa mndaab Jesús yez Jericó ne mriid Jesús leen yeza.

²Ne tya nzo thib mbyi rik kuu le Zaqueo, ne lee zha nak zha kuu nabee lo re zha kuu ntsow kobral temi chaan yezlyu kuu nzhax lo zha Roma.

³Ne nlaaz zha wii zha Jesús, per gagt wii zha Jesús, tak kwathoz men nzi, ne tak kwathoz lut Zaqueo.

⁴Tsa lijer mndener zha ne mkendab zha lo thib ya kuu le sicómoro, par wii zha Jesús leettsa rid Jesús tya.

⁵Leettsa mzin Jesús tya, ne mwii Jesús lo ya, tsa nzhab Jesús lo zha: ―Zaqueo, lijer bla, tak liza betʼn naltseree.

⁶Tsa lijer mla zha ne kwathoz naley ngoo leettsoo zha, mbin zha lee Jesús kwet liz zha.

⁷Ne or mbin re men kona, mndelo zha mbez zha lo re altaa zha, ne nzhab zha; lee Jesús nda kwet liz thib zha kuu kwathoz ndab falt.

⁸Tsa lee Zaqueo mndeli ne nzhab lo Jesús: ―Zha Nabee, wii, garol re kuu napʼn tan lo re zha prob; ne os leen mlowann na chaan thib zha, thap lal kuu mkibʼn lo zha tseren lo zha.

⁹Tsa nzhab Jesús lo Zaqueo: ―Naltseree lee re zha kuu nzo yuu ree mkayaa yalnaban kuu thitanax, tak no zha ree nak zha raz Abraham.

¹⁰Tak lee na, Kuu Mzin Ngok Men, ndyaad kwaan re zha kuu mndab, tsa tan yalnaban lo re zha. Kwent nanzee chaan tsii temi (Mt. 25:14‑30)

¹¹Ne leettsa ngeyon re zha re kuu ngeni Jesús, tsa nzhab Jesús tedib kwent nanzee lo re zha, tak gaxa Jerusalén nzi re zha kon Jesús, ne mtsow re zha xgab, mera nabee Diox lo re men.

¹²Tsa lee Jesús nzhab lo re zha: ―Ngoo thib zha rik kuu kwathoz nataak, ne mroo zha nda zha thib ta kwathoz tith, ne tya gak zha rey kuu nabee, ne tsaraa bretab zha.

¹³Ne leettsa ter roo zha, tsa mrez zha tsii mos zha, ne mndaa zha thibga temi kuu mas nataak lo kadta thib mos, ne nzhab zha lo re mos: “Bke goo tsiin kon temi ree, asta leettsa bretabʼn”.

¹⁴Per lee re tawlaz zha nayii ne zha, tsa mtaal re tawlaz zha thib net zha ngwalo diiz lo rey ne nzhab: “Nlaazt nee gak zha ree rey lo nee”.

¹⁵’Per leettsa naka zha rey, tsa mre zha laz zha. Tsa mrez zha re mos zha kuu mndaa zha temi lo, tak nlaaz zha ne zha naa xa mke re mos tsiin kon temiʼa.

¹⁶Tsa mzin mos kuu ner ne nzhab mos: “Zha Nabee, lee temi kuu mndaaʼa lon, mtsowe gan tedib tsiiy”.

¹⁷Tsa lee rey nzhab lo mos: “Mos da, kwathoz wen mkeʼa tsiin. Wen mtsowa lo lut kwaa mndan loʼa, kona lee nal tan tsii yez loʼa, tsa nabee luy.”

¹⁸Tsa mzin tedib mos ne nzhab lo rey: “Zha Nabee, lee temiʼa kuu mndaaʼa lon mtsowe gan tedib gaaye”.

¹⁹Tsa lee rey nzhab: “Nal tan thib gaay yez loʼa tsa nabee luy”.

²⁰Tsa mzin myon mos ne nzhab: “Zha Nabee, lee temiʼa kuu mndaaʼa lon nzhee. Mkee nay lo thib panyit ne mkaats nay,

²¹tak nzebʼn nen lu, tak nen lee lu nak thib zha kuu kwathoz nakap, ndena kuu mtaanta ne nthopa yalgonn ta ngonnta.”

²²Tsa lee rey nzhab lo mos: “Kon leeka re diiz kuu mroo rooʼa, naabʼn kwent loʼa; lu nak thib zha nakap. Neʼa lee na nden na kuu mtaantʼn ne nthopʼn yalgonn ta mlootʼn bin.

²³¿Chebee mlota temi da bank? Tsa leettsa gabren, gataaʼa temi da kuu mndan loʼa, ne gataaʼa zhiinne kuu mtsowe gan lon.”

²⁴Tsa nzhab rey lo re zha kuu nzi lo rey: “Bkib goo temi lo mos ree, ne btaa gooy lo mos kuu nap tsiiy”.

²⁵Tsa lee re zha nzhab lo rey: “Zha Nabee napa zha baa tsii temi”.

²⁶Per lee rey mkab ne nzhab: “Lee na ni lo goo: Lee zha kuu nap naroobe tekayaa zha masraay, per lee zha kuu yent kwan nap, asta lut kuu nap zha yiib lo zha.

²⁷Ne noga nzhab rey: Deno goo re zha kuu nlaazt gakʼn rey lo nzhee, ne beth goo zha nzhee lon.” Lee Jesús mndaab yez Jerusalén (Mt. 21:1‑11; Mr. 11:1‑11; <a href='B:500 12:1'>Jn.12 :<a href='B:500 12:1'>12‑<a href='B:500 19:1'>19)

²⁸Leettsa ngwalo nzhab Jesús kona, ndaka Jesús yez Jerusalén.

²⁹Leettsa ndetsin gaxa Jesús yez Betfagé ne yez Betania, gaxta yii kuu le Olib, tsa mtaal Jesús chop zha kuu ngeteed lo Jesús,

³⁰ne nzhab Jesús lo rop zha: ―Gwa goo yez kuu nzi gaxta nzhee, tya yetsal goo thib burr kuu ndekedoo, thib maa kuu terka yo xab. Xak goo maa ne yaadno goo maa nzhee.

³¹Ne os cho zha naabdiz lo goo ne: “¿Chebee ngexak goo burr?” Gab goo lo zha: “Lee Zha Nabee ndeche maa”.

³²Tsa lee rop zha kuu mtaal Jesús nda, ne mzal burr lo zha taxal nzhab Jesús lo rop zha.

³³Ne leettsa ngexak zha burr, lee bzhaan burr, mnaabdiz lo rop zha ne nzhab: ―¿Chebee ngexak goo burr da?

³⁴Tsa lee zha mkab ne nzhab: ―Lee Zha Nabee ndeche maa.

³⁵Tsa ngwano zha maa lo Jesús. Ne mxoob zha xab zha dits maa ne mke Jesús dits maa.

³⁶Ne taxal nderid Jesús lee re men ngix xab net.

³⁷Ne or ndyaadla re zha ndetsin zha gax yii kuu le Olib, tsa lee reta men kuu ndeke dits Jesús mndelo zha mbil zha dibgan zha ne mndaa zha texkix lo Diox, por re kuu thoz kuu mwii zha mtsow Jesús.

³⁸Ne mbez re zha: ―¡Kwathoz wen nak zha kuu ndyaad kon le Zha Nabee! ¡Wen kwin re zha yibaa ne golaa lo Diox kuu ndob yibaa!

³⁹Tsa lee chop tson re fariseo kuu nzi xid re mena, nzhab lo Jesús: ―Maestr, gok nayii lo re zha kuu ndeke ditsa.

⁴⁰Per lee Jesús nzhab lo re zha: ―Wlipaa na nin lo goo, os lee re zha ree tow roo, lee re ke kwez guth.

⁴¹Leettsa ndetsin gax Jesús yez Jerusalén, or mwii Jesús yez, ora mbinn Jesús,

⁴²ne nzhab Jesús: ―¡Os lee re goo zha yez Jerusalén gane goo, lee wiz naltseree tak wen kwin goo, per tak nzogaats koree lo goo, kona nloote lo goo!

⁴³Tak too wiz kuu lee re zha kuu nayii ne goo telo yo kon goo, ne tow zha re ladta lo goo, taxal thib btsin ke.

⁴⁴Wlipaa teluux zha re zhiinnta goo, ne neeka thib ke yaant dits tedib ke yez ree, tak mlebeet goo Diox wiz kuu myaadtwii Diox lo goo. Jesús mtezhonn re zha kuu nzi ntho lee roo gwodoo naro (Mt. 21:12‑17; Mr. 11:15‑19; <a href='B:500 02:1'>Jn.2 :<a href='B:500 13:1'>13‑22)

⁴⁵Tsa mndaab Jesús lee roo gwodoo naro, ne mndelo Jesús mtezhonn re zha kuu ntho ne ndi tya.

⁴⁶Tsa nzhab Jesús lo re zha: ―Nkeʼa lo xkeets Diox ta mbez: “Lee lizʼn nak yuu ta ndediz re men lon” [Is. 56:7; Jer. 7:11]; ne lee re goo ntsowe taxal liz wann.

⁴⁷Gandata wiz nloo Jesús lo re men lee roo gwodoo, per lee re ngwleyy kuu nabee lo re ngwleyy, ne re maestr kuu nloo xkiiz Diox lo re men, ne re zha kuu nabee yez, nkwaan zha naa xomod kuth zha Jesús.

⁴⁸Per mzalt zha mod gatsow zhay, tak kwathoz men nzi nzhon re kuu nloo Jesús.