Read Ozolotepec Zapotec Lucas 2 Bible Online

Lucas 2 - Ozolotepec Zapotec bible

Lucas 2

¹Ne lee re wiza lee Augusto nak zha kuu nabee dita ta nabee yez Roma, tsa mnabee Augusto thop zha le re men dita ta nabee Roma, tsa la le re men padron.

²Ne Ciren nak zha kuu nabee yezlyu Siria, leettsa mthop zha le re men welt ner.

³Reta zha ndoblo zha ya zha laz zha, tsa la le zha padron.

⁴Kona, no Che mroo yez Nazaret, ta nabee yezlyu Galilea, ne ngwa Che yez Belén kuu nzi yezlyu Judea ta ngol rey David, tak lee Che nak zha raz chaan rey David.

⁵Tsa ngwa Che rop Mari tya, tsa la le rop zha padron ne naka diiz tseya Mari rop Che, ne lee Mari nzo zhiinna.

⁶Ne leettsa bee nzi rop zha Belén, mzin wiz kuu lee Mari gal zhiinn.

⁷Tya ngop Mari zhiinn Mari kuu ner, tsa mchiix Mari mbet lar ne mdix Mari mbet ta nzi yizh kuu nzhow maa, tak mgaat rop zha yuu ta gabet zha. Re mandad ne re zha kuu nkenap mbak zhiil

⁸Gaxta Belén nzi chop tson zha kuu nkenap mbak zhiilee yaal.

⁹Tsa cha mloo thib mandad chaan Diox lo re zha, ne lee xni chaan Zha Nabee mla dita ta nzi re zha, tsa kwathoz mzeb re zha.

¹⁰Tsa lee mandad nzhab lo re zha: ―Tsebt goo, tak leen ndyaadno thib diiz kuu kwathoz wen lo goo, ne kwathoz naley yo leettsoo re men gone.

¹¹Tak naltseree ngol thib mbet laz David, ne mbet ree telaa goo lo re falt goo. Ne mbet ree nak Crist Kuu Mtaal Diox Nabee, ne leeka mbet nak Zha Nabee.

¹²Koree nak thib seny tsa yetsal mbet lo goo, lee mbet nabix lar nax lo yizh kuu nzhow maa.

¹³Ne leeka ora lee kwaro mandad chaan Diox mndo lo mandada, ne mbil re mandad lo Diox ne nzhab re mandad:

¹⁴¡Ndoblo gol re men lo Diox kuu ndob yibaa!¡Ne wen kwin re men lo yezlyu ree,tak nlaaz Diox tsow Diox kuu wen lo re men!

¹⁵Leettsa lee re mandad ndya yibaa, tsa lee re zha kuu nkenap mbak zhiil mndelo zha nzhab zha lo re altaa zha: ―Ndaa goo reʼaa yez Belén nal, tsa wiiʼaa naa kwan ngok, tak kona mloo Zha Nabee diize loʼaa.

¹⁶Tsa lijer nda re zha, ne mzal Mari ne Che lo re zha, ne lee mbet nax ta nzi yizh kuu nzhow maa.

¹⁷Ne or mwii re zha mbet, tsa mndelo zha mndaa zha kwent chaan mbet, kuu nzhab mandad chaan Diox lo re zha,

¹⁸ne reta zha kuu mbin kuu nzhab re zha kuu nkenap mbak zhiil, kwathoz mzegey leettsoo re zha.

¹⁹Per thibka nzo re diza yek Mari, ne thibka ntsow Mari xgabe.

²⁰Tsa lee re zha kuu nkenap mbak zhiil ndya, ne mbil zha lo Diox ne mndaa zha texkix lo Diox, por re kuu mbin zha ne re kuu mwii zha, tak ngok reta kuu nzhab mandad chaan Diox lo re zha. Mbe zha Jesús gwodoo chaan Diox

²¹Leettsa mzaal mbet xon wiz, tsa mkee zha seny chaan zha Israel mbet, ne mtob le zha mbet Jesús, taxal nzhab mandad chaan Diox lo Mari, leettsa bee ter yo zhiinn Mari.

²²Ne leettsa ngwazhoob wiz kuu lee Mari ngok nambi, taxal nabee ley chaan Moisés, tsa lee Che ne Mari mbe mbet yez Jerusalén, tsa kayaa Zha Nabee mbet.

²³Tata mtsow zha, tak lo ley chaan Zha Nabee nzhab: “Reta mbet bi kuu gal ner, gak zha nayon lo Zha Nabee”.

²⁴Ngwa zha ne mndaa zha gon kuu ndoblo zha taa zha, taxal nabee ley chaan Zha Nabee: “Ndoblo gwe zha chop ngog o chop palom”.

²⁵Ne re wiza ngoo thib mbyi kuu le Simeón yez Jerusalén. Ne mbyiʼa nak thib zha nali lo Diox, ne nzhool zha lo Diox, ne ngebet zha tetsey Diox leettsoo re zha Israel. Ne lee Mbi Nayon chaan Diox mnabee leettsoo zha,

²⁶ne nzhaba Mbi Nayon lo zha gatht zha, os ter wii zha, zha kuu taal Diox nabee.

²⁷Tsa lee Mbi Nayon mtsow ngwa Simeón gwodoo, ne leeka ora mbe Che ne Mari mbet gwodoo, tsa tsow zha kuu nabee ley chaan Moisés.

²⁸Ora mdeez Simeón mbet ne mbil Simeón lo Diox ne nzhab Simeón:

²⁹Zha Nabee, nalsi ngoka kuu mneʼa lon,kwathoz wen nzo leettsoon, taka laaʼa gathʼn nal.

³⁰Tak nalsi mwiiʼa na zha kuu telaa re men lo yalguth,

³¹mtaala zha lo reta men taxal mtsowa xgabe desde ndala.

³²Lee zha nak xni kuu teni lo reta men kuu nagt zha Israel,ne tsow nataak zha re nee, zha kuu nak zha Israel.

³³Kwathoz mzegey leettsoo Che ne Mari xnaa Jesús, or mbin rop zha kuu nzhab Simeón kwent chaan Jesús.

³⁴Tsa mnaab Simeón lo Diox kenap Diox re zha, ne nzhab Simeón lo Mari xnaa Jesús: ―Diox mli mbet ree par kib mbet falt chaan kwathoz tawlazaa o par masraa kwibe dits zha, ne nak mbet thib seny kuu kwaro zha kayaat mbet,

³⁵tsa lee re kuu ntsow kadta thib re men xgab gak nabeey. Per lee loʼa gak kona taxal thib espad kuu rid leettsooʼa.

³⁶Ne leeka tya ndo thib ngot kuu le An, ngota nak profet chaan Diox, ne ngota nak rtsaap Fanuel kuu nak zha raz chaan Aser, ne zha gola ngot. Tak kwathoz mndyeen ngot mtseya ngot, gazka liin ngoo rop tsaal ngot,

³⁷ne ndaʼa thap galbthap liin myaan ngot byud. Ne thitanax mbechet ngot gwodoo chaan Diox, tse ne yaal ntsow ngot tsiin lo Diox ntsow ngot ayun ne ndediz ngot lo Diox.

³⁸Ne ora mzin ngota ne mndelo ngot mndaa ngot texkix lo Diox, ne mndaa ngot kwent chaan Jesús, lo re zha kuu ngebet tsin zha kuu koo re zha Jerusalén lo yalguth.

³⁹Ne leettsa ngwalo mtsow Che rop Mari re kuu nabee ley chaan Zha Nabee, tsa mretab rop zha yezlyu Galilea tedib welt, ta nak laz zha Nazaret.

⁴⁰Ne thib wiz tedib wiz lee Jesús masraa ndezhen ne masraa nzhaak, ne lee Diox thibka ndo kon Jesús. Lee Jesús ngwato lee roo gwodoo

⁴¹Gandata liin nya xut Jesús ne xnaa Jesús lo ani Paskw yez Jerusalén.

⁴²Ne leettsa mzaal Jesús tsiibchop liin, ngwa Jesús rop xut Jesús ne xnaa Jesús Jerusalén, taxal nak Kostumr zha.

⁴³Ne leettsa ngwalo mriid ani, tsa mretab re zha laz zha, ne lee Jesús myaanka Jerusalén, per myeent xut Jesús ne xnaa Jesús lee Jesús myaanka.

⁴⁴Tak mtsow rop zha xgab xid re men ndyaad Jesús, ne leettsa ndaʼa thib wiz ndo zha net. Tsaraa mndelo zha mkwaan zha Jesús xid re zha liz zha ne xid re tawlaz zha, per mzalt Jesús lo zha.

⁴⁵Tsa mretab rop zha Jerusalén tedib welt, ne mkwaan zha Jesús.

⁴⁶Ne leettsa mzaal tson wiz tsaraa mzal Jesús lo rop zha. Lee Jesús ndob lee roo gwodoo chaan Diox xid re maestr kuu nloo xkiiz Diox, nkenza Jesús ne naabdiz Jesús lo re maestr.

⁴⁷Ne reta zha kuu nkenza kuu ni Jesús, kwathoz nzegey leettsoo re zha, tak kwathoz nzhaak Jesús, ne nzhaak Jesús nkab lo re zha.

⁴⁸Or mzal Jesús lo xut Jesús ne lo xnaa Jesús, kwathoz mzegey leettsoo rop zha, tsa nzhab xnaa Jesús lo Jesús: ―Xgann na, ¿chebee tabaa mtsowa lo nee? Kwathoz nalatt nzhak rop nee xuta ngekwaan nee lu.

⁴⁹Lee Jesús mkab ne nzhab: ―¿Chebee nkwaan goo na? ¿Chu net goo lee na ndoblo ton lo re kuu nak rtsin Xutʼn?

⁵⁰Per lee xut Jesús ne xnaa Jesús myent rop zha kuu nzhab Jesús.

⁵¹Tsa mre Jesús laz Jesús yez Nazaret kon xut Jesús ne kon xnaa Jesús, ne mbin Jesús diiz lo xut Jesús ne lo xnaa Jesús. Per thibka nzo re koree leettsoo Mari xnaa Jesús ne ntsow Mari xgab naa kwan nak re kona.

⁵²Ne lee Jesús masraa ndezhen, ne masraa nzhaak Jesús, ne nataak Jesús lo Diox ne lo re men por re kuu ngok lo Jesús.