Read Ozolotepec Zapotec Lucas 21 Bible Online

Lucas 21 - Ozolotepec Zapotec bible

Lucas 21

¹Tsa mwii Jesús lee re zha rik ngo naroob temi leen alkansi kuu ndob lee roo gwodoo chaan re zha Israel.

²Ne noga mwii Jesús thib ngot byud kuu prob. Lee ngota mloo chopka temi kuu nataagt leen alkansi.

³Tsa nzhab Jesús: ―Wlipaa na nin lo goo, lee ngot prob ree mndaa mas naroob gon nake tedib net re men.

⁴Tak reta zha mloo naroob temi leen alkansi, per beeta kuu mrozhoob lo zha mloo zha. Per lee ngot prob ree mndaa reta temi kuu nap ngot, kuu tii ngot kuu wu ngot. Jesús nzhab lee gwodoo lux (Mt. 24:1‑2; Mr. 13:1‑2)

⁵Tsa lee chop tson re men kuu nzi ngetediz kwent chaan gwodoo chaan re zha Israel. Ne mbez zha lee re ke kuu naya gwodoo kwathoz chul nay, ne kon kwaro gon ngway. Tsa nzhab Jesús lo re zha:

⁶―Lee re ke kuu ngewii goo nal, tetsin thib wiz lee reta ke ree lux, yaant thibe dits tedibe. Re kuu gak leettsa terka lux yezlyu (Mt. 24:3‑28; Mr. 13:3‑23)

⁷Tsa mnaabdiz re zha lo Jesús, ne nzhab zha: ―Maestr, ¿pol gak re koree? Ne, ¿kwan loo leettsa mera gak re koree?

⁸Jesús mkab lo re zha, ne nzhab: ―Kenap goo goo, tsa neeka thib zha kedit goo. Tak kwathoz zha yaad ne ne: “Na nak Crist Kuu Mtaal Diox Nabee”. Ne noga ne zha: “Mzin gaxa wiz kuu gak re koree”, per yelaazt goo kuu ne zha neeka teket goo dits zha.

⁹Leettsa gon goo nzo zhoo reta ta, tsebt goo. Reta koree ndoblo gak ner; per nagt koree kuu lux yezlyu.

¹⁰Noga nzhab Jesús lo re zha: ―Lee thib yez yo kon tedib yez, ne lee re zha kuu nzo ta nabee thib rey yo kon re zha kuu nzo ta nabee tedib rey.

¹¹Ne kwathoz gwin zho thoz lo yezlyu, ne la win, ne kwathoz tyen ta la yiz, ne loo re seny thoz lobee, ne yo re kuu thoz kuu tseb re men ne.

¹²Per leettsa ter gak re koree, lee re men ten goo ne teti zha goo, ne yataan zha goo ta nkaltaa reʼaa nteedaa xkiiz Diox, ne noga yataan zha goo lo re rey, ne lo re zha kuu nak tsiin tsa ko zha goo tsib. Reta koree tsowno zha goo tak nyelaaz goo na.

¹³Reta koree gak tsa tak taa goo kwent chaan da lo re men.

¹⁴Tsowt goo xgab naa kwan kab goo, or kuu naab re zha kuu nak tsiin kwent lo goo.

¹⁵Tak na ta yalnzhaak lo goo, tsa wen ne goo naa kwan kab goo ora; tsa lee re zha kuu nayii ne goo, gagt tow zha roo goo ne neeka gagt kab zha neeka thib kwaa lo goo.

¹⁶Ne leeka xut goo, leeka re wets goo, leeka re zha liz goo, ne leeka re zha nyey goo, yataan goo lo zha kuu nak tsiin. Ne kuth zha chop tson goo.

¹⁷Reta men yii ne goo, tak nyelaaz goo na.

¹⁸Per neeka thib yitsek goo luxt.

¹⁹Per loka zha kuu xek rid re koree, zhaʼa tetsow gan yalnaban kuu thitanax.

²⁰’Leettsa wii goo lee re soldad kwin dita roo yez Jerusalén, tsa ne goo mera lux Jerusalén.

²¹Tsa lee re zha kuu nzo yezlyu Judea ndoblo zhonn zha par net yii, ne lee re zha kuu nzo yeza ndoblo zhonn zha par yek yii, ne lee re zha kuu nzi wan, ndoblot bretab zha yez.

²²Tak re wiza gak wiz kuu lee re mena rid kwathoz yalti thoz, tak retay ndoblo gak taxal nzhab lo xkiiz Diox.

²³Kwathoz nati rid re ngot kuu nzo zhiinn wiza. Ne kwathoz nati rid re ngot kuu nap mbetdoo wiza, ne kwathoz nati rid re men kuu nzi lo yezlyu ree wiza, tak lee yalnayii chaan Diox la dits re zha kuu nzi lo yezlyu ree wiza.

²⁴Lee thib net re men gath lo zhoo, ne lee tedib net zha teno zha zha par gak zha mos tedib yezlyu. Tsa lee re zha kuu nagt zha Israel nabee lo re zha yez Jerusalén, asta yezhoob wiz kuu ndoblo nabee re zhaʼa lo re zha Israel. Xomod bre Jesucrist (Mt. 24:29‑35, 42‑44; Mr. 13:24‑37)

²⁵’Ne telo loo re seny thoz lo wiz, lo mbee ne lo re mbel kuu nzib lobee. Tsa lee re men kuu nzo re yez kuu nzi lo yezlyu ree, teguz zha lo tseb leettsa wii zha lee nitdoo telo bexnit ne ke bi.

²⁶Ne thitanax teguz re men lo tseb, por re kuu rid lo yezlyu, tak lee re kuu nzo lobee zhiit.

²⁷Tsa lee re men wii, lee na Kuu Mzin Ngok Men, yalʼn xid xkow kon kwaro yalnabee chaan da ne kon xni thoz chaan da.

²⁸Leettsa ne goo lee re koree ngeyak, gwateli goo ne wii goo lobee, tak mera tsin na kuu taa yalnaban kuu thitanax lo goo.

²⁹Tsa nzhab Jesús tedib kwent nanzee lo re men, ne nzhab Jesús: ―Wii goo lo ya ig ne wii goo lo tedib net re ya.

³⁰Leettsa ngwii goo lee re zhite ndelo la bzhits, tsa ne goo lee mbee beyi ndetsin gaxa.

³¹Leeka tata, leettsa wii goo lee re koree ngeyak, neʼa goo ndetsin gaxa wiz kuu lee Diox nabee lo goo.

³²Wlipaa na nin lo goo, terka gath re men kuu nzi lo yezlyu nal ne lee re koree gak.

³³Yezlyu ne lobee telux per lee xkizʼn ridt.

³⁴’Bkenap goo goo, lo re kuu yezlyu ree, tsa kedit re kuu yezlyu ree goo, tsowt goo re kuu went kuu nlortsint, keet goo yalgwiy, neeka tsowt goo xgab naa kwan wu goo ne gu goo, tsa lista nzi goo wiz kuu lee na bretab,

³⁵tak lee wiz kuu wenta chatta tsin lo reta men kuu nzo dib naxta lo yezlyu.

³⁶List gwatsin goo, ne thibka bnaab goo lo Diox gandata or, tsa ridt goo neeka thib re kuu went kuu rid, ne tsa ney to goo nyelaaz goo na, Kuu Mzin Ngok Men.

³⁷Ne gandata wiz nloo Jesús lo re men lee roo gwodoo, ne reta yaal nya Jesús yii kuu le Olib, ne tya nyaan Jesús.

³⁸Ne gandata wiz kwathoz til nzin re men lee roo gwodoo, tsa gon zha kuu ni Jesús.