Read Ozolotepec Zapotec Lucas 3 Bible Online

Lucas 3 - Ozolotepec Zapotec bible

Lucas 3

¹Ne leettsa ndaʼa tsiin liin nabee Tiberio César dita ta nabee Roma, lee Poncio Pilat nak zha kuu nabee yezlyu Judea, lee Herodes nabee Galilea, lee Lip wets Herodes nabee yezlyu Iturea ne yezlyu Traconite, ne lee Lisanias nak zha kuu nabee yezlyu Abilinia.

²Ne Anás ne Cáifas nak ngwleyy kuu kwathoz nataak yez Jerusalén tsya. Re wiza lee Juan xgann Zacarí ngoo thib ta yubiz, ne lee Diox mni lo Juan.

³Tsa lee Juan mriid dita yezlyu kuu nzi roo yoo Jordán, ne mbez Juan lo re men, ndoblo laa re men net went ne tsee zha mod went kuu nak zha, ne gakleyy zha, tsa tuyy Diox re falt zha.

⁴Ne lee kona ngok taxal nzhab Isaí, kuu ngok profet ndala, or nzhab Isaí:Thib zha kuu ndo yubiz nex gab:“Btexkwaa goo xnet Zha Nabee;bxaal goo thib net nali te zha.” [Is. 40:3]

⁵Reta bte ndoblo zhobtse,ne reta yii ne reta lom ndoblo gak nali,ne reta net kuu naral nak ndoblo gak nali,ne lee re net kuu nakap nak tezhobtse,

⁶ne reta men wii Zha Kuu Mtaal Diox Nabee, zha kuu telaa re men lo yalguth. [Is. 40:3-5]

⁷Leettsa mzin re men kuu gakleyy lo Juan, tsa mbez Juan lo re zha: ―¡Goo nak zha kuu nakap nak taxal mbeel! ¿Cho mloo diiz lo goo par zhonn goo lo yalnayii kuu ne Diox yaad?

⁸Bloo goo lee goo mlaaʼa goo re kuu went ne wlipaa mlaa goo mod went kuu nak goo, ne gabt goo lo altaa goo: “¡Leeʼaa nak raz chaan Abraham!” Tak wlipaa na nin lo goo, lee Diox tak tsow, tsa noga re ke ree gak raz chaan Abraham.

⁹Ne lee yeba ndoba xann re ya kuu ndaat xle wen, tsa ga zhay ne ko zhay lo ki.

¹⁰Tsa lee re zha mnaabdiz lo Juan, ne nzhab zha: ―¿Kwan ndoblo nee tsow nee?

¹¹Juan mkab ne nzhab: ―Loka cho goo kuu nap chop xab, btaa goo thibe lo zha kuu napte, ne loka cho goo nap kuu wu, btaa gooy wu zha kuu napte.

¹²Ne noga myaad chop tson zha kuu ntsow kobral temi chaan yezlyu, kuu nzhax lo zha Roma lo Juan, tsa tsowleyy Juan zha, tsa mnaabdiz zha lo Juan, ne nzhab zha: ―Maestr, ¿kwan ndoblo nee tsow nee?

¹³Juan nzhab lo re zha: ―Bnaab goo beeta kuu ndoblo zha kix zha lo goo.

¹⁴Noga chop tson soldad mnaabdiz lo Juan, ne nzhab: ―¿Lee nee kwan ndoblo nee tsow nee? Tsa lee Juan mkab, ne nzhab lo re zha: ―Kibt goo chaan re men lafwers, neeka kekit goo zha kon thib kuu wlit, ne ndoblo wen yo leettsoo goo kon temi kuu nzhax lo goo.

¹⁵Lee re men ngebet naa kwan gak. Ne ntsow zha xgab cha lee Juan nak Crist Kuu Mtaal Diox Nabee.

¹⁶Per lee Juan nzhab lo re zha: ―Na, ntsowleyy goo kon nit, per ditsʼn ndeke tedib zha kuu tsowleyy goo kon Mbi Nayon ne kon ki. Mas nataak zhaʼa nake na, kona neeka korre dits labyid zhaʼa ndoblotʼn xakʼn.

¹⁷Ne nzoʼa ya yaa zha par koo zha paj lo nzob xtil, ne kotsow zha nzob xtil leen loo ta nyetsow nzob xtil, ne lee paj ko zha lo ki kuu thitanax nyuyyt.

¹⁸Tenzhee, ne kwathoz tyen mod mteni Juan re men, ne mndaa Juan kwent Diiz Chul chaan Diox lo re men.

¹⁹Ne noga rey Herodes mkox lo Juan, tak ngok rop Herodes kon Herodías kuu nak tsaal Lip wets Herodes, ne noga mkox Herodes lo Juan, tak mtsow Herodes tedib net re kuu went,

²⁰ne mbint rey Herodes diiz lo Juan, leel tedib kuu mas went mtsow Herodes, mloo Herodes Juan tsib. Jesús ngokleyy (Mt. 3:13‑17; Mr. 1:9‑11)

²¹Ne leettsa ngetsowleyy Juan re men, noga Jesús ngwa ngokleyy, ne leettsa ngeni zha lo Diox lee yibaa mzhaal,

²²ne lee Mbi Nayon mloo taxal thib palom mla dits Jesús, ne koree mloo lo re men, tsa lee thib bos mroo yibaa ne nzhab: ―Lu nak xgann na, kuu kwathoz nke leettsoon ne kwathoz wen nzo leettsoon nen lu. Raz chaan re tey Jesús (Mt. 1:1‑17)

²³Teeka galbtsii liin nap Jesús leettsa mndelo Jesús mndaa Jesús kwent Diiz Chul chaan Diox. Ne lee re men ngwalaaz lee Jesús nak xgann Che,Che xgann Elí,

²⁴Elí ngok xgann Matat,Matat ngok xgann Leví,Leví ngok xgann Melquí,Melquí ngok xgann Jana,Jana ngok xgann Che,

²⁵Che ngok xgann Matatías,Matatías ngok xgann Amós,Amós ngok xgann Nahúm,Nahúm ngok xgann Eslí,Eslí ngok xgann Nagai,

²⁶Nagai ngok xgann Maat,Maat ngok xgann Matatías,Matatías ngok xgann Semeí,Semeí ngok xgann Josec,Josec ngok xgann Judá,

²⁷Judá ngok xgann Joanán,Joanán ngok xgann Resa,Resa ngok xgann Zorobabel,Zorobabel ngok xgann Salatiel,Salatiel ngok xgann Nerí,

²⁸Nerí ngok xgann Melquí,Melquí ngok xgann Adí,Adí ngok xgann Cosam,Cosam ngok xgann Elmadam,Elmadam ngok xgann Er,

²⁹Er ngok xgann Jesús,Jesús ngok xgann Eliezer,Eliezer ngok xgann Jorim,Jorim ngok xgann Matat,

³⁰Matat ngok xgann Leví,Leví ngok xgann Simeón,Simeón ngok xgann Judá,Judá ngok xgann Che,Che ngok xgann Jonám,Jonám ngok xgann Eliaquim,

³¹Eliaquim ngok xgann Meleá,Meleá ngok xgann Mena,Mena ngok xgann Matatá,Matatá ngok xgann Natán,

³²Natán ngok xgann rey David,rey David ngok xgann Isaí,Isaí ngok xgann Obed,Obed ngok xgann Booz,Booz ngok xgann Salmón,Salmón ngok xgann Naasón,

³³Naasón ngok xgann Aminadab,Aminadab ngok xgann Admín,Admín ngok xgann Arní,Arní ngok xgann Esrom,Esrom ngok xgann Fares,Fares ngok xgann Judá,

³⁴Judá ngok xgann Kob,Kob ngok xgann Isaac,Isaac ngok xgann Abraham,Abraham ngok xgann Taré,Taré ngok xgann Nacor,

³⁵Nacor ngok xgann Serug,Serug ngok xgann Ragau,Ragau ngok xgann Péleg,Péleg ngok xgann Heber,Heber ngok xgann Sala,

³⁶Sala ngok xgann Cainán,Cainán ngok xgann Arfaxad,Arfaxad ngok xgann Sem,Sem ngok xgann Noé,Noé ngok xgann Lamec,

³⁷Lamec ngok xgann Matusalén,Matusalén ngok xgann Enoc,Enoc ngok xgann Járed,Járed ngok xgann Mahalaleel,Mahalaleel ngok xgann Cainán,

³⁸Cainán ngok xgann Enós,Enós ngok xgann Set,Set ngok xgann Adán,Adán ngok xgann Diox.