Read Ozolotepec Zapotec Juan 10 Bible Online

Juan 10 - Ozolotepec Zapotec bible

Juan 10

¹Tsa nzhab Jesús: ―Wlipaa na nin, lee zha kuu ndaabt par roo korral chaan re mbak zhiil, sinke ndaab zha thib lad cho liz maa, wann nak zhaʼa.

²Per lee zha kuu ndaab par roo liz maa, zhaʼa nak zha kuu nkenap maa.

³Ne lee zha kuu nkenap roo korral, nxaal zha roo korral lo zha kuu nkenap re mbak zhiil, ne ndaab zha ne mbez zha thib thib mbak zhiil por le mbak zhiil ne lee re mbak zhiil nlebee maa xkiiz zha. Ne ngoo zha maa leen korral.

⁴Ne or ngwaloʼa mroo reta maa, ora ndener zha lo re maa, ne ndeke maa dits zha tak nlebee maa xkiiz zha.

⁵Per os leey thib zha kuu nlebeet maay, nzhonn maa lo zha ne teket maa dits zha, tak nlebeet maa xkiiz zha.

⁶Jesús nzhab kona lo re men, per lee re men myent kuu nlaaz Jesús gab Jesús lo re men. Jesús nak zha kuu wen nkenap re mbak zhiil

⁷Jesús mre nzhab lo re men: ―Wlipaa na nin lo goo: Na nak taxal roo pwert ta ndaab re mbak zhiil.

⁸Reta zha kuu myaad ner nake na, wann nak re zhaʼa, per lee re mbak zhiil mbint mbak zhiil diiz lo re zhaʼa.

⁹Na nak taxal roo pwert, ne lee zha kuu tab roo pwert ree, telaa zha lo re falt chaan zha. Ne gak zha taxal thib mbak zhiil, kuu ndaab ne ndroo ne nyetsal yizh nayee wu.

¹⁰’Lee wann beeta ndyaad wann par lowann wann, par kuth wann ne par luux wann re maa, per lee na ndyalʼn par keno goo yalnaban kuu thitanax.

¹¹Na nak zha kuu wen nkenap re mbak zhiil. Ne lee zha kuu wen nkenap re mbak zhiil, ndaa zha yalnaban chaan zha por re mbak zhiil,

¹²per lee zha kuu nzhax lo por nkenap re mbak zhiil, or ne zha lee mbez ndyaad, nlaa zha re mbak zhiil ne nzhonn zha, tak nagt zhaʼa, zha kuu wen nkenap re mbak zhiil, neeka nagt re maa, maa zha. Tsa lee mbeez nla nzhuth re mbak zhiil, ne nchaats mbeez re maa.

¹³Lee zhaʼa nzhonn zha, tak tsiin nke zha beeta par gax kaa zha, ne ndat leettsoo zha por re mbak zhiil.

¹⁴’Na nak zha kuu wen nkenap re mbak zhiil. Ne taxal nlebee Xutʼn na, ne lee na nlebeen Xutʼn, leeka tata nlebeen re mbak zhiil da, ne noga re maa da nlebee maa na. Ne ndan yalnaban da por re maa.

¹⁶Noga napʼn tedib net maa kuu nagt maa korral ree, ne noga re maaʼa ndoblo yaxin. Tsa gon maa diiz lon, ne yo re maa thibka korral, tsa keno maa thibka zha kuu wen kenap re maa.

¹⁷’Lee Xutʼn nke leettsoo Xutʼn na, tak ndan yalnaban da, par kayaa nay tedib welt.

¹⁸Neeka thib zha gagt kuthʼn, per tan diiz kuth zha na tak tata nlazʼn. Tak napʼn yalnabee par tan yalnaban da, ne napʼn yalnabee par kayaa nay tedib welt. Koree nak kuu mnabee Xutʼn lon tsowʼn.

¹⁹Or mbin re zha Israel re kona, mre zha ngok rol zha tedib welt.

²⁰Kwathoz zha mbez: ―¿Chebee nzhon goo kuu ni zha? Si mbi fyer nzo leettsoo zha ne nzhak naxen yek zha.

²¹Per lee tedib net zha mbez: ―Neeka thib zha kuu nzo mbi fyer leettsoo nit tabaa. ¿Chu, tak tegwe thib mbi fyer ngutlo thib zha syeg? Mkayaat re zha Israel Jesús

²²Tyemp kuu nla yig, lee re zha yez Jerusalén ntsow zha ani chaan gwodoo zha.

²³Ne lee Jesús ndiy lee roo gwodoo ne roo korredor gwodoo, korredor kuu le chaan Salomón.

²⁴Tsa lee re zha Israel mkaltaa re ladta lo Jesús, ne mnaabdiz zha lo Jesús ne nzhab zha: ―¿Asta pol neʼa lo nee naa cho naka, tsa rooy yek nee? ¿Chu lu nak Crist Kuu Mtaal Diox Nabee? Neey lo nee.

²⁵Jesús mkab ne nzhab: ―Niʼa nay lo goo, per nyelaazt goo xkizʼn. Reta kuu ntsowʼn, ntsow nay kon yalnabee chaan Xutʼn, re kona nambi nloo naa cho nakʼn,

²⁶per nyelaazt gooy, tak nagt goo mbak zhiil da, taxal mniʼa na lo goo.

²⁷Lee re mbak zhiil kuu nak mbak zhiil da, nlebee maa xkizʼn, ne nlebeen maa, ne ndeke maa ditsʼn.

²⁸Ne na nda yalnaban kuu thitanax lo re maa, ne thitanax gatht raa maa, ne yent cho tak kib maa lon.

²⁹Tak lee Xutʼn kuu mndaa reta mbak zhiil lon, lee Xutʼn nak kuu mas ney nake reta kwaa, ne yent cho tak kib maa lo Xutʼn.

³⁰Tak lee Xutʼn ne na thibka nak nee.

³¹Tsa lee re zha Israel mre mzhen ke, par kee zhay yek Jesús tedib welt,

³²per lee Jesús nzhab lo re zha: ―Kon yalnabee chaan Xutʼn mtsowʼn re kuu thoz lo re goo, ¿por cho thib re kona nlaaz goo kee goo ke yekʼn?

³³Tsa lee re zha Israel mkab lo Jesús ne nzhab: ―Keet nee ke yeka por re kuu wen kuu mtsowa, lee nee keey yeka por kuu went kuu niʼa. Tak thib mbyi naka, ne leeka lu ntsowa lu taxal Diox.

³⁴Jesús mkab ne nzhab: ―At lo ley chaan goo mbez: “Na ni lee goo nak diox”, nzhab Diox. [Sal. 82:6]

³⁵Ne tak lo xkeets Diox nzhabe gagt gabaa wlite, ne os lee Diox, diox mtob le Diox re zha kuu mkayaa xkiiz Diox.

³⁶¿Chebee mbez goo lon leen mni kuu went, tak nin lee na nakʼn Xgann Diox? Ne lee Diox mlin ne mtaalʼn lo yezlyu ree.

³⁷Os leen ntsowtʼn re kuu ntsow Xutʼn, yelaazt goo na.

³⁸Per os leen ntsow re kuu ntsow Xutʼn, tegal yelaazt goo na, per gwalaaz goo re kuu ntsowʼn, tsa ne goo lee Xutʼn ndo kon na ne lee na ndon kon Xutʼn.

³⁹Ne tedib welt ngwalaaz re zha gaten zha Jesús, per lee Jesús tee mbeche lo re zha.

⁴⁰Mre Jesús tedib welt tedib lad roo yoo Jordán, ta mtsowleyy Juan re men, ne tya myaan Jesús.

⁴¹Ne naroob men ngwa lo Jesús, ne nzhab re men: ―Wlipaa, tegal neeka thib milagr thoz mtsowt Juan, per reta kuu ne Juan kwent chaan mbyi ree wliy.

⁴²Tsa kwaro zha ngwalaaz Jesús tya.