Read Ozolotepec Zapotec Juan 12 Bible Online

Juan 12 - Ozolotepec Zapotec bible

Juan 12

¹Leettsa ndoraa xoop wiz tsin ani Paskw, tsa myaad Jesús yez Betania ta nzo Las kuu lee Jesús mteroban.

²Ne tya mdexkwaa zha thib rtsee par Jesús, lee Mart mloo komid leen yann, ne lee Las nak thib re zha kuu mndob roo mes ndow kon Jesús.

³Tsa lee Mari ndyaadno teeka garol litr perfum kuu chul ndetsi, kuu natexkwaa kon ya kuu le nardo ne kwathoz naape, tsa mloo Mari perfum nii Jesús ne kon yitsek Mari mtekwiiz Mariy. Ne dita leen yuu mndetsii tsii perfum.

⁴Tsa lee Judas Iscariote, thib re zha kuu ngeteed lo Jesús, kuu mtsowa xgab taa Jesús lo re zha kuu nayii ne Jesús, nzhab:

⁵―¿Chebee mdot perfum ree por tson gayoo denario, par gakaa re probe?

⁶Per nzhabt Judas kona tak ntsow Judas xgab re prob, sinke tata nzhab zha tak wann nak zha, ne lee zha natsaal bols temi, ne nlowann zha temi kuu ngoo re zha leen bols.

⁷Tsa nzhab Jesús lo Judas: ―Laaʼa Mari, tak mlotsow Mari perfum ree, tsa chul tetsin leettsa kaats zha na.

⁸Lee re prob thibka nzi zha lo goo, per lee na ndotʼn lo goo thitanax. Lee re ngwleyy kuu nabee lo re zha Israel ngwalaaz zha gaguth Las

⁹Tyen re zha Israel mbin lee Jesús ndo yez Betania, tsa ngwa zha tya, par wii zha Jesús ne par wii zha Las kuu lee Jesús mteroban.

¹⁰Tsa lee re ngwleyy kuu nabee lo re ngwleyy myaan zha re zha diiz kuth zha Las,

¹¹tak por lee Las naroob re zha Israel ngwalaaz Jesús ne mlaa zha re ngwleyy. Jesús mndaab yez Jerusalén (Mt. 21:1‑11; Mr. 11:1‑11; Lc. 19:28‑40)

¹²Ne lee tedib wiza, lee naroob re men kuu ngwa lo ani Paskw, leettsa mbin re zha lee Jesús ndetsin Jerusalén,

¹³tsa mga re zha la yin, ne mroo zha mkayaa zha Jesús, ne nex nzhab re zha: ―¡Aka wen nak Diox! ¡Aka wen nak zha kuu ndyaad kon yalnabee chaan Zha Nabee! ¡Golaa lo zha kuu nak rey lo re zha Israel!

¹⁴Tsa mzal Jesús thib burr yeen ne mke Jesús dits maa, tsa gak kuu mbez lo xkiiz Diox:

¹⁵Tsebt goo zha yez Sión.Wii goo, lee zha kuu nak rey goo ndyaadndob dits thib burr yeen. [Zac. 9:9]

¹⁶Per lee re zha kuu ngeteed lo Jesús, myent zha neeka thib re koree, per bluz leettsa lee Jesús ndya yibaa, tsaraa mtelaaz re zha re kuu ngok, re kuu ndaa xkiiz Diox kwent chaan Jesús.

¹⁷Ne lee re zha kuu ndo kon Jesús, leettsa mrez Jesús Las roo baa, ne mteroban Jesús Las, re zhaʼa mndaa kwent kuu mwii zha mtsow Jesús.

¹⁸Kona lee re men mroo ngwaxiinet Jesús, tak mbin zha re milagr thoz kuu mtsow Jesús.

¹⁹Per lee re fariseo mbez lo re altaa: ―¿Chu ngwiit goo yent kwan tak tsowaa? Reta men ndeke dits zha. Lee chop tson zha gryeg mkwaan Jesús

²⁰Ne xid re zha kuu ngwayol lo Diox lo ani yez Jerusalén, ngwa chop tson zha kuu nak zha gryeg.

²¹Lee re zhaʼa mbig lo Lip, kuu nak zha yez Betsaida, thib yez chaan yezlyu Galilea, ne nzhab re zha lo Lip: ―Nlaaz nee wii nee Jesús.

²²Ora lee Lip ngwa nzhabe lo Ndres ne ngwa rop zha nzhab zhay lo Jesús.

²³Tsa nzhab Jesús lo rop zha: ―Mzina or kuu lee Diox tsow nataak xgann.

²⁴Wlipaa na nin, os lee thib bin nzob xtil yot lo yu ne os leey gathte par lene, thibe yaane ne taate nzob xtil, per os leey yoy lo yu ne lene naroob nzob xtil taay.

²⁵Lee zha kuu nke leettsoo yalnaban chaan teluux zhay, per lee zha kuu nket leettsoo yalnaban chaan lo yezlyu ree, tetsow zhaʼa gan yalnaban kuu thitanax yibaa.

²⁶Os lee thib zha nlaaz tsow rtsin na, ndoblo teke zha ditsʼn, ne loka pa ta ndon no zha kuu ntsow rtsin na ndo tya. Ne lee re zha kuu ntsow rtsin na, lee Xutʼn tsow nataak zhaʼa. Jesús mndaa kwent lee Jesús gath

²⁷’¡Kwathoz nalatt nzo leettsoon nalor! Ne netʼn kwan gapʼn: “Xutʼn, laata riidʼn yalti ree”. ¡Per par kona ndyalʼn!

²⁸Xutʼn, btsow nataak leʼa. Tsa ora mbin na thib bos kuu mroo lobee, kuu nzhab: ―Mtsow nataaka nay, ne tetsow nataak nay tedib welt.

²⁹Ne mbin re zha kuu nzi tya bosa, tsa nzhab re zha, bi ngundiiy, per lee tedib net zha nzhab: ―Thib mandad chaan Diox mni lo zha.

³⁰Tsa nzhab Jesús lo re men kuu nzi tya: ―Mniit bosa por na, sinke por goo mniy.

³¹Ne nal nak or kuu naab Diox kwent lo re men yezlyu ree, ne nal koo Diox Maxuuy kuu nabee lo yezlyu ree.

³²Per leettsa roban na, tsa tsowʼn lee re men yelaaz na.

³³Ne tenzhee mod mndaa Jesús kwent naa xomod gath Jesús.

³⁴Lee re men mkab lo Jesús ne nzhab: ―Nee ne lee lo ley kuu mkee Moisés mbez, lee Crist Kuu Taal Diox Nabee, thitanax ban zha ne gatht zha. ¿Kona chebee mbeza lee Zha Kuu Mzin Ngok Men ndoblo roban? Ne ¿cho nak Zha Kuu Mzin Ngok Men?

³⁵Tsa nzhab Jesús lo re zha: ―Nal bee ndo xni lo re goo telut. Bte goo lo xni nalt raa kuu bee ndobke xni, tsa tsint yalkow chatta lo goo taxal thib kuu ngebeta goo, tak lee zha kuu ndiy lo yalkow, net zha pa nda zha.

³⁶Gwalaaz goo xni nalt raa bee ndobkey lo goo, tsa gak goo zhiinn zha kuu nak xni. Or ngwalo nzhab Jesús re koree, tsa nda Jesús ne mkaslo Jesús lo re men. Ngwalaazt re zha Israel Jesús

³⁷Ne tegal mtsow Jesús re milagr thoz lo re zha, per ngwalaazt re zha Jesús,

³⁸tak tabaa mrolo kuu mkee profet Isaí lo re men, leettsa nzhab profet:Zha Nabee, ngwalaazt re men xkiiza kuu mndaa nee kwent lo re men, tegal mtsowa re kuu thoz lo re zha ngwalaazt zha lu. [Is 53:1]

³⁹Ngwalaazt re zha Jesús, tak noga mkee Isaí:

⁴⁰Diox mtekow ngutlo re men, ne mtsow nad Diox leettsoo re men, tsa gagt wii zha ne tsa gagt yen zha xkiiz Diox.“Tsa bretabt zha lon, ne tegwetʼn zha”. [Is. 6:10]

⁴¹Nzhab Isaí re koree, tak mwii Isaí yalnabee chaan Jesús, kona mndaa Isaí kwent chaan Jesús.

⁴²Ne tegal tatay, kwathoz re zha Israel ngwalaaz Jesús, ne asta chop tson re gobyern ngwalaaz Jesús, per nzeb re zha gab zhay, tak nzeb zha ne zha re fariseo, tak os lee zha gab zhay, tsa lee re fariseo koo zha ta nkaltaa re zha nteed zha xkiiz Diox.

⁴³Tak mas nlaaz zha tsow nataak re men zha, nake tsow nataak Diox zha. Por xkiiz Jesús naab Diox kwent lo re men

⁴⁴Tsa nex nzhab Jesús: ―Loka cho nyelaaz na, nyelaazt zha beeta na, sinke noga Xutʼn kuu mtaalʼn nyelaaz zha.

⁴⁵Ne loka zha kuu ngwii lon noga ngwii zha zha kuu mtaalʼn.

⁴⁶Na nak taxal xni, ne ndyalʼn lo yezlyu ree, tsa loka zha kuu yelaaz na yaant lo yalkow.

⁴⁷Per lee zha kuu nzhon xkizʼn, ne nzhont diize, nat naab kwent lo zha, tak ndyaltʼn par naabʼn kwent lo re men, sinke leen ndyalʼn par telaan re men lo yalguth.

⁴⁸Lee zha kuu nyelaazt na ne ntsowt re kuu nin, napa zhaʼa cho naab kwent lo zha, leeka re diiz kuu mnin naab kwent lo zha wiz bluz.

⁴⁹Tak mnitʼn kuu nlazʼn; sinke re kuu mnabee Xutʼn kuu mtaalʼn, kona mnin.

⁵⁰Ne, nen lee kuu mnabee Xutʼn nak, tsow re men gan yalnaban kuu thitanax. Kona reta kuu nin, ni nay taxal mnabee Xutʼn lon.