Read Ozolotepec Zapotec Juan 14 Bible Online

Juan 14 - Ozolotepec Zapotec bible

Juan 14

¹’Gagt chop xgab goo, gwalaaz goo Diox ne gwalaaz goo na.

²Lee liz Xutʼn kwathoz yuu ta yo men nzo; ne os leey nagte tata, ganit nay lo goo. Kona lee nal ndyan ndatexkwaan ta yo goo.

³Ne os leen ndyan ne ndatexkwaan ta yo goo, bren tedib welt ne yaadxin goo, tsa no goo yo goo ta yoon.

⁴Neʼa goo pa ndyan, noga ne goo net.

⁵Tsa lee Mach nzhab lo Jesús: ―Zha nabee, net nee pa ndyaʼa, ne ¿xomod ne nee net tsa?

⁶Lee Jesús mkab ne nzhab: ―Na nak taxal net, na nak kuu wli, ne na nak yalnaban. Ne neeka thib men tsint lo Xutʼn, os nagte por na.

⁷Os lee goo nlebee goo na, noga nlebee goo Xutʼn; ne nlebeeʼa goo Xutʼn, tak mwiiʼa goo Xutʼn.

⁸Tsa nzhab Lip lo Jesús: ―Zha nabee, beeta bloo Xuta lo nee, ne kon kona wena yo leettsoo nee.

⁹Tsa lee Jesús nzhab: ―Lip, ndaʼa wiz ndon lo re goo, ne ¿chu terka lebeeʼa na? Loka zha kuu ngwii lon, mwiiʼa zhaʼa lo Xutʼn; ne ¿chebee mbeza lon “bloo Xuta lo nee”?

¹⁰¿Chebee nyelaazta lee Xutʼn nzo leettsoon ne lee na nzon leettsoo Xutʼn? Lee re kuu nin lo goo, nit nay por kwent chaan da, sinke lee Xutʼn kuu thibka ndo kon na, ntsow Xutʼn rtsin Xutʼn.

¹¹Gwalaaz goo lee na nzon leettsoo Xutʼn, ne lee Xutʼn nzo leettsoon. Ne os lee goo nyelaazt gooy, por re kuu ntsowʼn gwalaaz goo kuu nin.

¹²Wlipaa na nin, loka zha kuu nyelaaz na, no zha tetsow zha re kuu ntsowʼn, ne masraa kuu thoz tsow zha, tak lee na ndyan lo Xutʼn.

¹³Ne reta kuu naab goo lo Xutʼn por len, tetsow nay, tsa gak nataak Xutʼn por na.

¹⁴Os naab goo thib kuu por len, tetsow nay. Jesús nzhab taal Mbi Nayon

¹⁵’Os lee re goo nke leettsoo goo na, bin goo diiz re kuu mnabeen lo goo.

¹⁶Ne lee na nal naabʼn lo Xutʼn, tsa taal Xutʼn Mbi Nayon, par tsow ayud goo ne thibka to lo goo,

¹⁷ne Mbi ree nak Mbi Nayon kuu wli ne gagt kayaa re men yezlyu Mbi ree, tak nloot Mbi lo zha ne neeka nlebeet zha Mbi, per lee re goo nlebee goo Mbi, tak lo goo ndo Mbi, ne thitanax ban Mbi leettsoo goo.

¹⁸’Latʼn goo taxal btab, bren tedib welt tsa ton kon re goo.

¹⁹Telutta ne lee re men yezlyu ree wiit raa na; per lee re goo tewii goo na ne taban goo, tak lee na naban na.

²⁰Ne wiza lee re goo ne, lee na nzon leettsoo Xutʼn, ne lee re goo nzo leettsoon, ne lee na nzo leettsoo goo.

²¹Ne loka zha kuu nkayaa re kuu nabeen ne nzhon zha diize, zhaʼa nak zha kuu wlipaa nke leettsoo na; ne lee zha kuu nke leettsoo na nke leettsoo Xutʼn zhaʼa ne noga na nke leettsoon zhaʼa, ne lon na lo zha, tsa mas wen lebee zha na.

²²Tsa lee Judas (kuu nagt Judas Iscariote), mnaabdiz lo Jesús ne nzhab: ―Zha Nabee, ¿chebee looʼa lu lo nee, ne lee lo re zha yezlyu loota lu?

²³Lee Jesús mkab ne nzhab: ―Lee zha kuu nke leettsoo na nzhon zha diiz kuu nabeen; ne lee Xutʼn nke leettsoo Xutʼn zhaʼa, ne lee rop nee Xutʼn yaad nee yo nee kon zhaʼa.

²⁴Lee zha kuu nket leettsoo na, nzhont zhaʼa diiz lon. Lee re diiz kuu ngeyon goo ngenin, nagte xkizʼn, leey nak xkiiz Xutʼn kuu mtaalʼn.

²⁵’Nal ndon lo goo ngenin re koree lo goo,

²⁶per lee Mbi Nayon kuu taal Xutʼn par kenap re goo kwent chaan da, lee Mbi loo reta kuu lo goo, ne tsow Mbi telaaz goo reta kuu mnin lo goo.

²⁷’Lee na ndyan, per nlazʼn wen kwin goo, ne tsowʼn tsa wen kwin goo, per tsowt nay taxal ntsow re men yezlyu reey. Yat leettsoo goo ne neeka tsebt goo.

²⁸Mbina goo nin, lee na ndya ne bren yalʼn tedib welt. Os lee goo wlipaa nke leettsoo goo na, kwathoz naley gayoo leettsoo goo mbin goo lee na ndya lo Xutʼn, tak masraa nataak Xutʼn nake na.

²⁹Ne nal nin re koree lo goo, tsa leettsa gake yelaaz goo na.

³⁰’Telutta tedizʼn lo goo, tak ndyaada Maxuuy kuu nabee lo yezlyu ree. Ne tegal neeka lut yalnabee napt Maxuuy par nabee Maxuuy lon,

³¹per tabaa ndoblo gake. Tsa lee re men yezlyu ree ne lee na nke leettsoon Xutʼn, ne ntsowʼn re kuu mtaal Xutʼn na tsowʼn. Tsa nzhab Jesús: ―Gwateli goo nda goo reʼaa.