Read Ozolotepec Zapotec Juan 18 Bible Online

Juan 18 - Ozolotepec Zapotec bible

Juan 18

¹Leettsa ngwalo mndediz Jesús lo Diox, tsa mroo Jesús kon re zha kuu ngeteed lo Jesús, ne ndano Jesús re zha tedib lad roo bte kuu le Cedrón. Tya nak leen thib alo. Ne tya mndaab Jesús kon re zha kuu ngeteed lo Jesús.

²Noga Judas kuu mndaa Jesús lo re zha nak tsiin nlebee tya, tak tyen welt mrin Jesús kon re zha kuu ngeteed lo Jesús tya.

³Tsa mzin Judas kon thiban soldad ne kon tyen zha kuu nkenap gwodoo; ne re ngwleyy kuu nabee lo re ngwleyy kon re fariseo mtaal re zhaʼa, ne ne zha yiib, kandil ne yerbel.

⁴Per neʼa Jesús naa kwan rid Jesús, tsa mroo Jesús ne nzhab Jesús lo re zha: ―¿Cho nkwaan goo?

⁵Lee re zha mkab ne nzhab: ―Lee nee nkwaan Jesús zha kuu nak zha yez Nazaret. Lee Jesús nzhab lo re zha: ―Na nak Jesús. Ne no Judas kuu mndaa Jesús ndyaad kon re zhaʼa.

⁶Ne leettsa nzhab Jesús lo re zha, na nak Jesús, tsa mre ardits re zha ne ngob zha lo yu.

⁷Tsa mre Jesús mnaabdiz lo re zha ne nzhab: ―¿Cho nkwaan goo? Lee re zha mre mkab ne nzhab: ―Lee nee nkwaan Jesús zha yez Nazaret.

⁸Tsa nzhab Jesús lo re zha: ―Niʼa na lo goo, na nak Jesús. Os lee goo nkwaan goo na, laa goo bi re zha ree.

⁹Koree ngok, tsa mrolo kuu nzhab Jesús, Xutʼn lee re zha kuu mndaaʼa lon, neeka thib zha mluxt.

¹⁰Tsa lee Simún Pey nkeno thib espad, ne mloo Pey espad ne mchuug Pey nza ban thib zha kuu lee Malco kuu nak mos ngwleyy kuu nabee lo reta ngwleyy.

¹¹Tsa nzhab Jesús lo Pey: ―Pey blotsow espada. Os lee Xutʼn nlaaz riidʼn yalti, ¿chu nda leettsooʼa riidt nay? Mndeno zha Jesús lo ngwleyy kuu nabee lo reta ngwleyy (Mt. 26:57‑58; Mr. 14:53‑54; Lc. 22:54)

¹²Tsa lee re soldad, re zha kuu nabee lo re soldad ne re polisi kuu nkenap gwodoo, mzhen re zha Jesús ne mliib zha Jesús.

¹³Tsa ner ndano zha Jesús liz Anás, tak lee Anás nak xutsaap Caifás kuu nak ngwleyy kuu nabee lo reta ngwleyy liina.

¹⁴Ne leeka Caifás nak kuu nzhab lo re zha Israel, mas wen gath thibka zha por dita yez, nake gath reta zha yez. Pey nzhab nlebeet Pey Jesús (Mt. 26:69‑70; Mr. 14:66‑68; Lc. 22:55‑57)

¹⁵Tsa lee Simún Pey ne thib zha kuu ngeteed lo Jesús mndeke dits Jesús. Tak lee tedib zha kuu ngeteed lo Jesús nlebee zha ngwleyy kuu nabee lo reta ngwleyy, kona mndaab zha kon Jesús lee roo yuu.

¹⁶Per lee Pey myaan lee dits pwert, tsa lee zha kuu mteed lo Jesús kuu nlebee ngwleyya, mni lo mos got kuu nkenap roo pwert, tsa taa ngot diiz tab Pey.

¹⁷Tsa lee ngot kuu nkenap roo pwert nzhab lo Pey: ―¿Chu nota nak thib re zha kuu ngeteed lo mbyi baa? Lee Pey mkab lo ngot ne nzhab: ―Aha not na.

¹⁸Ne tak kwathoz nal, tsa lee re mos ne re polisi kuu nkenap gwodoo mtee bel, ne ngebiz re zha ne noga Pey ndo lo re zha ngebiz. Jesús ngwato lo ngwleyy kuu nabee lo reta ngwleyy (Mt. 26:59‑66; Mr. 14:55‑64; Lc. 22:66‑71)

¹⁹Tsa lee ngwleyy kuu nabee lo reta ngwleyy mndelo mnaabdiz lo Jesús, kwent chaan re zha kuu mteed lo Jesús ne kwent leyy kuu nloo Jesús.

²⁰Lee Jesús mkab ne nzhab: ―Na ndedizʼn delant lo reta men, thibka nloon lo re men ta nkaltaa zha nteed zha xkiiz Diox, ne roo gwodoo ta nkaltaa reta zha Israel, neeka thib kuu mlootʼn lo re men xgaatsta.

²¹¿Chebee lon naabdiza? Bnaabdiz lo re zha kuu mbin kuu mnin. Re zhaʼa tak ne naa kwan nzhapʼn.

²²Or nzhab Jesús kona, tsa lee thib zha kuu nkenap gwodoo mkaan yaa lo Jesús ne nzhab: ―¿Chu tabaa nkaba lo ngwleyy kuu nataak?

²³Lee Jesús mkab ne nzhab: ―Os mnin thib kuu mal, bne lon naa kwan kuu mal mnin; per os kuu wli mnin, ¿chebee nkee luy yekʼn?

²⁴Tsa naliibka Jesús mtaal Anás Jesús lo Caifás kuu nak ngwleyy kuu nabee lo reta ngwleyy. Pey nzhab tedib welt nlebeet Pey Jesús (Mt. 26:71‑75; Mr. 14:69‑72; Lc. 22:58‑62)

²⁵Ne lee Pey ngebizka lo ki tya, tsa mnaabdiz zha lo Pey ne nzhab zha: ―¿Chu nota nak thib re zha kuu ngeteed lo mbyi baa? Tsa lee Pey mkab ne nzhab: ―Not na.

²⁶Tsa mnaabdiz thib mos kuu nke tsiin lo ngwleyy kuu nataaka lo Pey ne nzhab mos: ―¿Chu lut kuu ndo leen alo kon Jesús? Mosa nak zha liz zha kuu mchuug Pey nza.

²⁷Tsa lee Pey nzhab tedib welt, nlebeet Pey Jesús, ne oraaka lee ngite mrez. Jesús ngwato lo Pilat (Mt. 27:1‑2, 11‑14; Mr. 15:1‑5; Lc. 23:1‑5)

²⁸Tsa mloo zha Jesús liz Caifás, ne ndano zha Jesús roo yuulow, ta ndob zha kuu nabee ne tak ndeyeniʼa yezlyu, kona mndaabt re zha Israel leen yuulow, tsa nambika zha ley lo zha, tsa tak wu zha rtsee chaan Paskw.

²⁹Tsa mroo Pilat, ne nzhab Pilat lo re zha: ―¿Cho kwent nkeki goo mbyi ree?

³⁰Tsa mkab re zha, ne nzhab zha: ―Os gagagt zha ree zha nakap, gayaadnot nee zha loʼa.

³¹Tsa nzhab Pilat lo re zha: ―Bteno goo zha, bnaab goo kwent lo zha taxal nzhab lo ley chaan goo. Tsa lee re zha mkab ne nzhab: ―Lee re nee zha Israel, napt nee yalnabee par kuth nee thib men.

³²Tata nzhab zha, tsa ngok kuu nzhab Jesús, leettsa mndaa Jesús kwent naa xomod gath Jesús.

³³Per lee Pilat mre mndaab leen yuulow, ne mrez Pilat Jesús ne mnaabdiz Pilat lo Jesús ne nzhab Pilat: ―¿Chu lu nak rey chaan re zha Israel?

³⁴Lee Jesús mkab ne nzhab: ―¿Chu naabdiza koree por lu, o tak tedib net zha ney loʼa?

³⁵Tsa lee Pilat mkab ne nzhab: ―¿Chu zha Israel nakʼn? Lee re tawlaza ne re ngwleyy kuu nabee lo re ngwleyy mndaaʼa lon. ¿Kwan mtsowa?

³⁶Lee Jesús mkab ne nzhab: ―Nagt lo yezlyu ree ta nabeen, os lo yezlyu ree gagak ta nabeen, tsa lee re zha kuu nak zha da, gayo zha ne galaat zha na lo re tawlazʼn. Per lee ta nabeen nagte lo yezlyu ree.

³⁷Tsa lee Pilat nzhab lo Jesús: ―¿Mbay rey naka tsa? Tsa lee Jesús mkab ne nzhab: ―Wli kuu neʼa, rey nakʼn. Par kona ngolʼn ne par kona ndyalʼn lo yezlyu ree; par tan kwent kuu wli lo re men. Ne reta zha kuu nyelaaz kuu wli nzhon zha diiz xkizʼn.

³⁸Tsa nzhab Pilat lo Jesús: ―¿Kwan nak kuu wli? Lee re men mnaab gath Jesús (Mt. 27:15‑31; Mr. 15:6‑20; Lc. 23:13‑25) Or ngwalo mnaabdiz Pilat koree, tsa mroo Pilat ne mni Pilat lo re zha Israel tedib welt, ne nzhab Pilat: ―Neeka thib kuu went mtsowt mbyi ree.

³⁹Per lee re goo nap goo costumr, telaan thib zha kuu nzo tsib lo ani Paskw. ¿Chu nlaaz goo telaan zha kuu nak rey chaan re zha Israel?

⁴⁰Tsa reta zha mre nzhab: ―¡Telaata zha baa! ¡Barrabás btelaa! Ne Barrabás nak thib wann.