Read Ozolotepec Zapotec Juan 19 Bible Online

Juan 19 - Ozolotepec Zapotec bible

Juan 19

¹Tsa ndano Pilat Jesús, ne mnabee Pilat mdin zha Jesús.

²Ne lee re soldad mdexkwaa thib koron kon yits ne mtob re soldade yek Jesús, ne mtegok zha Jesús thib lar kuu nane na.

³Tsa mbig re zha lo Jesús ne nzhab zha: ―¡Kuubidoo rey chaan re zha Israel! Ne mkaan yaa zha kwat Jesús.

⁴Tsa lee Pilat mre mroo tedib welt, ne nzhab lo re zha: ―Wii goo, mloon zha tsa ne goo, neeka thib kuu mal mtsowt zha.

⁵Ne ndob koron yitsa yek Jesús ne nok Jesús lar naneʼa mroo Jesús. Tsa lee Pilat nzhab lo re men: ―¡Wii goo, lee zha ndo nzhee!

⁶Leettsa mwii re ngwleyy kuu nabee lo re ngwleyy ne re soldad kuu nkenap gwodoo lo Jesús, ora mrez re zha ne nzhab: ―¡Bkee zha lo kruz! ¡Bkee zha lo kruz! Tsa nzhab Pilat lo re zha: ―Bzhen goo zha ne bkee goo zha lo kruz, tak lee na mzaltʼn neeka thib kuu went kuu mtsow mbyi ree.

⁷Per lee re zha Israel mkab ne nzhab: ―Lee re nee nap nee thib ley, ne lee lo ley chaan nee mbez ndoblo gath zha, tak ni zha lee zha nak Xgann Diox.

⁸Or mbin Pilat kona masraa mzeb Pilat.

⁹Tsa mre Pilat mndaab leen yuulow tedib welt, ne nzhab Pilat lo Jesús: ―¿Cho zha naka? Per lee Jesús mkabt lo Pilat.

¹⁰Tsa nzhab Pilat: ―¿Chebee nkabta lon? ¿Chu neta napʼn yalnabee par keen lu lo kruz ne napʼn yalnabee par telaan lu?

¹¹Tsa lee Jesús mkab ne nzhab: ―Gagt nabeeʼa, os lee Diox gataat yalnabee loʼa; per masraa falt nap zha kuu mndaan loʼa nake lu.

¹²Ne desde ora mkwaan Pilat mod par gatelaa Pilat Jesús; per lee re zha Israel mre mrez ne nzhab: ―¡Os leeʼa telaaʼa zha baa, nagta amig zha kuu nabee Roma! ¡Tak loka zha kuu mbez nak rey, zhaʼa nzhak zha kuu nayii ne zha kuu nabee dita ta nabee Roma!

¹³Or ngwalo mbin Pilat kona; tsa mnabee Pilat mloo zha Jesús par lee ne mndob Pilat ta nyetob Pilat naab Pilat kwent lo re men, thib lee ta natexkwaa kon thib lo ke; ne lee diiz hebreo ley Gabata.

¹⁴Teeka ndrol wiz ngok koree, wiz kuu ndelo zha ndexkwaa zha re kuu par ani Paskw. Tsa nzhab Pilat lo re zha Israel: ―¡Lee rey goo baa!

¹⁵Per lee re zha mkab nzhab: ―¡Ndoblo gath zha! ¡Ndoblo gath zha! ¡Bkee zha lo kruz! Lee Pilat nzhab lo re zha: ―¿Chu rey goo nlaaz goo keen lo kruz? Tsa lee re ngwleyy kuu nabee lo re ngwleyy, mkab ne nzhab: ―¡Napt nee tedib rey, beeta César kuu nabee Roma nak rey nee!

¹⁶Tsa mndaa Pilat Jesús lo re zha, tsa kee zha Jesús lo kruz, ne mzhen zha Jesús ndano zha Jesús. Mkee zha Jesús lo kruz (Mt. 27:32‑44; Mr. 15:21‑32; Lc. 23:26‑43)

¹⁷Ne mbe Jesús kruz Jesús asta thib ta le tsidth yek men, (ne lee diiz Hebreo ley Gólgota).

¹⁸Tya mkee zha Jesús lo kruz kon techop zha, mkee zha thibga kad lad cho Jesús tsa myaan Jesús xtow rop zha.

¹⁹Tsa mnabee Pilat mkee zha thib letr yek kruz, kuu nzhab: “JESÚS ZHA NAZARET, REY CHAAN RE ZHA ISRAEL”.

²⁰Kwathoz re zha Israel mlab kuu mkee zha yek kruz, tak gax yez Jerusalén nak ta mkee zha Jesús lo kruz, ne lee letr mkee zhay kon diiz Hebreo, kon diiz Latín ne kon diiz gryeg.

²¹Tsa lee re zha Israel ne re ngwleyy kuu nabee lo re ngwleyy; nzhab lo Pilat: ―Keeta: “Rey chaan re zha Israel”, sinke bkee: “Zha kuu mbez nak rey chaan re zha Israel”.

²²Per lee Pilat mkab ne nzhab: ―Kuu mkeen, mkeeʼa nay ne tabaaka yaane.

²³Bluz or ngwalo mkee re soldad Jesús lo kruz, tsa mzhen re zha xab Jesús, ne mtsow zhay thap le, ne thibga ley mkaa thibga soldad. Ne noga mzhen zha tedib xab Jesús, kuu nak thib lar kuu asta yek ne asta xann yent pa nadibe.

²⁴Tsa nzhab re soldad lo re altaa zha: ―Chatta lee lar ree, mas wen kooʼaa swert, tsa naa choʼa diinne. Ne tata ngok kuu nzhab lo xkiiz Diox: “Mdid zha xabʼn lo re zha, ne mloo zha swert dits xabʼn”. [Sal. 22:18] Ne tata mtsow re soldad.

²⁵Ne gax lo kruz ndo xnaa Jesús, bel xnaa Jesús, Mari tsaal Cleofas ne Mari Magdalen.

²⁶Ne or mwii Jesús lo xnaa Jesús, ne leeka tya ndo zha kuu mteed lo Jesús zha kuu kwathoz nke leettsoo Jesús, tsa nzhab Jesús lo xnaa Jesús: ―Lee xganna baa.

²⁷Ne oraaka nzhab Jesús lo zha kuu ngeteed lo Jesús: ―Lee xnaaʼa baa. Ne desde tsyatha lee zha kuu mteed lo Jesús mkayaa xnaa Jesús lize. Yalguth chaan Jesús (Mt. 27:45‑56; Mr. 15:33‑41; Lc. 23:44‑49)

²⁸Leettsa ngwalo mriid re koree, neʼa Jesús lee re kuu nke lo xkeets Diox kwent Jesús ngwaloʼa ngok, ne par yelo gak re kuu nzhab lo xkeets Diox, tsa nzhab Jesús: ―Nzheek leettsoon.

²⁹Ne tya ndo thib jar kuu tse nzo xit ub kuu ni; tsa mtenit zha thib le zhiil leen xit uba, ne mtob zhay yek thib lee ya kuu le hisopo, ne mtob zhay roo Jesús.

³⁰Tsa ngwii Jesús xit ub kuu niʼa ne nzhab Jesús: ―¡Retay ngwaloʼa ngok! Ora mkiits yek Jesús ne nguth Jesús. Thib soldad mtsib lans cho Jesús

³¹Re koree ngok wiz kuu ndelo zha ndexkwaa zha kuu wu zha lo ani Paskw, ne nlaazt re zha Israel yaan re kwerp lo kruz, wiz sabd kuu nzhool re zha Israel lo Diox, tak lee wiza nak thib wiz ro lo re zha Israel, kona mnaab re zha lo Pilat, tsa nabee Pilat yakiits zha nii re yon zha kuu nke lo kruz ne la zha re kwerp re zhaʼa lo kruz.

³²Tsa lee re soldad ngwa mdiizts nii rop zha kuu mke lo kruz cho Jesús.

³³Per or mbig re zha lo Jesús, mwii zha ngutha Jesús, kona mdiizts zha nii Jesús:

³⁴Per lee thib re soldad mtsib thib le ya roo leettsoo Jesús ne ora mroo ren ne nit leettsoo Jesús.

³⁵Ne na nak zha kuu mwii re koree ne ndan kwente, ne wli kuu ndan kwent; ne nen wli kuu mwiin ne kuu ndan kwent; tsa no goo yelaaze.

³⁶Ne re koree ngok, tsa ngok re kuu nke lo xkiiz Diox; kuu nzhab: “Kiizt zha neeka thib tsidth zha”. [Sal. 34:20]

³⁷Ne lee tedib ta nzhab: “Wii re zha lo zha kuu mtsib zha thib le ya roo leettsoo”. [Zac. 12:10] Mkaats zha Jesús (Mt. 27:57‑61; Mr. 15:42‑47; Lc. 23:50‑56)

³⁸Ngwalo mriid re koree, tsa lee Che zha yez Arimatea, mnaab lo Pilat, tsa taa Pilat diiz gwe Che kwerp Jesús. Noga Che ree nak thib zha kuu mteed lo Jesús, per xgaatsta nteed zha, tak nzeb zha ne zha re zha Israel. Tsa mndaa Pilat diiz lo Che, tsa ngwa Che ne mbe Che kwerp Jesús.

³⁹Ne noga ngwa Nicodemo kuu ngwa gwatediz kon Jesús thib yaal, ne ngwano Nicodemo teeka galbtsii kil perfum kuu chul ndetsi, kuu natexkwaa kon thib lo ya kuu le mirra, ne kon thib lo ya kuu le áloe.

⁴⁰Tsa lee Che rop Nicodemo mbe kwerp Jesús, ne mchiix zha kwerp Jesús kon lar kuu ndo perfum kuu chul ndetsi, taxal ntsow re zha Israel leettsa nkaats zha thib thebol.

⁴¹Ne leeka ta mkee zha Jesús lo kruz, ndob thib wert, ne leen werta ndob thib baa kuu kub, kuu neeka thib zha ter yo.

⁴²Ne tya mloo rop zha kwerp Jesús, tak gax tya ndob baa, ne tak mera telo wiz sabd kuu nzhool re nee zha Israel lo Diox.