Read Ozolotepec Zapotec Juan 3 Bible Online

Juan 3 - Ozolotepec Zapotec bible

Juan 3

¹Ngoo thib mbyi kuu le Nicodemo kuu nak fariseo, ne lee mbyiʼa nak thib zha kuu nataak lo re zha Israel.

²Thib btsi ngwa zha lo Jesús ne nzhab zha: ―Maestr, nee ne lee Diox mtaala lo nee, tak yent cho tak tsow re milagr thoz kuu ntsowa, os lee Diox ndot kon lee zha.

³Tsa nzhab Jesús lo zha: ―Wlipaa na nin loʼa, loka cho galt tedib welt, gagt tab zha ta nabee Diox.

⁴Tsa mnaabdiz Nicodemo, ne nzhab zha: ―¿Xomod tak gal men tedib welt leettsa ngozha men? ¿Chu tak tab men leettsoo xnaa men ne gal men tedib welt?

⁵Lee Jesús nzhab lo zha: ―Wlipaa na nin loʼa, os galt zha leen nit ne kayaat zha Mbi Nayon chaan Diox, gagt tab zha ta nabee Diox.

⁶Lee zha kuu nzhal lo men, men nak zha, ne lee zha kuu nkayaa Mbi Nayon leen leettsoo zha, taxal Mbi Nayon nak zha.

⁷Tsegeyt leettsooʼa tak nin loʼa: “Ndoblo gala tedib welt.”

⁸Lee mbi nzhax mbi loka pa nlaaz mbi, ne tegal nzhona nzhaxe, per neta naa pa ndyaade ne neeka neta naa pa nday. Tbaa nak re zha kuu nkayaa Mbi Nayon chaan Diox leettsoo.

⁹Lee Nicodemo mre mnaabdiz lo Jesús ne nzhab: ―¿Xomod tak gak re koree?

¹⁰Tsa nzhab Jesús lo Nicodemo: ―¿Lu nak maestr lo re zha Israel, ne xomod nyenta koree?

¹¹Wlipaa na nin loʼa, nee ndediz nee kuu ne nee, ne ndaa nee kwent kuu mwii nee, per lee re goo nyelaazt goo re kuu nii nee.

¹²Ne os lee goo nyelaazt goo re kuu yezlyu ree kuu ndan kwent lo goo, ¿xomod yelaaz goo os kuu yibaa tan kwent lo goo?

¹³’Neeka thib men ter ya yibaa, sinke beeta zha kuu mroo yibaa ne mla lo yezlyu ree, ne lee zha kuu ntethʼn loʼa nak na, Kuu Mzin Ngok Men.

¹⁴Ne leeka taxalka mkee Moisés mbeel lo ya yubiz, tataka kee zha na, Kuu Mzin Ngok Men lo ya,

¹⁵tsa reta zha kuu yelaazʼn, tsow zha gan yalnaban kuu thitanax. Nke leettsoo Diox re men yezlyu ree

¹⁶Ne tak kwathoz mke leettsoo Diox reta men kuu nzi lo yezlyu ree, kona mtaal Diox thibka Xgann Diox kuu nkeno Diox myaad lo yezlyu ree, ne lee zha kuu yelaaz Xgann Diox, gatht zha, sinke keno zha yalnaban kuu thitanax.

¹⁷Tak mtaalt Diox Xgann Diox lo yezlyu ree, par naab Diox kwent lo re men ne par teti Diox re men, sinke mtaal Diox Xgann Diox, tsa por Xgann Diox tsow re men gan yalnaban kuu thitanax.

¹⁸Ne lee zha kuu yelaaz Xgann Diox, naabt Diox kwent lo zhaʼa, per lee re zha kuu yelaazt Xgann Diox wlipaa mnaaba Diox kwent lo zhaʼa, tak ngwalaazt zha Xgann Diox kuu thibka lo Diox.

¹⁹Ne re zha kuu yelaazt Xgann Diox, mnaaba Diox kwent lo re zhaʼa, tak leettsa myaad zha kuu nak xni lo yezlyu ree, mas myow leettsoo re men yalkow nake xni, tak pur kuu went ntsow zha.

²⁰Reta zha kuu ntsow kuu went, nayii zha ne zha zha kuu nak xni, ne mbigt zha lo xni, tsa loot re kuu went kuu ntsow zha.

²¹Per lee re zha kuu ndeke dits kuu wli, mbig zha lo xni, tsa loo lee re kuu ntsow zha nak kuu nlaaz Diox. Juan mre mndaa kwent chaan Jesús tedib welt

²²Bluz leettsa ngwalo nzhab Jesús koree, tsa mroo Jesús kon re zha kuu ngeteed lo Jesús yez Jerusalén, ne ngwa Jesús yezlyu Judea, tya mlet re zha chop tson wiz, ne mtsowleyy zha re men.

²³Ne noga Juan ngetsowleyy re men xlen, kuu le Enón, gaxta thib ta le Salim, tak tya nzo naroob nit ne lee re men nya lo Juan, ne ntsowleyy Juan re zha.

²⁴Re koree ngok, leettsa ter ko zha Juan tsib.

²⁵Per lee chop tson zha kuu ngeteed lo Juan mndelo mbyodiz kon thib zha Israel, kwent chaan xomod gak nambi men lo Diox,

²⁶tsa myaad zha mnaabdiz zha lo Juan ne nzhab zha: ―Maestr, lee zha kuu mndo rop goo roo yoo Jordán, zha kuu mndaaʼa kwent lo nee, nal lee zha ngetsowleyy re men, ne reta men nya lo zha.

²⁷Tsa lee Juan nzhab lo re zha: ―Neeka thib zha gagt kayaa thib kwaa os lee Diox taate lo zha.

²⁸At mbin goo kwathoz nambi mnin, nagtʼn Crist Kuu Mtaal Diox Nabee, lee na nak beeta thib zha kuu mtaal Diox ndener lo zha.

²⁹Tak lee lo thib fandan, lee mbyi kuu nden yaa nzaa, nak kuu tseya kon nzaa, ne lee amig mbyi kuu tseyaʼa ndo tya, ne nzhon amig mbyi kwan ndediz rop zha kuu tseyaʼa, ne naley nzo leettsoo amig mbyi nzhon amig mbyi ndediz rop zha kuu tseyaʼa. Kona leeka tata kwathoz naley nzo leettsoon.

³⁰Tak lee zha ndoblo gak zha masraa nataak, ne lee na ndoblo gakʼn zha kuu nataagt raa. Zha kuu mroo yibaa

³¹Lee zha kuu mroo yibaa nabee zha lo reta men ne lo reta kwaa. Lee zha yezlyu ree, zha yezlyu ree nak zha, ne pur kuu yezlyu ree ndediz zha. Per lee zha kuu mroo yibaa, zhaʼa nak zha kuu nabee lo reta men ne lo reta kwaa,

³²ne ndediz zha kuu mwii zha ne kuu mbin zha, per neeka thib zha nyelaazt kuu ni zha.

³³Per lee zha kuu nyelaaz kuu ni zha, zhaʼa nloo lee Diox nali nak.

³⁴Tak lee zha kuu mtaal Diox taa kwent chaan Diox, ndaa zha kwent chaan Diox ne ndaa Diox Mbi Nayon lo zha, ne ngwiit Diox ploy ndaa Diox lo zha.

³⁵Nke leettsoo Xut zha zha, ne mndaa Xut zha yalnabee lo Zha, tsa nabee zha reta kuu nzo lo yezlyu ree ne lobee.

³⁶Ne loka zha kuu yelaaz Xgann Diox, tetsow zhaʼa gan yalnaban kuu thitanax, per lee zha kuu yelaazt Xgann Diox, tsowt zhaʼa gan yalnaban, sinke lee yalnayii chaan Diox la dits zhaʼa.