Read Ozolotepec Zapotec Juan 5 Bible Online

Juan 5 - Ozolotepec Zapotec bible

Juan 5

¹Bluz leettsa ngwalo mriid koree, lee re zha Israel mtsow thib ani, tsa lee Jesús ngwa Jerusalén tedib welt.

²Ne leen yez Jerusalén, gax roo pwert kuu ni zha chaan re mbak zhiil, tya ndob thib tank kuu diiz hebreo le Betesda, kuu nap gaay korredor,

³ne roo re korredora nzi thiban zha syeg, zha mthans ne zha kuu gagt gwin.

⁴Tya nzi re zha ngebet zha, or lee mandad chaan Diox kwin nit leen tank, ne loka zha kuu ner tab leen tank, ngwe zha lo yiz kuu ndak zha.

⁵Ne xid re zhaʼa nzo thib zha mthans kuu ndaʼa galbtsiibxon liin ne ndak.

⁶Ne or mwii Jesús lee zha nax tya, ne ne Jesús ndaʼa tyen liin tata ndak zha, tsa mnaabdiz Jesús lo zha, ne nzhab Jesús: ―¿Chu nlaaza weʼa?

⁷Lee mbyiza mkab ne nzhab: ―Zha Nabee, naptʼn cho kon leen tank or lee nit gwin. Ne kadta leettsa nlazʼn taabʼn leel ner tedib zha ndaab.

⁸Tsa lee Jesús nzhab lo zha: ―Gwache, bthuz daʼa ne bte.

⁹Ne oraaka lee zha mgwe, ne mthuz zha da zha ne mndelo zha mnde zha. Ne kona ngok thib wiz sabd.

¹⁰Tsa lee re zha Israel nzhab lo zha kuu mgweʼa: ―Naltseree nak wiz sabd kuu ndroxkwanaa, ndoblot gweʼa daʼa.

¹¹Tsa lee mbyiʼa mkab ne nzhab: ―Zha kuu mtegwen ne lon: “Bzhen daʼa ne bte”.

¹²Tsa lee re zhaʼa mnaabdiz lo mbyiʼa ne nzhab: ―¿Cho ne loʼa: “Bzhen daʼa ne bte”?

¹³Per lee mbyiʼa net mbyi naa cho mtegwe mbyi, tak lee Jesús mnith xid re men kuu nzi tya.

¹⁴Tut bluz mzaal Jesús mbyiʼa roo gwodoo, tsa nzhab Jesús lo mbyi: ―Wii mgweʼa lu, tsowt raa lu kuu went, tsa ridta tedib yalti kuu mas nathoz nake kuu mriida.

¹⁵Lee mbyiʼa ndya ne nzhab lo re zha Israel: “Jesús nak zha kuu mtegwen”.

¹⁶Ne tak mtsow Jesús kona wiz kuu ndroxkwan re zha Israel, kona mreke re zha Israel dits Jesús ne nlaaz zha kuth zha Jesús.

¹⁷Per lee Jesús nzhab lo re zha: ―Lee Xutʼn thibka nke tsiin, ne noga na tataga nkeen tsiin.

¹⁸Ne kona lee re zha Israel masraa nlaaz zha kuth zha Jesús, ne nagte tak beeta nke Jesús tsiin wiz sabd, sinke tak noga nzhab Jesús lee Diox nak Xut Jesús, ne tata mod ntsow Jesús leeka lee Jesús taxal Diox ley lo zha. Yalnabee chaan Xgann Diox

¹⁹Tsa nzhab Jesús lo re zha: ―Wlipaa na nin, na nak Xgann Diox ne neeka thib kuu ntsowtʼn tak nlazʼn tsow nay, beeta ntsowʼn re kuu ngwiin ntsow Xutʼn. Ne reta kuu ntsow Xutʼn ntsowga nay.

²⁰Ne tak nke leettsoo Xutʼn na nloo Xutʼn reta kuu ntsow Xutʼn lon, ne nalraa loo Xutʼn masraa kuu thoz lon, re kuu kwathoz tsegey leettsoo goo wii goo.

²¹Ne leeka taxal nteroban Xutʼn re zha nguth, ne ntsow Xutʼn mban zha tedib welt, leeka tabaa ndan yalnaban lo zha kuu nlazʼn ta nay.

²²Ne nagt Xutʼn kuu naab kwent lo re men, sinke mndaa Xutʼn yalnabee lon tsa naabʼn kwent lo re men,

²³tsa reta zha gon diiz lon taxal nzhon zha diiz lo Xutʼn; tak lee zha kuu nataagtʼn lo, noga Xutʼn kuu mtaalʼn nataagt lo zhaʼa.

²⁴’Wlipaa na nin lo goo, loka zha kuu nkenza xkizʼn kuu nin lo goo, ne yelaaz zha lee Diox mtaalʼn, tetsow zhaʼa gan yalnaban kuu thitanax, ne naabt Diox kwent lo zhaʼa wiz bluz, tak mrooʼa zhaʼa xid re zha nguth ne nkenoʼa zha yalnaban kuu thitanax.

²⁵Wlipaa na nin lo goo, mzin gaxa wiz, ne nal nak or kuu lee re zha nguth gon bos da, ne loka zha kuu gon bos da taban zha.

²⁶Ne leeka taxal nap Xutʼn yalnaban por leeka lee Xutʼn, leeka tata mndaa Xutʼn yalnabee lon par napʼn yalnaban,

²⁷ne noga mndaa Diox yalnabee lo na, Kuu Mzin Ngok Men, tsa naabʼn kwent lo re men.

²⁸Tsegeyt leettsoo goo por ree kuu nin lo goo, tak tetsin wiz kuu lee reta zha nguth gon bos da,

²⁹tsa roo re zha leen baa. Ne lee re zha kuu mtsow kuu wen, roban zha par kayaa zha yalnaban, per lee re zha kuu mtsow kuu went, roban zha beeta par kayaa zha yalti kuu thitanax lo Diox. Kuu nloo lee Jesús nak Xgann Diox

³⁰’Gagt tsowʼn neeka thib kuu por leeka na. Naabʼn kwent taxal nabee Xutʼn lon, ne nali naabʼn kwent lo re men, tak ntsowtʼn kuu nlazʼn, sinke ntsowʼn kuu nlaaz zha kuu mtaalʼn.

³¹Os leen ndan kwent chaanka na, wlit kuu ndan kwent.

³²Per nzo thib zha kuu ndaa kwent chaan da, ne nen wli kuu ni zha.

³³Re goo mtaal zha kuu ngwa mnaabdiz lo Juan, ne wli kuu mkab Juan lo goo.

³⁴Ne ndechetʼn neeka thib zha kuu taa kwent chaan da, per nin koree lo goo, tsa ne goo tak laa goo lo yalguth ne tsow goo gan yalnaban.

³⁵Juan nak taxal thib xni kuu mke ne mteni lo goo, ne lo xni chaan Juan ngwalaaz goo gayoo naley leettsoo goo lut.

³⁶Per lee na, napʼn thib zha kuu taa kwent chaan da mas nali, nake kuu mndaa Juan kwent. Re kuu ntsowʼn leey nak re kuu mnabee Xutʼn lon tsowʼn, ne leey nloo lee Xutʼn mtaalʼn.

³⁷Ne noga Xutʼn kuu mtaalʼn nzo fabor da, ne neeka ter gon goo bos chaan Xutʼn, ne neeka ter wii goo Xutʼn,

³⁸ne neeka yent xkiiz Xutʼn leettsoo goo, tak nyelaazt goo lee Xutʼn mtaalʼn.

³⁹Kwathoz nteed goo xkiiz Diox, tak ndak goo loy yetsal goo yalnaban kuu thitanax, per nyent goo lee xkeets Diox ndaa kwent naa cho nakʼn.

⁴⁰Per lee re goo nlaazt goo yaad goo lon, tsa keno goo yalnaban kuu thitanax.

⁴¹’Nkwaantʼn tsa tsow nataak re men na.

⁴²Per nlebeen re goo, ne nen napt goo yalnkelaaz chaan Diox leettsoo goo.

⁴³Na ndyalʼn kwent chaan Xutʼn, per lee re goo nkayaat goo na, ne os tedib zha yaad por kwent chaanka zha, zhaʼa si tekayaa goo.

⁴⁴¿Xomod yelaaz goo na, os beeta nkwaan goo par tsow nataak re men goo, ne nkwaant goo par tsow nataak Diox goo?

⁴⁵Tsowt goo xgab lee na keki goo lo Xutʼn, lee zha kuu nkeki goo nak Moisés kuu mndaa ley kuu nyelaaz goo, ne ndak goo por leey tsow goo gan yalnaban.

⁴⁶Os wli nyelaaz goo kuu mkee Moisés, noga ndoblo yelaaz goo na, tak kwent chaan da mndaa Moisés lo re yeets kuu mkee Moisés.

⁴⁷Per os nyelaazt goo kuu mkee Moisés, ¿xomod yelaaz goo kuu nin lo goo?