Read Ozolotepec Zapotec Juan 8 Bible Online

Juan 8 - Ozolotepec Zapotec bible

Juan 8

²ne leettsa ngwani yezlyu tedib wiz, mre Jesús ngwa Jesús lee roo gwodoo. Tsa mndob Jesús mloo Jesús lo re men kuu mkaltaa lo Jesús tya.

³Ne lee re maestr chaan ley ne re fariseo ngwa lo Jesús, ngwano thib ngot kuu ngok rop kon thib mbyi. Ne mto re zha ngot ndrol lo re men kuu nzi lo Jesús,

⁴tsa nzhab re zha lo Jesús: ―Maestr, lee ngot ree ngogaa lo nee, ngok rop kon thib mbyi kuu nagt tsaal ngot.

⁵Ne lee lo ley mnabee Moisés, ndoblo kuthaa ngot kuu tabaa ntsow kon ke. ¿Per lee lu xa neʼa?

⁶Tata nzhab re zha, tak lee xgab re zha nak, naabdiz zha thib kwaa lo Jesús, tsa tak keki zha Jesús. Per lee Jesús mkiits yek ne mndelo mkee kon kwen yaa lo yu.

⁷Per kom naabdizka re zha lo Jesús, tsa mlit yek Jesús ne nzhab Jesús: ―Loka cho thib goo kuu napt neeka thib falt, zhaʼa ndoblo kee ke yek ngot ree ner.

⁸Tsa mre Jesús mkiits yek ne mkeeka lo yu.

⁹Or mbin re zha kona, tsa mroo thibga thibga zha ndya zha, ne ner re zha gol mndelo mroo ndya, tsaraa mroo reta zha. Ne or beeta Jesús kon ngota myaan tya,

¹⁰tsa mlit Jesús yek Jesús ne mnaabdiz Jesús lo ngota: ―¿Ma re zha kuu mkekiʼa? ¿Chu neeka thib zha myet leettsoo gagutha?

¹¹Tsa mkab ngot: ―Neeka thib zha, Zha Nabee. Tsa nzhab Jesús lo ngot: ―Neeka na yent kwan tsowʼn loʼa, tyee ne tsowt raa lu kuu went. Jesús nak xni lo re men yezlyu

¹²Jesús mre mni lo re men, ne nzhab: ―Na nak xni lo re men yezlyu ree, ne loka cho kuu teke ditsʼn, tekeno zha xni kuu ndaa yalnaban, ne tet raa lo yalkow.

¹³Tsa lee re fariseo nzhab lo Jesús: ―Leeka kwent chaana ndaaʼa kwent, nataagt kuu niʼa.

¹⁴Jesús mkab ne nzhab: ―Wli kuu mnin tegal leeka na mniy. Tak nen pa mroon ne pa ndyan, per lee re goo neeka net goo pa mroon ne neeka net goo pa ndyan.

¹⁵Lee re goo naab goo kwent lo re men taxal ntsow re mene, per lee na naabt kwent lo neeka thib men,

¹⁶per os leen naabʼn kwent lo re men, nali nak kuu tsowʼn, tak nagt thita na kuu tsowe, sinke noga Xutʼn kuu mtaalʼn naab kwent kon na.

¹⁷Ne leeka lo ley chaan goo mbez: Os lee chop testig mbez thibka kwaa, wli kuu ni rop zha.

¹⁸Leeka na nak thib testig da, ne lee Xutʼn kuu mtaalʼn nak tedib testig.

¹⁹Tsa mnaabdiz re zha lo Jesús, ne nzhab zha: ―¿Ma Xuta? Jesús mkab ne nzhab: ―Nlebeet goo na, ne neeka Xutʼn nlebeet goo, os nlebee goo na noga nlebee goo Xutʼn.

²⁰Jesús nzhab re kona, leettsa mloo Jesús lo re men lee roo gwodoo, ta nzib re alkansi kuu ngo zha gon. Per neeka thib zha mzhent Jesús, tak ter tsin or kuu ten zha Jesús. “Ta ndyan gagt ya goo”

²¹Jesús mre nzhab lo re zha: ―Leen ndya ne lee re goo kwaan na, ne lee re goo tath goo por re falt goo, lee ta ndyan gagt ya goo.

²²Tsa nzhab re zha Israel: ―¿Chu ntsow zha xgab leeka lee zha kuth zha zha, kona mbez zha gagt ya reʼaa ta ya zha?

²³Per lee Jesús nzhab lo re zha: ―Lee re goo zha yezlyu ree nak goo, per lee na nagtʼn zha yezlyu ree, zha yibaa nakʼn.

²⁴Kona nin lo goo, tath goo por re falt goo, tak os lee goo nyelaazt goo lee na nak Crist, Zha Kuu Mtaal Diox Nabee, tath goo por re falt goo.

²⁵Tsa mnaabdiz re zha lo Jesús ne nzhab zha: ―¿Cho naka? Jesús mkab ne nzhab: ―Desde ner niʼa naa cho nakʼn.

²⁶Ne kwathoz re kuu nlazʼn nin lo goo ne naabʼn kwent lo goo, per lee zha kuu mtaalʼn kuu wli ni zha, ne beeta kuu ne zha lon kona nin lo re men yezlyu ree.

²⁷Per myent re zha lee Jesús mndaa kwent chaan Xut Jesús lo re zha.

²⁸Kona nzhab Jesús lo re zha: ―Leettsa kee goo na zha kuu Myaad Ngok Men lo kruz, tsaraa ne goo naa cho nakʼn, ne tsaraa ne goo ntsowtʼn kuu nlazʼn, sinke beeta kuu mloo Xutʼn lon kona nin.

²⁹Tak lee Xutʼn kuu mtaalʼn ndo kon na; nlaat Xutʼn na, tak thibka ntsowʼn kuu nlaaz Xutʼn.

³⁰Leettsa nzhab Jesús re koree, kwaro zha ngwalaaz Jesús. Re zha kuu wlipaa nak zhiinn Diox

³¹Tsa nzhab Jesús lo re zha Israel kuu ngwalaaz Jesús: ―Os lee goo wlipaa gon goo diiz xkizʼn, wlipaa zha kuu ngeteed lon nak goo,

³²tak lebee goo kuu wli, ne lee kuu wli tsow gak goo zha kuu laa.

³³Lee re zha mkab ne nzhab: ―Zha raz Abraham nak nee, ne neeka mas ter gak nee mos lo thib zha, ne ¿chebee mbeza lo nee, gak nee zha kuu laa?

³⁴Tsa nzhab Jesús lo re zha: ―Wlipaa na nin lo goo, reta zha kuu ndaa falt mos nak zha lo falt zha.

³⁵Tak lee thib mos nyaant mos liz zha kuu nabee lo mos thitanax, per lee xgann zhaʼa thitanax nyaan xgann zha liz zha.

³⁶Kona os lee Xgann Diox telaa goo lo re falt goo, tsasi wlipaa gak goo zha kuu mlaa.

³⁷Neʼa na lee re goo nak zha raz chaan Abraham, per nlaaz goo kuth goo na, tak nlat xkizʼn leettsoo goo.

³⁸Na nin kuu mloo Xutʼn lon, ne lee re goo ntsow goo kuu ne xut goo lo goo.

³⁹Lee re zha mkab ne nzhab: ―¡Abraham nak xut nee! Per lee Jesús nzhab lo re zha: ―Os lee goo wlipaa xgann Abraham nak goo, kuu mtsow Abraham ndoblo goo tsow goo.

⁴⁰Per lee re goo, tegal kuu wli kuu mloo Diox lon mnin lo goo, ne nlaaz goo kuth goo na. ¡Ne lee Abraham thitanax mtsowt Abraham kuu tata!

⁴¹Lee re goo ntsow goo kuu ntsow xut goo. Lee re zha mkab nzhab: ―¡Lee re nee nagt nee zhiinn wan zha, nap nee thibka xut nee, kuu nak Diox!

⁴²Jesús mkab ne nzhab: ―Os wlipaa Diox nak xut goo, gake leettsoo goo na, tak lo Diox mroon, ne ndyaltʼn tak nlazʼn yalʼn, sinke ndyalʼn tak lee Diox mtaalʼn.

⁴³¿Chebee nyent goo re kuu nin lo goo? Nyent gooy, tak nlaazt goo gon goo xkizʼn.

⁴⁴Maxuuy nak xut goo, zha Maxuuy nak goo, ne ntsow goo re kuu nlaaz Maxuuy. Tak lee Maxuuy nak thib zha kuu nzhuth men desde ndala. Ne ndedizt Maxuuy kuu wli, tak neeka lut kuu wli yent leettsoo Maxuuy. Ne leettsa ndediz Maxuuy kuu wlit kuu nak Maxuuy kona ndediz Maxuuy, tak zha nkedi nak Maxuuy, ne lee Maxuuy nak xut yalkedi.

⁴⁵Per lee na kuu wli nin lo goo ne nyelaazt goo xkizʼn.

⁴⁶¿Cho thib goo, tak loo goo lee na nap thib falt? Os kuu wli nin lo goo, ¿chebee nyelaazt goo xkizʼn?

⁴⁷Lee zha kuu nak zha Diox, nkenza zha xkiiz Diox, per lee goo nagt goo zha Diox, kona nlaazt goo gon goo xkiiz Diox. Lee Crist Kuu Mtaal Diox Nabee nzoʼa desde ndala nake Abraham

⁴⁸Tsa lee re zha Israel nzhab lo Jesús: ―Wenka nzhab nee lee lu nak thib zha yez Samaria, ne mbi fyer nzo leettsooʼa.

⁴⁹Jesús mkab ne nzhab: ―Neeka thib mbi fyer yent leettsoon. Lee kuu ntsowʼn nak ntsow nataak na Xutʼn; per lee re goo ngoo goo yalnathoy da.

⁵⁰Nkwaantʼn tsa tsow nataak re men na, per nzo thib zha kuu nlaaz tsow nataak re men na, ne lee zhaʼa nak zha kuu naab kwent.

⁵¹Wlipaa na nin, loka cho kuu nzhon diiz xkizʼn gatht zha.

⁵²Lee re zha Israel mkab ne nzhab: ―Nalsi ne nee, wlipaa mbi fyer nzo leettsooʼa, Abraham ne reta profet nguth zha, ne lee lu mbeza: “Loka zha kuu gon diiz xkizʼn gatht zha”.

⁵³Naa ¿chu mas nataaka nake teyaa Abraham? Lee Abraham, ne noga re profet kuu ngoo ndala nguth re zha. ¿Cho naka ndaka?

⁵⁴Jesús mkab ne nzhab: ―Os leen tsow nataak na leeka na, nataagt kuu nin. Per lee zha kuu ntsow nataak na nak Xutʼn, leeka Diox kuu mbez goo nak Diox goo.

⁵⁵Per nlebeet goo Diox. Per na si nlebeen Diox. Ne os nin nlebeetʼn Diox, noga na nakʼn zha nkedi taxal goo. Per wlipaa nlebeen Diox, ne ntsowʼn kuu nabee Diox.

⁵⁶Lee Abraham teyaa zha ndala, kwathoz laz zha, tak ngwalaaz zha gawii zha wiz ree, ne mwii zhay ne kwathoz naley ngoo leettsoo zha mwii zhay.

⁵⁷Lee re zha Israel nzhab lo Jesús: ―¡Neeka napta chop galbtsii liin, ne mbeza mwiiʼa lu Abraham!

⁵⁸Jesús mkab ne nzhab: ―¡Wlipaa na nin lo goo, nzoʼa na leettsa terka yo Abraham!

⁵⁹Tsa lee re zha mzhen ke, gakee zha yek Jesús, per lee Jesús mkaslo ne mroo lee roo gwodoo, ne mriid Jesús xid re men nda Jesús.