Read Ozolotepec Zapotec Juan 9 Bible Online

Juan 9 - Ozolotepec Zapotec bible

Juan 9

¹Or nderid Jesús thib ta, tsa mwii Jesús thib mbyi kuu ngol syeg.

²Tsa lee re zha kuu ngeteed lo Jesús mnaabdiz lo Jesús ne nzhab: ―Maestr, ¿chebee syeg mbyi ree ngol mbyi? ¿Chu tak mndaa xut mbyi ne xnaa mbyi falte o chu tak leeka mbyi mndaa falt konay?

³Tsa lee Jesús mkab ne nzhab: ―Ngolt mbyi tabaa, por falt chaan xut mbyi ne xnaa mbyi, neeka nagte por falt mbyi, tabaa ngol mbyi, tsa por lee mbyi loo Diox re kuu tak tsow Diox.

⁴Ne nal beet raa tse nziʼaa, ndoblo tsowʼn rtsin zha kuu mtaalʼn, tak leettsa nlaa yaal neeka thib zha gagt raa ke tsiin.

⁵Nal kuu bee ndon lo yezlyu ree, xni nakʼn lo re men yezlyu ree.

⁶Or ngwalo nzhab Jesús re koree, tsa mtsuk Jesús lo yu, ne mtsow Jesús lut ben ne mdaab Jesús ben ngutlo syeg.

⁷Tsa nzhab Jesús lo syeg: ―Gwa, gwateech ngutloʼa roo tank kuu le Siloé. (Diiz ree nak: “Ntaal zha zha”.) Tsa ngwa zha syega ngwateech ngutlo, ne leettsa mretab zha nyeniʼa ngutlo zha.

⁸Tsa lee re zha kuu nzo gax liz zhaʼa, ne re zha kuu mwii lee zha mnaab karida, mnaabdiz zha lo re altaa zha ne mbez zha: ―¿Chu leet zha ree kuu nyatob nyanaab karida ganda wiz?

⁹Tsa thib net zha mbez: ―Lee zhay. Lee tedib net zha mbez: ―Leet zhay, tegal tata na zha. Per lee zha mbez: ―Nay.

¹⁰Tsa mnaabdiz re zha lo zhaʼa ne nzhab zha: ―¿Xomod nzhaaka ngwiiʼa?

¹¹Lee zha mkab ne nzhab: ―Lee mbyi kuu lee Jesús mtsow lut ben, ne mdaab mbyiy ngutlon, tsa ne mbyi lon: “Gwa roo tank Siloé gwateech ngutloʼa”. Ne oraaka ngwan ne mteechʼn ngutlon, ne lee ngutlon mzhaal.

¹²Tsa mnaabdiz re zha lo zhaʼa ne nzhab zha: ―¿Ma mbyiʼa tsa? Tsa nzhab zha: ―Netʼn, ma mbyi. Lee re fariseo mnaabdiz lo zha kuu ngok syeg

¹³Tsa ndano re zha zha kuu ngok syega lo re fariseo.

¹⁴Ne wiz sabd kuu ndroxkwan re zha Israel, wiza mtsow Jesús lut ben ne mtegwe Jesús ngutlo zha kuu ngok syega.

¹⁵Tsa lee re fariseo mnaabdiz lo zha kuu ngok syega ne nzhab re zha: ―¿Xomod mgwe ngutloʼa? Lee zha mkab ne nzhab: ―Lee mbyiʼa mdaab ben ngutlon, ne mteechʼn ngutlon, ne lee nal nzhaaka ngwiin.

¹⁶Lee chop tson fariseo nzhab: ―Nagt mbyiʼa thib zha kuu mtaal Diox, tak ngotsowt zha wiz sabd kuu ndroxkwanaa. Per techop tson zha mbez: ―¿Xomod nzhaak ntsow zha re milagr thoz ree, os zha kuu nap falt nak zha? Ne ta mod ngok rol re zha.

¹⁷Tsa mre re zha mnaabdiz zha lo zha kuu ngok syega, ne nzhab zha: ―Lee lu, ¿cho nak zha kuu mtegwe ngutloʼa ndaka? Lee zha mkab ne nzhab: ―Na ni lee zha nak thib profet chaan Diox.

¹⁸Per lee re zha Israel ngwalaazt zha lee zha kuu ngok syega, nzhaaka ngwii, tsa mtaal re zha chop tson zha ngwachez xut zhaʼa ne xnaa zha,

¹⁹ne or mzin xut zha ne xnaa zha, tsa mnaabdiz re zha lo xut zha ne lo xnaa zha, ne nzhab re zha: ―¿Chu zhiinn goo nak mbyi ree? ¿Chu wli goo syeg zha ngol zha? ¿Ne xomod nzhaaka ngwii zha nal?

²⁰Lee xut zha ne xnaa zha mkab ne nzhab: ―Wli xgann nee nak zha, ne syeg zha ngol zha,

²¹per net nee chebee nzhaaka ngwii zha, ne neeka net nee cho mtegwe ngutlo zha. Bnaabdiz goo lo zha zha byeʼa zha, lee zha tak ney lo goo.

²²Tata nzhab xut zha ne xnaa zha, tak nzeb rop zha ne zha re zha Israel kuu nataak, tak lee re zha kuu nataaka myaan re zha diiz, os lee thib zha gab lee Jesús nak Zha Kuu Mtaal Diox Nabee, koo zha zhaʼa xid re zha ta nkaltaa re zha nteed zha xkiiz Diox.

²³Ta mod nzhab xut zha ne xnaa zha: “Bnaabdiz goo lo zha zha byeʼa zha”.

²⁴Tsa lee re zha Israel mre mrez zha kuu ngok syega, ne nzhab re zha lo zhaʼa: ―Bloo rooʼa lo nee delant lo Diox. Tak neʼa nee lee mbyiʼa nak thib zha kuu ndaa falt.

²⁵Tsa lee zhaʼa mkab ne nzhab: ―Netʼn chu zha nap falt nak zha o nagt zha zha kuu nap falt. Beeta kuu nen nak, ngokʼn syeg, per lee nal nyeniʼa ngutlon.

²⁶Tsa mre re zha mnaabdiz zha lo zhaʼa nzhab zha: ―¿Kwan mtsow zhaʼa loʼa? ¿Xomod mtsow zha par mzhaal ngutloʼa?

²⁷Lee zha mkab ne nzhab: ―Niʼa nay lo goo, per nyelaazt gooy. ¿Chebee nlaaz goo bren ni nay lo goo tedib welt? O, ¿chu no goo nlaaz goo teke goo dits Jesús?

²⁸Tsa mtsalzhoo re zha zhaʼa, ne nzhab re zha: ―Lu ndekeʼa dits mbyiʼa, per lee nee ndeke nee dits Moisés.

²⁹Nee ne lee Diox mni lo Moisés, per lee mbyiʼa neeka net nee pa mroo mbyiʼa.

³⁰Lee mbyi kuu ngok syega mkab ne nzhab: ―¡Koree si wlipaa nzegey leettsoo men ngwii men! Tak ¿chebee net goo pa mroo zha, ne lee zha mtegwe ngutlon?

³¹Retalee neʼaa nzhont Diox xkiiz re zha kuu nap falt, per nzhon Diox xkiiz re zha kuu nyelaaz Diox ne ntsow kuu nlaaz Diox.

³²Thitanax neeka mas ter yath, lee thib zha ntsow nyeni lo thib zha kuu ngol syeg.

³³Os lee mbyiʼa ndyaadt por Diox, yent kwan tak tsow mbyi.

³⁴Tsa nzhab re zha lo zha kuu ngol syega: ―¡Zhiinn wan zha naka! Ne nlaaza teniʼa nee. Tsa mloo re zha zhaʼa ta nkaltaa re zha nteed zha xkiiz Diox. Re zha kuu mkow yek ne leettsoo lo xkiiz Diox

³⁵Tsa mbin Jesús lee re fariseo mloo zha kuu ngol syega, ta nkaltaa zha nteed zha xkiiz Diox, ne or mzaal Jesús zha kuu ngok syega, tsa nzhab Jesús lo zha: ―¿Chu nyelaaza, Zha Kuu Mtaal Diox Ngok Men?

³⁶Lee zha kuu ngok syega mkab ne nzhab: ―Zha Nabee, ne lon choy, tsa yelazʼn zha.

³⁷Jesús mkab lo zha ne nzhab: ―Mwiiʼa lu zha, tak na nak zhaʼa kuu ngetediz loʼa.

³⁸Tsa lee mbyiʼa mtobxub lo Jesús ne nzhab: ―Zha Nabee, nyelazʼn lu.

³⁹Ora nzhab Jesús lo zha: ―Na ndyalʼn lo yezlyu ree par naabʼn kwent lo re men yezlyu ree, tsa lee re zha kuu syeg yeni lo, ne lee re zha kuu nyeni lo yaan syeg.

⁴⁰Per lee chop tson fariseo kuu nzi tya, or mbin zha kona, tsa mnaabdiz zha lo Jesús ne nzhab zha: ―¿Chu no nee nak nee taxal syeg?

⁴¹Jesús mkab lo re zha ne nzhab: ―Os gagak goo syeg, napt goo falt lo Diox. Per tak mbez goo wen nyeni lo goo, kona nap goo falt lo Diox.