Read Ozolotepec Zapotec Hechos 10 Bible Online

Hechos 10 - Ozolotepec Zapotec bible

Hechos 10

¹Ne yez Cesarea ngoo thib mbyi kuu le Kornel, kuu nak soldad kuu mnabee lo thib gayoo soldad, partid kuu le Italiana.

²Ne Kornel nak thib mbyi kuu nali kuu thib mloo yek tsow kuu nlaaz Diox kon re lizta Kornel, ne kwaro mtsow Kornel ayud re prob zha Israel, ne thibka naab Kornel lo Diox.

³Thib wiz teeka las tres, taxal zha kuu ntsaa leettsoo ngwani thib mandad chaan Diox lo Kornel kuu mndaab ta ndo Kornel, ne nzhab lo Kornel: ―¡Kornel!

⁴Tsa mwii Kornel lo mandad chaan Diox ne mzeb Kornel nzhab Kornel: ―¿Kwaan nlaaza, Zha Nabee? Tsa lee mandad chaan Diox nzhab lo Kornel: ―Mbina Diox re kuu nzhaba lo Diox, ne ngewii Diox xa ntsowa ayud re prob.

⁵Btaal chop tson zha yez Jope, tsa yaxii zha Simún kuu noga le Pey.

⁶Kuu nzo liz Simún kuu nteguuz yid, kuu ndob liz roo nitdoo, lee Pey ne loʼa naa kwan ndoblo tsowa.

⁷Leettsa lee mandad chaan Diox kuu mndediz lo Kornel ndya, lee Kornel mrez chop zha kuu nke tsiin lo Kornel, ne thib soldad zha kuu wlipaa nyelaaz Diox, zha kuu ne Kornel tetsow kuu gab Kornel lo.

⁸Leettsa ngwalo mndaa Kornel kwent kuu mzhaak Kornel lo re zha, tsa mtaal Kornel re zha yez Jope.

⁹Ne tedib wiz, leettsa lee re zha ndetsin gaxa yez Jope, teeka ndrol wiz lee Pey mkendab yek yuu, par tediz Pey lo Diox.

¹⁰Kwathoz mlann Pey ne ngwalaaz Pey gawu Pey, per ora lee men ngetexkwaa kuu wu Pey, ne ora cha ngwani thib kwaa lo Pey,

¹¹ne mwii Pey mzhaal yibaa, ne mloo lo Pey thib kuu naa taxal thib le lar naro kuu ndob bgo re thapta skin, mlato lo Pey.

¹²Ne lo lara nzo relota maa kuu nde kon thap nii, noga re maa kuu ndedoob yu lo yu, ne re maa kuu nlazbi.

¹³Tsa mbin Pey thib bos kuu nzhab lo Pey: ―Pey, gwateli, beth maa ne dow maa.

¹⁴Tsa lee Pey mkab ne nzhab: ―Gagte, Zha Nabee; neeka thib welt ter wun maa nambit kuu nzhowt men.

¹⁵Lee bosa mre mni tedib welt, ne nzhab lo Pey: ―Loka kuu mtembiʼa Diox, ndoblot gaba nambite.

¹⁶Ne tson welt ngwani kona lo Pey, tsaraa lee lar mre ngwaap yibaa tedib welt.

¹⁷Ne lee Pey kwathoz mtsow xgab naa kwan nak kuu mloo lo Pey, ne oraaka mzin re zha kuu mtaal Kornel roo liz Simún, tak mnaabdiza zha naa pa nak liz Simún.

¹⁸Ne or mzin re zha, mnaabdiz zha naa chu tya mbet Simún, kuu noga le Pey.

¹⁹Ne lee Pey bee ngetsow xgab naa kwan nak kuu mloo lo Pey, ne lee Mbi Nayon nzhab lo Pey: ―Wii lee tson mbyi ngekwaana.

²⁰Gwateli, bla ne ngwake dits re zha, ne gagt chop xgaba, tak na mtaal zha.

²¹Tsa mla Pey mzin Pey lo re zha kuu mtaal Kornel, tsa nzhab Pey lo re zha: ―Na nak zha kuu nkwaan goo, ¿chebee ndyaad goo?

²²Ne lee re zha mkab, ne nzhab: ―Nee ndyaad kwent chaan soldad Kornel, kuu nabee lo thib gayoo soldad. Lee Kornel nak thib mbyi nali, ne nzhon Kornel diiz lo Diox ne reta zha Israel ndediz wen zha Kornel. Ne thib mandad chaan Diox mni lo Kornel: Kona mtaal Kornel nee ndyaadxii nee lu, tsa yaʼa liz Kornel, ne lee Kornel gon re kuu gaba lo Kornel.

²³Tsa lee Pey nzhab lo re zha: ―Briid goo leen yuu. Ne tya myaan re zha yaala, lee tedib wiz ngwa Pey kon re zha, ne noga thiban re zha kuu nyelaaz Jesús ngwa kon Pey.

²⁴Ne tedib wiza mzin re zha yez Cesarea, ta nak liz Kornel, ne lee Kornel mkaltaa re zha Liz Kornel ne re amig Kornel ne ngebet Kornel tsin Pey.

²⁵Or mzin Pey liz Kornel, ora mroo Kornel mkayaa Pey ne mtobxub Kornel lo Pey taxal lo Diox.

²⁶Per lee Pey mteli Kornel, ne nzhab lo Kornel: ―Gwateli, tak roptalee nak men.

²⁷Ne ngetediz Pey rop Kornel asta mzin roo pwert yuu, tsa mndaab Pey leen liz Kornel, ne mwii Pey kwaro men mkaltaa tya.

²⁸Tsa nzhab Pey lo re zha kuu nzi tya: ―Wen ne re goo lee thib zha Israel, ndaat ley chaan nee diiz tsaal nee kon re zha kuu nagt zha Israel, ne neeka ndoblot nee tab nee leen liz zha, per lee Diox mlooʼa lon, ndoblot gapʼn lo neeka thib men lee zha nambit nak, neeka ndoblot tsowʼn xgab went nak zha.

²⁹Kona ndyalʼn leettsa mrez goo na, ne neeka mtotʼn neeka thib kuu tsa gayaltʼn. Ne lee nal nlazʼn nen naa chebee mrez goo na.

³⁰Kornel mkab ne nzhab: ―Ndaʼa thap wiz leeka or ree, ndon nzhee lizʼn teeka las tres, ngetsowʼn ayun ne ngetedizʼn lo Diox, ne oraaka ngwani thib mbyi kuu nok thib lar kuu kwathoz nla xni lon.

³¹Kuu mne lon: “Kornel, mbina Diox re kuu mnaaba lo Diox, ne ngewii Diox naa xa ntsowa ayud re zha prob.

³²Btaal zha ya yez Jope yaxii Simún, kuu noga le Pey, lee Pey nzo liz Simún kuu nteguuz yid kuu ndob liz gax roo nitdoo, lee Pey ne loʼa naa kwan ndoblo tsowa.”

³³Ta mod mtaalʼn zha ngwaxiiʼa. Ne wen mtsowa ndyaada, ne nalor lee Diox ndewii lee retalee nzi nzhee ne nlaaz nee gon nee reta kuu mnabee Diox loʼa neʼa. Pey mndaa kwent xkiiz Diox liz Kornel

³⁴Tsa mndelo Pey mni ne nzhab: ―Nalsi nen wlipaa lalka nataak reta men lo Diox.

³⁵Ne nkayaa Diox re zha kuu wlipaa ntsow kuu nlaaz Diox, tegal zha tedib yez nak zha.

³⁶Diox mniʼa lo re zha raz Israel, nzhaba Diox lo re zha naa xomod wen kwin re zha kon Diox, kwent chaan Jesús, Zha Nabee lo reʼaa.

³⁷Goo mbin xomod mndaa zha kwent chaan Jesús desde yezlyu Galilea ne asta dita yezlyu Judea, leettsa mndelo Juan mndaa kwent lo re men, lee re men ndoblo gakleyy.

³⁸Ne wen ne goo lee Diox mndaa Mbi Nayon ne yalnabee lo Jesús zha Nazaret, ne Jesús ree mndiy mtsow yalwen ne mtegwe re zha kuu nzo mbi fyer leettsoo, ne reta koree ngok mtsow Jesús, tak lee Diox ndo kon Jesús.

³⁹Ne nee nak cho mwii reta kuu mtsow Jesús dita yezlyu Judea ne yez Jerusalén. Ne or ngwalo mriid koree, tsaraa mbeth zha Jesús ne mkee zha Jesús lo kruz.

⁴⁰Per lee Diox mteroban Jesús leettsa ndaʼa tson wiz nguth Jesús, ne mndaa Diox diiz ngwani Jesús lo re nee.

⁴¹Ne ngwanit Jesús lo reta men, sinke beeta lo re nee kuu mteed lo zha ngwani zha, ne nee ngok zha kuu mwii reta kuu mtsow Jesús. Ne re nee ndow ne ngwii kon Jesús, leettsa mroban Jesús xid re zha nguth.

⁴²Lee Jesús mtaal nee tsa taa nee kwent chaan Jesús lo re men, tak Diox mto Jesús, tsa naab Jesús kwent lo re zha kuu naban ne lo re kuu ngutha, leettsa tsin wiza.

⁴³Ne reta profet kuu mndaa kwent xkiiz Diox lo re men ndala, mndaaʼa profet kwent chaan Jesús, leettsa nzhab profet: “Reta zha kuu yelaaz Jesús; tetuyy Diox falt zhaʼa, tak ngwalaaz zha Jesús”. Re zha kuu nagt zha Israel mkayaa Mbi Nayon

⁴⁴Bee ngetedizka Pey, lee re men kuu nzi ngeyon kuu nzhab Pey mkayaa Mbi nayon.

⁴⁵Ne lee re zha Israel kuu nyelaaz Jesucrist kuu ngwake dits Pey, kwaro mzegey leettsoo re zha, tak noga re zha kuu nagt zha Israel mkayaa Mbi Nayon.

⁴⁶Tak mbin re zha lee re zhaʼa ndediz tedib net diiz ne nzhool zha lo Diox.

⁴⁷Tsa nzhab Pey lo re zha: ―¿Chu nzo men tak ne, gagt gakleyy re zha ree kuu mkayaaʼa Mbi Nayon taxal reʼaa?

⁴⁸Tsa mnabee Pey gakleyy re zhaʼa kon le Jesucrist. Tsa nzhab re zha lo Pey kwet Pey lo re zha chop tsonta wiz.