Read Ozolotepec Zapotec Hechos 15 Bible Online

Hechos 15 - Ozolotepec Zapotec bible

Hechos 15

¹Re wiza, thiban zha kuu mroo yezlyu Judea mzin yez Antioquía, lee re zha ree mndelo mloo lo re zha kuu nyelaaz Jesús, ne nzhab zha: ―Yent mod laa goo lo re falt goo, os lee goo ket goo seny chaan re zha Israel, taxal nzhab lo ley chaan Moisés.

²Tsa lee Paba rop Bernabé mbyodiz kon re zhaʼa, ne bluz lee re zha kuu nyelaaz Jesús mli Paba rop Bernabé, ne techop tson zha tsa ya re zha yez Jerusalén, tsa tediz zha kwent ree kon re apóstl ne kon re zha gol zha gwodoo naro.

³Ne lee re zha kuu nyelaaz Jesús kuu nzo yez Antioquía, ngwatenet zha Paba rop Bernabé, ne leettsa nderid zha yezlyu Fenicia ne yezlyu Samaria, mndaa zha kwent naa xomod lee re zha kuu nagt zha Israel, mlaaʼa zha re creens zha ne ngwalaaz zha Diox. Ne kwathoz naley ngoo leettsoo re zha kuu nyelaaz Jesús mbin zha koree.

⁴Leettsa mzin Paba rop Bernabé Jerusalén, tsa lee re zha kuu nyelaaz Jesús, re apóstl ne re zha gol mkayaa zha zha. Tsa mndaa rop zha kwent reta kuu mtsow Diox kon lee zha.

⁵Per chop tson re fariseo kuu ngwalaaza Jesús ngwateli ne nzhab: ―Ndoblo gabaa lo re zha kuu nagt zha Israel, ndoblo ke zha seny chaan reʼaa zha Israel, ne noga gabaa lo zha ndoblo gon zha diiz kuu nabee lo ley chaan Moisés.

⁶Tsa mkaltaa re zha kon re apóstl ne kon re zha gol, tsa tediz re zha kwent ree.

⁷Bluz or kwathoza mndediz zha, tsa lee Pey ngwateli ne nzhab: ―Wets wen ne goo, nda wiza, Diox mlin tsa tan kwent Diiz Chul chaan Jesús lo re zha kuu nagt zha Israel, tsa noga re zha yelaaz Jesús.

⁸Ne Diox kuu nlebee leettsoo reta men, mloo Diox lee Diox mkayaa zha, ne mndaa Diox Mbi Nayon lo re zha, taxalka mndaa Diozhe loʼaa.

⁹Ne leeka taxal mtsow Diox kuu wen lo reʼaa, tataka mtsow Diox lo re zhaʼa, tak leeka taxal mtembi Diox leettsooʼaa, tataka mtembi Diox leettsoo re zhaʼa, tak ngwalaaz zha Diox.

¹⁰Ne lee nal; ¿chebee thib lad nlaa goo kuu mtsow Diox, ne nlaaz goo tsow re zha kuu nyelaaz Jesús kuu mbez lo ley, thib kuu neeka reʼaa ne neeka re teyaa ngogt gatsow?

¹¹Ne neʼa lee mlaaʼa lee lo re faltaa, por yalwen chaan Jesucrist Zha Nabee, tataga mlaaʼa re zhaʼa tak nyelaaz re zha Jesús.

¹²Tsa mtow roo re zha ne mkenza zha, or lee Paba rop Bernabé mndaa kwent re milagr kuu mtsow rop zha por yalney chaan Diox lo re zha kuu nagt zha Israel.

¹³Or ngwalo mni rop zha, tsa noga Santiag nzhab: ―Wets, re goo kuu nyelaaz Jesús kenza goo kuu nin:

¹⁴Simún Pey mndaaʼa kwent lo reʼaa ner, naa xomod mndelo Diox mli Diox re zha kuu nagt zha Israel, tsa gak zha zha Diox.

¹⁵Reta koree ngok taxal nzhab re profet kuu ngoo ndala lo xkeets Diox ta mbez:

¹⁶Bluz or ngwaloʼa ngok re koree,tsa bren texkwaan liz David kuu mlux.Bren tan kuu myaan ne xit nay tedib welt,

¹⁷tsa lee tedib net re men kwaan Zha Nabee,ne no re zha kuu nagt zha Israel kuu nlebeeʼa na.

¹⁸Tata ne Zha Nabee, Diox kuu mtsow mne re zha ndala koree. [Amós 9:11-12]

¹⁹’Kona lee na ni: Ndoblot tsowaa fwers re zha kuu nagt zha Israel gon zha diiz kuu mbez lo ley, re zha kuu mlaaʼa re costumr ne ngwalaaz Diox.

²⁰Mas wen taalaa thib yeets lo re zha, tsa wut zha re kuu ntsib re men lo re diox kuu nagt Diox, gagt rop zha kon ndota zha, wut zha beel re maa kuu nxot ren ne neeka ren ndoblot wu zha.

²¹Tata keeʼaa lo re zha, tak reta yez nzo re zha kuu ndaa kwent ley desde ndala, ne nlab zha ley ta nkaltaa re tawlazaa zha Israel nteed xkiiz Diox, wiz kuu ndroxkwanaa. Yeets kuu mtaal zha lo re zha kuu nagt zha Israel

²²Tsa lee re apóstl ne re zha gol, kon reta zha kuu nyelaaz Jesús, myaan re zha diiz kwii zha chop tson zha kuu taal zha ya yez Antioquía kon Paba rop Bernabé. Tsa mli zha Judas kuu noga lee Barsabás ne Silas, rop zha ree nak zha kuu nataak xid re zha kuu nyelaaz Jesús,

²³ne lo re zha ree mtaal zha yeets kuu tenzhee nzhab: “Re nee kuu nak apóstl ne re nee kuu nak zha gol kon reta zha kuu nyelaaz Jesús. Tsan reta goo wets ne btan, kuu nagt zha Israel kuu nyelaaz Jesús kuu nzo yez Antioquía, ne reta goo kuu nzo yezlyu Siria ne Cilicia.

²⁴Mbin nee lee chop tson tawlaz nee ngwa lo re goo ne ntegan zha goo, tsa nzhak chop xgab goo, ne ne zha lo goo ndoblo goo ke goo seny chaan nee zha Israel, ne gon goo diiz kuu mbez lo ley, per leet nee mtaal zha.

²⁵Kona mtsow nee xgab kwenta ne myaan re nee diiz mli nee chop tson zha, par taal nee lo re goo kon Bernabé ne Paba rop zha kuu kwathoz nke leettsoo nee.

²⁶Rop zha ree mndaa zha yalnaban chaan par rid zha yalti kwent Diiz Chul chaan Jesús.

²⁷Ne kon rop zha mtaal nee Judas ne Silas, rop zha ree ne lo goo kuu myaan nee diiz nzhee.

²⁸Tak lee Mbi Nayon ne lo nee, ndoblot raa ne nee lo goo gon goo diiz kwan raa, beeta re koree ndoblo tsow goo:

²⁹Wut goo re beel kuu ndaa re men lo re diox kuu nagt Diox, neeka wut goo ren neeka re beel maa kuu nxot ren, ne ndoblot gak rop goo kon ndota zha. Os lee re goo ntsow goo re koree, wen ngetsow goo.”

³⁰Ne tata lee re zha kuu mtaal zha nda yez Antioquía, mkaltaa zha re zha kuu nyelaaz Jesús, ne mndaa zha yeetsa lo re zha.

³¹Or mlab re zha yeetsa, kwathoz naley ngoo leettsoo re zha, tak kwaro mtetsey re diza leettsoo zha.

³²Ne kom noga Judas rop Silas nak profet, kwaro mtetsey zha ne mloney rop zha ree leettsoo re zha kuu nyelaaz Jesús tya.

³³Leettsa ndaʼa tyen wiz ndo Judas rop Silas tya, tsaraa lee re zha kuu nyelaaz Jesús mtaal zha rop zha, ne nzhab zha lo rop zha “Wen ndya goo”, tsa bre rop zha Jerusalén lo re zha kuu mtaal zha.

³⁴Per lee Silas mtsow xgab mas wen yaanka zha tya.

³⁵Paba rop Bernabé myaan yez Antioquía, ne lo tyen zha yeza mloo rop zha ne mndaa zha kwent Diiz Chul chaan Jesús. Paba rop Bernabé mtso

³⁶Telut bluz lee Paba nzhab lo Bernabé: ―Ndatwiiʼaa lo re zha kuu nyelaaz Jesús, reta yez ta mndaaʼa lee kwent xkiiz Diox, tsa naa xa nzi re zha.

³⁷Bernabé ngwalaaz gateno Juan kuu noga le Mark,

³⁸per lee Paba mzhyalt gateno Juan, tak mlaa Juan Paba rop Bernabé yezlyu Panfilia ne mndeket raa Juan dits rop zha gataa zha kwent xkiiz Diox.

³⁹Koree mtsow mbyodiz rop zha, ne asta mtso rop zha; tsa lee Bernabé mndeno Juan Mark, ngoo leen bark nda par Chipre yezlyu kuu nzi leen nit.

⁴⁰Lee Paba mli Silas, tsa lee re zha kuu nyelaaz Jesús mlaa zha Paba lazya Diox, tsa tsow Diox ayud rop zha, ne mroo rop zha yez Antioquía.

⁴¹Ne ngwa zha Siria ne Cilicia ne nzhab zha lo re zha kuu nyelaaz Jesús tya, tsa ney to re zha lo kuu ngwalaaz zha.