Read Ozolotepec Zapotec Hechos 16 Bible Online

Hechos 16 - Ozolotepec Zapotec bible

Hechos 16

¹Paba rop Silas mzin yez Derbe ne yez Listra, tya mlebee zha thib zha kuu nyelaaz Jesús kuu le Tim, xgann thib ngot Israel kuu nyelaaz Jesús, per lee xut zha nak zha gryeg.

²Lee re zha kuu nyelaaz Jesús yez Listra ne re zha yez Iconio wen ndediz zha Tim.

³Tsa lee Paba nzhab teno Tim, per ner mkee Paba seny re zha Israel Tim, por re zha Israel, tak reta zha ne lee xut Tim nak zha gryeg.

⁴Reta yez ta mriid zha nzhab zha lo re zha kuu nyelaaz Jesús, tsa tsow re zha re kuu nzhab re apóstl kon re zha gol zha Jerusalén.

⁵Tsa lee re zha kuu nyelaaz Jesús masraa ney mndo zha lo kuu nyelaaz zha, ne wiz kon wiz ndiy ngok mas ploraa zha. Taxal lo mkaal ngwani thib mbyi zha yez Macedonia lo Paba

⁶Tsa lee re altaa Paba mriidabta yezlyu Frigia ne yezlyu Galacia, tak lee Mbi Nayon mzhyalt gataa zha kwent xkiiz Diox Asia,

⁷ne mzin zha yezlyu Misia. Tsa mtsow zha xgab ya zha yezlyu Bitinia, per mzhyaltga Mbi Nayon gaga zha.

⁸Ne leettsa mriidabta zha Misia, tsa mzin zha yez Troas, tya mla zha leen bark.

⁹Ne yaala taxal lo mkaal ngwani thib zha yezlyu Macedonia lo Paba, thib zha kuu ndeli nzhab lo Paba: “Bzhyal de Macedonia tsa tsowa ayud nee”.

¹⁰Or mzhaak Paba kona, oraaka lee re nee mdexkwaa, tsa ndya nee yezlyu Macedonia, tak myeen nee lee Diox ngebez nee, tsa taa nee kwent Diiz Chul tya. Paba rop Silas mzin yez Filipos

¹¹Ngoo nee leen bark yez Troas ne ngwa nee nali par Samotracia yezlyu kuu nzi leen nit, ne lee tedib wiz mzin nee yez Neápolis.

¹²Ne tya mroo nee ngwa nee yez Filipos, kuu nak yez kuu mas nataak, kuu nzi ta ndelo yezlyu Macedonia ne Roma nabee yeza. Tya mlet nee chop tsonta wiz.

¹³Thib wiz kuu ndroxkwan re zha Israel, mroo nee yez ne ngwa nee thib roo yoo, ta neʼa nee nkaltaa re zha Israel naab lo Diox, ne mndob nee mndaa nee kwent xkiiz Diox lo re ngot kuu mkaltaa tya.

¹⁴Ne xid re ngota ngoo thib ngot kuu le Lidia zha yez Tiatira, thib ngot kuu ntho lar morad kuu kwathoz wen, thibka nzhool ngot lo Diox, ne ngeyon ngot kuu mbez Paba per Diox mtsow mzhaal leettsoo ngot, tsa kenza ngot kuu ngeni Paba.

¹⁵Tsa ngokleyy re lizta ngot, ne mne ngot lo nee: ―Os lee goo wli nyelaaz goo lee na nyelaaz Jesús, de goo tsa kwet goo lizʼn. Ne mtsow ngot fwers lo nee par myaan nee liz ngot. Paba mtegwe thib nzaa kuu nzo mbi fyer leettsoo

¹⁶Thib wiz Leettsa nda nee ta nkaltaa re zha Israel nteed xkiiz Diox, tsa mzal nee thib nzaa kuu nzo mbi fyer leettsoo, ne kon yalnabee chaan mbi fyer ntsow nzaa divin, ne kwathoz ntsow re patron nzaa gan temi por yaldivina.

¹⁷Lee nzaa ree mndeke dits re nee Paba ne mbetsyath nzaa mbez nzaa: ―¡Lee re mbyi ree nak zha kuu nke tsiin lo Diox kuu ndob yibaa, ne ndaa zha kwent lo re goo naa xomod laa goo lo re falt goo!

¹⁸Tyen wiz tata mtsow nzaa, asta leettsa mkezhyan Paba, tsa lee Paba mre ne nzhab lo mbi fyera: ―Kon yalnabee chaan Jesucrist nabeen loʼa, broo leettsoo nzaa ree. Ne oraaka lee mbi fyer mroo leettsoo nzaa.

¹⁹Per leettsa myeen re patron nzaa, gagt raa tsow re zha gan temi kon nzaaʼa, tsa mzhen zha Paba rop Silas ne mndeno zha rop zha yuulow lo re zha nak tsiin.

²⁰Leettsa ngwalo mndaa zha rop zha lo zha kuu nak tsiin, tsa nzhab re zha: ―Re zha Israel ree ngetsee xgab re tawlazaa.

²¹Ne nloo zha tedib net re leyy kuu ndoblot kayaaʼaa ne neeka ndoblot tsowaa, tak zha Roma nakaa.

²²Tsa lee re men mnayii mne Paba rop Silas, oraaka lee re zha kuu nak tsiin mnabee, koche zha xab rop zha, tsa kin zha rop zha kon bar.

²³Bluz or ngwalo kwathoza mdin zha rop zha, tsaraa mloo zha zha tsib, ne mnabee zha lo re zha kuu nkenap roo tsib, tsa wen wen kenap zha rop zha.

²⁴Or tata mbin zha kuu nkenap roo tsib, tsa mloo zha Paba rop Silas ta mas naats leen tsib, ne key mloo zha nii rop zha leen thib le ya nachaa.

²⁵Per ngulal yaal lee Paba rop Silas mnaab ne mbil lo Diox, ne mbin re zha kuu nzo tsib kuu nzhool rop zha.

²⁶Tsa lee thib zho thoz mndelo mwin kuu thitanax mtsib asta simyent tsib. Ne leeka ora mzhaal reta pwert chaan tsib ne noga mzhak reta kaden kuu naliib re zha kuu nzo tsib.

²⁷Leettsa mroo mkaal lo zha kuu nkenap roo tsib, mwii zha lee re pwert tsib ndezhaal, oraaka mloo zha espad zha, tsa kuth zha leeka lee zha, tak mtsow zha xgab lee re zha kuu nzo tsib mzhonna.

²⁸Per lee Paba mrez ne nzhab lo zha: ―¡Kuthta lu, reta nee nzika nzhee!

²⁹Tsa lee zha kuu nkenap roo tsib mnaab xni, ne mzhonn zha mndaab zha leen tsib, ne lo tseba mtobxub zha lo Paba rop Silas.

³⁰Tsa mloo zha rop zha tya ne mnaabdiz zha lo rop zha: ―Ne goo lon, ¿naa kwan ndoblo tsowʼn, tsa tsow Diox laan gabil ne tsowʼn gan yalnaban kuu thitanax?

³¹Lee rop zha mkab, ne nzhab: ―Gwalaaz Jesús Zha Nabee, tsa tuyy Diox re falta ne falt re zha kuu nzo liza.

³²Ne mndaa zha kwent xkiiz Diox lo zha ne lo reta zha kuu nzo liz zha.

³³Leeka yaala lee zha kuu nkenap roo tsib, mteech re grid Paba rop Silas kuu mdin zha zha, tsaraa ngokleyy re lizta zha.

³⁴Ne mndeno zha rop zha ree liz zha ne mndaa zha kuu ndow zha, ne naley ngoo leettsoo re lizta zha, tak ngwalaaz re zha Diox.

³⁵Or ngwani yezlyu lee re zha kuu nak tsiin, mtaal chop tson soldad ngwayab lo zha kuu nkenap roo tsib, tsa telaa zha Paba rop Silas.

³⁶Tsa lee zha kuu nkenap roo tsib nzhab lo Paba: ―Lee re zha nak tsiin mnabee telaan goo; taka roo goo ne yat leettsoo goo ne wen tyaa goo.

³⁷Per lee Paba nzhab lo re soldada: ―¡Nee nak zha Roma! Ne ndewii re men yez mdin zha nee, ne neeka mnaabt zha kwent lo nee naa chu nap nee falt o napt neey, ne mloo zha nee tsib. Ne lee nal, ¿chebee nlaaz zha telaa zha nee xlaanta? ¡Rebeete! Ndoblo lee zha yaad koo nee.

³⁸Tsa lee re soldad ngwayab re koree lo re zha kuu nak tsiin, ne or mbin re zha lee rop zha nak zha Roma, kwathoz mzeb re zha.

³⁹Tsa lee re zha kuu nak tsiin ngwanaab Perdon lo Paba rop Silas, ne mloo zha rop zha ne nzhab zha lo rop zha, tsa roo zha yeza.

⁴⁰Or mroo rop zha tsib ngwa zha liz Lidia, ne mloney zha leettsoo re zha kuu nyelaaz Jesús, tsaraa mroo zha yeza.