Read Ozolotepec Zapotec Hechos 25 Bible Online

Hechos 25 - Ozolotepec Zapotec bible

Hechos 25

¹Or ndaʼa tson wiz mzin gobyern Festo Cesarea, tsa ngwa Festo Jerusalén.

²Tya lee re ngwleyy kuu nabee lo re ngwleyy ne re zha kuu nataak lo re zha Israel, ngwa keki Paba lo Festo.

³Tsa mnaab zha lo Festo taal Festo Paba Jerusalén. Tak lee xgab re zha nak kuth zha Paba net.

⁴Per lee Festo mkab ne nzhab: ―Lee Paba nzo tsib Cesarea, ne lee xgab da nak techopta wiz bretabʼn tya.

⁵Ne os cho goo, tak ya kon na Cesarea, ne os lee mbyiʼa mtsow thib kuu went, tya tak keki goo zha.

⁶Lee Festo mletka Jerusalén teeka xon wiz o tsii wiz, tsaraa mre Festo Cesarea, ne tedib wiza mndob Festo ta nabee Festo, ne mnabee Festo yaadno zha Paba.

⁷Ne or mtsino zha Paba, tsa lee re zha Israel kuu ndyaad Jerusalén, mbig zha ne mkeki zha Paba kon kwaro kuu nathoz, per gagt loo re zha wli kuu mbez re zha.

⁸Tsa lee Paba mkab ne nzhab: ―Neeka thib kuu went mtsowtʼn lo ley chaan re zha Israel, neeka lo gwodoo naro Jerusalén ne neeka lo César.

⁹Per lee Festo nlaaz wen yaan lo re zha Israel. Tsa mnaabdiz Festo lo Paba: ―¿Chu nlaaza yaʼa Jerusalén, tsa tya naabʼn kwent loʼa lo re koree?

¹⁰Paba mkab ne nzhab: ―Leen ndo lo zha kuu mto César zha kuu nabee Roma, ta ndoblo naaba kwent lon por re kuu mtsowʼn, ne wen neʼa yent kwan kuu went mtsowʼn lo re zha Israel.

¹¹Os leen mtsowʼn thib kuu went kuu ndoblon gathʼn, ne nitʼn kutht goo na, per os wlit re kuu nkeki re zha na, yent cho ndoblo taan lo re zha kuu nayii nen, mas wen btaalʼn lo César, tsa naab César kwent lon.

¹²Tsa or ngwalo mnaabdiz Festo lo re zha nzhaak kuu nteni Festo, tsa nzhab Festo lo Paba: ―Lu mnaab yaʼa lo rey César, mbay nal yaʼa lo César tsa. Paba mndo lo rey Agripa

¹³Or mriida chop tson wiz, tsa lee rey Agripa rop Berenice mzin Cesarea ne ngwanii rop zha “diox” lo gobyern Festo.

¹⁴Ne tak tyen wiz mlet rop zha tya, tsa lee Festo mndaa kwent chaan Paba lo rey, ne nzhab: ―Nzhee nzo thib mbyi kuu mtaan Bech tsib.

¹⁵Ne leettsa ngwan Jerusalén, lee re ngwleyy kuu nabee lo re ngwleyy kon re zha kuu nabee xid re zha Israel mkeki re zha zha ne mnaab zha lon, tsa nabeen gath zha.

¹⁶Per lee na nzhap lo re zha: “Lee re nee zha Roma napt nee costumr nabee nee kuth zha thib zha, leettsa ter to nee zha lo re zha kuu nkeki zha, tsa ne nee naa chu wli o wlit kuu nkeki zha zha”.

¹⁷Per or myaad re zhaʼa nzhee, mtsantʼn sinke tedib wiza mndobʼn lo asi da ta nabeen, ne mnabeen myaadno zha mbyiʼa.

¹⁸Per lee re zha kuu myaad mkeki mbyiʼa, mtetht zha neeka thib kuu nathoz taxal mtsowʼn xgab.

¹⁹Beeta kuu mbez re zha nak kwent chaan kostumr re zha, ne kwent chaan Jesús thib zha kuu ngutha, per lee Paba mbez naban Jesús.

²⁰Ne netʼn naa xomod texnetʼn kwenta, tsa mnaabdizʼn lo zha naa chu nlaaz zha ya zha Jerusalén, tsa tya naab zha kwent lo zha.

²¹Per lee zha mnaab taalʼn zha lo César, tsa tya naab César kwent lo zha, kona mnabeen yoka zha tsib, asta leettsa tak taalʼn zha lo César.

²²Tsa nzhab rey Agripa lo Festo: ―Os take noga na nlazʼn gon na kuu ni mbyiʼa. Ne lee Festo mkab ne nzhab: ―Yee tsa gona kuu ne zha.

²³Ne lee tedib wiza lee rey Agripa rop Berenice mdok lar kuu mas wen na ne mzin zha kon re soldad kuu nabee lo thib gayoo soldad, ne kon re zha kuu nataak yez, ne mzin zha leen yuu ta gon zha kuu gab Paba, ora mnabee Festo ngwaxii zha Paba.

²⁴Tsa nzhab Festo: ―Rey Agripa, ne reta goo kuu nzi nzhee. Lee mbyi kuu ngwii goo nzhee. Reta zha Israel zha Jerusalén ne re zha nzhee, naab zha lon ne mbez zha ndoblot ban mbyi baa.

²⁵Per leen ndak mtsowt zha neeka thib kuu went par ndoblo zha gath zha, per leeka lee zha mnaab zha ya zha lo César. Ne mlooʼa na yekʼn taalʼn zha lo César.

²⁶Per netʼn naa kwan keen lo yeets kuu taalʼn lo César, kwent chaan zha ree, kona mton zha lo re goo, ne loʼa rey Agripa, tsa naabdiza lo zha, tsa tak gon lut kuu keen lo César, or yelo naabdiza lo zha.

²⁷Tak ndakʼn went taalʼn thib zha kuu nzo tsib lo César ne gabtʼn naa kwan mtsow zha.