Read Ozolotepec Zapotec Hechos 6 Bible Online

Hechos 6 - Ozolotepec Zapotec bible

Hechos 6

¹Ne re wiza lee re zha kuu nyelaaz Jesús ndiy nzhak mas plo, ne lee re zha Jesús kuu ndediz diiz gryeg, mndelo mtob kej kwent chaan re zha kuu ndediz Hebreo. Mbez zha ke reta wiz, leettsa ngiid zha kuu wu re byud, lee re byud kuu ndediz gryeg nkayaat ploy, taxal nkayaa re byud kuu ndediz Hebreo.

²Tsa lee re tsiibchop apóstl mkaltaa re zha kuu nyelaaz Jesús, ne nzhab re apóstl lo re zha: ―Went os laa nee taat raa nee kwent xkiiz Diox, par kiid nee kuu wu re men.

³Kona wets ne btan, bli goo gaz mbyi xid re goo, zha kuu nzhak ne nali nak ne kuu nabee Mbi Nayon leettsoo, tsa taa nee tsiin ree tsow zha.

⁴Ne lee re nee naabka lo Diox ne taa nee kwent xkiiz Diox.

⁵Reta zha mkab nzhab tata gake, ne mli zha Steb, thib mbyi kuu wlipaa nyelaaz Jesús ne kwaro nabee Mbi Nayon leettsoo zha, Lip, Prócoro, Nicanor, Timón, Pármenas ne Nicolás zha yez Antioquía (zha ree ngok zha Israel).

⁶Tsa mndeno zha re gazta re zha ree lo re apóstl, ne lee re apóstl mxoob yaa yek re zha, ne mnaab re zha lo Diox por re gazta zha ree.

⁷Ne lee xkiiz Diox masraa mraats, ne lee re zha kuu nyelaaz Jesús ndiy ngeyak mas plo raa yez Jerusalén. Ne asta kwaro re ngwleyy noga ngwalaaz Jesús. Mzhen zha Steb

⁸Lee Steb kwaro nabee Mbi Nayon leettsoo ne mndaa Diox yalnabee lo Steb, mndaa Diox diiz tsow Steb kwaro milagr ne re kuu thoz lo re men yez.

⁹Ne lee chop tson zha kuu nteed xkiiz Diox thib ta le: “Re men Libr” mndelo zha mbyodiz kon Steb, re zha ree ndyaad re yez ree, yez Cirene ne zha yez Alejandría, ne zha kuu ndyaad yezlyu Cilicia, ne re zha kuu ndyaad yezlyu Asia.

¹⁰Per yet roo re zha lo yalnzhaak chaan Steb, tak lee Steb ndediz kon yalnzhaak chaan Mbi Nayon.

¹¹Tsa mdix re zha lo chop tson mbyi, tsa gab re zha ree lee Steb nlooz Moisés ne Diox.

¹²Ne tabaa mtsow re zha, tsa mbyii re zha yez, re zha gol ne re maestr chaan ley. Tsa mzhen zha Steb ne mndeno zha Steb lo re zha kuu nak tsiin.

¹³Ne noga mkwaan re zha re zha kuu nkedi nzhab: ―Lee mbyi ree thibka nlooz gwodoo Nayon chaan Diox ne ley Diox.

¹⁴Ne re nee mbin nzhab zha lee Jesús, zha Nazaret luux gwodoo, ne tsee zha costumr kuu mlaa Moisés lo reʼaa.

¹⁵Lee re zha kuu nak tsiin kon reta zha kuu nzi tya, or mwii re zha lo Steb, lee lo Steb mloo taxal lo thib mandad chaan Diox.