Read Ozolotepec Zapotec Hechos 9 Bible Online

Hechos 9 - Ozolotepec Zapotec bible

Hechos 9

¹Lee Saulo be nayiika ne re zha kuu nyelaaz Jesús, ne nlaaz Saulo kuth re zha. Tsa ngwa Saulo lo ngwleyy kuu nabee lo reta ngwleyy.

²Ngwanaab Saulo thib yeets, tsa tak ya Saulo yez Damasco re ta nkaltaa re zha nteed zha xkiiz Diox, tsa liib Saulo mbyi na ngot kuu nyelaaz Jesús, ne teno Saulo zha tsa yo zha tsib yez Jerusalén.

³Per leettsa ndo Saulo net gaxta yez Damasco, tsa cha mroo thib xni lobee kuu mla dita ta ndo Saulo.

⁴Tsa ngob Saulo lo yu, ne mbin Saulo thib bos kuu nzhab lo Saulo: ―Saulo Saulo, ¿chebee ndrekeʼa ditsʼn?

⁵Tsa mnaabdiz Saulo: ―¿Cho naka Zha Nabee? Ne lee bosa mkab lo Saulo, ne nzhab: ―Na nak Jesús, zha kuu ngerekeʼa dits.

⁶Gwateli ne gwa yez Damasco, tya ne zha loʼa naa kwan ndoblo tsowa.

⁷Ne lee re zha kuu nda kon Saulo kwathoz mzeb zha, tak mbin zha bos, per yent kwan mloo lo zha.

⁸Tsa ngwache Saulo; ne or mxaal Saulo ngutlo Saulo, nyenit raa ngutlo Saulo. Tsa mzhen re zha kuu nda kon lee Saulo yaa Saulo ne mndeno zha Saulo yez Damasco.

⁹Tya ngoo Saulo tson wiz ne ngwanit lo Saulo, neeka thib kuu ndowt Saulo ne neeka thib kuu ngwiit Saulo.

¹⁰Ne yez Damasco nzo thib mbyi kuu le Ananías kuu nyelaaz Jesús. Ne lee Jesús ngwanii lo Ananías, ne nzhab lo Ananías: ―¡Ananías! Tsa lee Ananías mkab ne nzhab: ―Leen ndo nzhee, ¿kwan nlaaza Zha Nabee?

¹¹Ne lee Zha Nabee nzhab lo Ananías: ―Bteli ne gwa kay kuu le Nali, ne liz Judas naabdiza thib mbyi zha yez Tarso kuu le Saulo, tak lee Saulo ngenaab lon.

¹²Tak lo Saulo ngwani thib mbyi kuu le Ananías, kuu mndaab ne mxoob yaa yek Saulo, tsa yeni lo Saulo tedib welt.

¹³Or mbin Ananías kona, tsa nzhab Ananías: ―Zha Nabee, kwaro zha ndaa kwent chaan mbyiʼa lon, ne re kuu went kuu ntsow Saulo lo re zha kuu nyelaaza Jerusalén.

¹⁴Ne lee nal ndyaad Saulo nzhee ne nap Saulo yalnabee chaan re ngwleyy kuu nabee lo re ngwleyy, tsa ten Saulo re zha kuu nyelaaz lu nzhee ne teno Saulo re zha Jerusalén.

¹⁵Per lee Zha Nabee nzhab lo Ananías: ―Gwa, tak mliʼa na mbyiʼa par taa zha kwent xkizʼn lo re zha kuu nagt zha Israel, ne lo re rey yezlyu, ne noga lo re zha Israel.

¹⁶Na loo lo Saulo lee Saulo ndoblo rid kwathoz yalti, leettsa taa Saulo kwent xkizʼn.

¹⁷Tsa lee Ananías ngwa yuu ta mlet Saulo, ne or mndaab Ananías, tsa mxoob Ananías yaa Ananías yek Saulo, ne nzhab Ananías: ―Wets Saulo, lee Jesús Zha Nabee kuu ngwani loʼa or ndyaada net mtaalʼn, tsa yeni loʼa tedib welt, ne kayaaʼa Mbi Nayon chaan Diox leen leettsooʼa.

¹⁸Ne oraaka ngob thib kuu na taxal med mbel ngutlo Saulo, ne mre ngwani lo Saulo tedib welt, tsa ngwateli Saulo ne ngokleyy Saulo.

¹⁹Tsaraa ndow Saulo tsaraa mkaa Saulo fwers, ne mlet Saulo thiban wiz lo re wets kuu nyelaaz Jesús kuu nzo yez Damasco. Saulo mndaa kwent xkiiz Diox yez Damasco

²⁰Tsa lee Saulo mndelo mndaa kwent xkiiz Diox, lo re men ta nkaltaa re zha Israel nteed xkiiz Diox, ne mbez Saulo lee Jesús nak Xgann Diox.

²¹Reta zha kuu nzhon kuu mbez Saulo; mzegey leettsoo re zha ne mbez zha: ―¿Chu leet zha ree kuu ndreke dits re zha Jerusalén kuu nyelaaz Jesús? ¿Chu ndyaadt zha nzhee, tsa ten zha re zha kuu nyelaaz Jesús ne teno zha zha lo re ngwleyy kuu nabee lo re ngwleyy?

²²Ne taxal ndriid wiz lee Saulo ngoo ney raa leettsoo, ndaa kwent xkiiz Diox, ne kwathoz nambi nzhab Saulo lee Jesús nak Crist Kuu Mtaal Diox Nabee, tsa lee re zha Israel kuu nzo Damasco, net zha naa kwan tsow zha xgab. Saulo mzhonn yez Damasco

²³Ne lutta ngwatey lee re zha Israel kuu nzo Damasco myaan diiz kuth Saulo,

²⁴per myeen Saulo lee re men nlaaz kuth Saulo. Tse ne yaal ntow zha lo Saulo roo pwert yez, tsa kuth zha Saulo.

²⁵Per lee re zha kuu nyelaaz Jesús, yaal mloo zha Saulo leen thib chekwit ne mlaa zha Saulo lad cho blaa kuu now dita yez. Tbaa mroo Saulo yez. Saulo mzin Jerusalén

²⁶Leettsa mzin Saulo Jerusalén, ngwalaaz Saulo gakaltaa kon re zha kuu nyelaaz Jesús tya; per reta zha nzeb lo Saulo, tak nyelaazt re zha lee Saulo nyelaaza Jesús.

²⁷Per lee Bernabé ngwano Saulo lo re apóstl. Ne nzhab Bernabé naa xomod mwii Saulo ne mni Jesús lo Saulo or ndo Saulo net nda Saulo yez Damasco. Ne xomod mzebt Saulo mndaa Saulo kwent chaan Jesús yeza

²⁸Tsa lee Saulo myaan Jerusalén ne ndiy Saulo kon re zha. Ne mzebt Saulo ndaa kwent chaan Jesús.

²⁹Ndediz Saulo ne ngyodiz Saulo kon re zha Israel kuu ndediz diiz gryeg; per lee re zha ree nlaaz kuth Saulo.

³⁰Leettsa myeen re zha kuu nyelaaz Jesús kona, tsa mndeno zha Saulo asta yez Cesarea, ne tya mtaal zha Saulo yez Tarso.

³¹Tsa lee re zha kuu nyelaaz Jesús, kuu nzo re yez chaan Judea chaan Galilea ne chaan Samaria, wen ngoo re zha tak ndreket raa zha dits zha, ne xlaazga mas wen myen re zha xkiiz Diox ne nzhon zha diize, ne lee Mbi Nayon mtsow masraa myazh re zha kuu nyelaaz Jesús. Eneas mgwe

³²Ne leettsa ndiy Pey re yez nyatwii Pey lo re zha kuu nyelaaz Jesús, noga ngwa Pey lo re zha kuu nyelaaz Jesús kuu nzo yez Lida.

³³Tya mzal Pey thib mbyi kuu le Eneas, kuu nax ne ndak ne ndaʼa xon liin gagt gwin Eneas.

³⁴Tsa nzhab Pey lo Eneas: ―Eneas, mtegweʼa Jesucrist lu. “Gwache ne blit daʼa”. Ne oraaka ngwache Eneas.

³⁵Ne mne reta zha kuu nzo yez Lida ne re zha kuu nzo laats Sarón kona, ne ngwalaaz zha Jesús. Dorcas mroban

³⁶Ne tsya ngoo thib ngot kuu nyelaaz Jesús yez Jope, kuu lee Tabita (diiz gryeg le zha Dorcas). Lee ngot ree thibka mtsow yalwen, mtsow Dorcas ayud re zha prob dita lo mban Dorcas.

³⁷Ne re wiza mlen liz Dorcas ne nguth Dorcas, ne ngwalo mtegat zha Dorcas, tsa mxoob zha Dorcas leen yuu kuu ndob yek yuuʼa.

³⁸Ne gax yez Jope nzi yez Lida ne tya ndo Pey, ne or mbin re zha kuu nyelaaz Jesús lee Pey ndo tya, tsa mtaal zha chop mbyi ngwachez Pey, ne nzhab re zha lo Pey: ―Tsow yalwen nda yez Jope.

³⁹Tsa mndeke Pey dits rop zha, ne or mzin re zha, tsa mndeno zha Pey yuu ta nax thebol, tya nzi re ngot byud nzhonn, ne mloo re ngot re lar kuu mdexkwaa Dorcas lo Pey, leettsa bee naban Dorcas.

⁴⁰Tsa mnabee Pey mroo reta zha kuu nzi tya, tsa mtobxub Pey ne mnaab Pey lo Diox: Ne ora mwii Pey lo thebol ne nzhab Pey: ―¡Tabita, gwache! Tsa lee ngot mxaal lo, ne or mxaal ngot lo ngot mwii ngot lo Pey, ne mndob ngot.

⁴¹Ne lee Pey mzhen yaa ngot mtsow ayud ngot mndeli ngot, tsaraa mrez Pey re zha kuu nyelaaz Jesús ne re byud, tsa mwii re zha lee ngot naban.

⁴²Ne dita yez Jope myath koree ne kwaro zha ngwalaaz Jesús.

⁴³Ne lee Pey myaan thiban wiz yez Jope liz thib zha le Simún kuu nteguuz yid.