Read Ozolotepec Zapotec Romanos 12 Bible Online

Romanos 12 - Ozolotepec Zapotec bible

Romanos 12

¹Kona nin lo re goo wetsʼn ne btan na, mlat leettsoo Diox mne Diox reʼaa, kona ndoblo taaʼaa dita lee lo Diox; taxal thib maa kuu nzhuth zha ne ndaa zha gon lo Diox. Koree nak thib gon kuu naban ne nambi kuu ndoblo taaʼaa lo Diox, ne ndoblo golaa lo Diox kon kuu taaʼaa lo Diox; tak koree nak kuu nyow leettsoo Diox.

²Ne ndoblot tsowaa re kuu ntsow re men yezlyu ree, sinke ndoblo laaʼaa tsee Diox re xgabaa, tsa neʼaa naa kwan re kuu nlaaz Diox tsowaa, re kuu wen, re kuu nyow leettsoo Diox ne re kuu nali nak.

³Ne lo yalnkelaaz chaan Diox mtaal Dioxʼn par tsow tsiin ree, kona nin ne naabʼn lo goo, neeka thib goo ndoblot tsow xgab, lee goo kwathoz nataak, sinke mas wen ndoblo kobeeʼaa re kuu tsowaa tak nyelaazaa Diox.

⁴Leeka taxal nap kwerp men tyen ta, ne kadta thibe nape thib tsiin kuu ntsowe,

⁵leeka tata kwathozaa, per thibka kwerp chaan Jesucrist nakaa, ne ndecheʼaa thibaa ne tedibaa.

⁶Ne lo yalwen chaan Diox, zhaa zhaa kuu nataak mndelaaz Diox lo thiba ne thibaa par tsowaa. Os lee Diox mndaa Diox diiz loʼaa gakaa profet re men, ndoblo tsowaay taxal nyelaazaa Diox.

⁷Ne os lee Diox mndaa Diox loʼaa tsowaa ayud tedib net zha, ndoblo wen tsowaay. Ne os mndaa Diox loʼaa looʼaa xkiiz Diox lo tedib net zha, ndoblo tsowaay.

⁸Loka cho zha mkayaa teni re wetsaa ne re btanaa, ndoblo tsow zhay thib mod wen, loka cho zha mkayaa talaaz thib kuu lo tedib zha, ndoblo tsow zhay kon dib ndroo leettsoo zha. Loka cho zha mkayaa lo Diox nabee zha lo re zha Jesús, ndoblo nali tsow zhay, loka cho zha mkayaa lat leettsoo ne re zha kuu ndeche kwaa, ndoblo tsow zha ayud zha kuu ndeche kwaa, kon dib ndroo leettsoo zha. Kuu ndoblo tsow re zha kuu nyelaaz Diox

⁹Ndoblo ke leettsooʼaa thibaa ne tedibaa. Ndoblo laaʼaa re kuu went, ndoblo tekeʼaa dits kuu wen.

¹⁰Ndoblo tataka ke leettsooʼaa thibaa ne tedibaa re wetsaa ne re btanaa, ne ndoblo tsowaa xgab mas wen tedibaa nake leeʼaa.

¹¹Ndoblo koʼaa gan keʼaa tsiin lo Zha Nabee, ne ndoblot gakaa zha tsaab.

¹²Ndoblo naley yo leettsooʼaa, tak ndobke leettsooʼaa kuu ngebetaa; ndoblo xekaa leettsa ndriidaa yalti ne thibka ndoblo tedizaa ne naabaa lo Diox.

¹³Ndoblo tsowaa ayud re wetsaa ne re btanaa, leettsa ndeche zha thib kwaa. Ne ndobloʼaa kayaaʼaa re zha kuu tsin lizaa.

¹⁴Ndoblo naabaa lo Diox por re zha kuu ndralnoʼaa; ne ndoblo naabaa kuu wen par lee zha, naabtaa tsa kode Diox zha.

¹⁵Ndoblo naley yo leettsooʼaa kon re zha kuu naley nzo leettsoo, ndoblo gonnaa kon re zha kuu nzhonn.

¹⁶Ndoblo wen yoʼaa thibaa ne tedibaa. Ndoblot naro tsowaa, sinke ndoblo tsaal leettsooʼaa neʼaa re zha prob, ne ndoblot rubaa leeʼaa nzhaak.

¹⁷Os cho zha mtsow kuu went loʼaa, ndoblot leeka tata tsowaa lo zha. Ndoblo thibka yo yekaa tsowaa kuu wen lo reta men.

¹⁸Ndoblo tsowaa tsa wen kwinaa kon reta men, asta plo take loʼaa.

¹⁹Reta goo wetsʼn ne btan na kuu kwathoz nke leettsoon, ndoblot tsowaa leeka kuu went lo zha kuu mtsow kuu went loʼaa, ndoblo laaʼaa tsa lee Diox naab kwent lo zhaʼa; taxal nzhab lo xkeets Diox: “Na naab kwent lo zha, na yizh lo zhaʼa ne Zha Nabee”. [Dt. 32:35]

²⁰Por kona. “Os lee zha kuu nayii neʼa nlann, taa kuu wu zha, ne os nzheek leettsoo zha, taa kuu gu zha; tak leettsa ntsowa koree tsowa thoy zha ne tsowa kwib masraa ki dits zha”. [Pr. 25:21-22]

²¹Taataa diiz tsow kuu went gan loʼaa, sinke ndoblo tsowaa kuu wen, tsa tsowaa gan lo kuu went.