Read Ozolotepec Zapotec Romanos 3 Bible Online

Romanos 3 - Ozolotepec Zapotec bible

Romanos 3

¹¿Kwan ntsow nee gan tak nak nee zha Israel? Ne ¿pa nataak nke seny nee?

²Nataake tak lo re nee mndaa Diox xkiiz Diox.

³Wene, ¿per kwan gak os lee thib re tawlaz nee yelaazt raa Diox? ¿Chu kona tsow laa Diox ne gagt raa Diox nali lo nee?

⁴¡Nagte tata! Thibka ntsow Diox kuu ni Diox, tegal reta men nak zha kuu nkedi; tak lo xkeets Diox nzhab:Diox reta men ne, nali naka lo re kuu niʼa,ne os cho naab kwent loʼa, lu tsow gan. [Sal. 52:4]

⁵Per os por re kuu went kuu ntsowaa, nloo lee Diox nali nak, ¿kwan gabaa? ¿Chu went nak Diox kona nayii Diox leettsa ntsowaa kuu went, ne nteti Diox reʼaa? (Per tak men na kona tabaa mbezʼn.)

⁶¡Nagte tata! Tak os lee Diox nalit nak Diox, ¿Xomod naab Diox kwent lo reta men yezlyu ree?

⁷Per os por nkedin, kona ntsow nloo kuu wli chaan Diox, ne os por nkedin ntsow nataak zha Diox ¿Chebee bee naab Diox kwent lon taxal lo zha kuu ndab falt?

⁸Os tatay, tak gabaa. “Tsowaa kuu went tsa loo kuu wen”, taxal nlooz zha nee ni zha lee nee tabaa nloo nee, per wlipaa teteti Diox re zha kuu tata nak. Retalee nakaa zha kuu ndab falt

⁹¿Kwan ntsow goo xgab? ¿Chu ndak goo mas nataak nee nake tedib net re men? ¡Nagte tata! Taxal mkeeʼa na, lee Diox naab kwent lo reta men, lo re zha Israel ne lo re zha kuu nagt zha Israel, tak reta zha zha ndab falt nak zha.

¹⁰Taxal nke lo xkeets Diox:¡Thitanax neeka thib zha nali yent!¡Neeka thib zha!

¹¹Neeka thib zha nyente, neeka thib zha nkwaant Diox.

¹²Reta zha mlaa zha Diox,reta zha mzhen net went,lalka ngok re zha myaan bxen zha.¡Yent neeka thib zha kuu ntsow kuu wen!¡Neeka mase thib zha! [Sal. 14:1-3]

¹³Lee yeer yen zha nak taxal roo baa kuu ndezhaal,Kon loz zha nkedi zha. [Sal. 5:9]Lee re diiz kuu ndediz zha, nak taxal nit kwaan kuu ndroo xann keley mbeel. [Sal. 140:3]

¹⁴Ne kon roo zha ngode zha re men, ne leeka kon roo zha ni zha re diiz nayan lo re men. [Sal. 10:7]

¹⁵Ne kon rop nii zha nda zha lijer par kuth zha taben zha.

¹⁶Reta ta nda zha ntsow zha ngyo re men ne ntsow zha ndriid re men yalti.

¹⁷Net zha kuu wen kwin re men. [Is. 59:7-8]

¹⁸Ne thitanax nzebt zha ne zha Diox. [Sal. 36:1]

¹⁹Ne neʼa lee, lee reta kuu nzhab lo ley chaan Diox, lo re zha kuu nyelaaz ley lo re zhaʼa ni ley. Kona neeka thib re zhaʼa gagt gab zha, net zha naa kwan nak falt, leettsa naab Diox kwent lo reta men.

²⁰Gagt gakaa zha wen lo Diox, anta por nyelaazaa ley. Tak por lee ley neʼaa re kuu went ne por lee ley neʼaa nakaa zha kuu ndab falt. Tsow zha gan yalnaban tak nyelaaz zha Jesucrist

²¹Per lee nal laaʼaa ley thib lad, tak mlooʼa Diox naa xomod nali toʼaa lo Diox, ne leeka ley ne re profet kuu ngoo ndala mndaa kwent naa xomod ndoblo nali toʼaa lo Diox.

²²Nakaa zha nali lo Diox, tak nyelaazaa Jesucrist ne por Jesucrist reta men tak gak zha nali lo Diox, tak lalta nak reta men lo Diox.

²³Reta men mtsow kuu went, ne ndoblot zha ndya zha lo Diox.

²⁴Per por yalwen chaan Diox kayaa Diox reʼaa, taxal zha nali ne mtelaa Diox reʼaa, por kuu mtsow Jesucrist.

²⁵Mlaa Diox nguth Jesucrist delant lo re men por retalee, leettsa mxo Jesucrist ren por lee, tsa wen kwinaa kon Diox tak nyelaazaa nguth Jesucrist; ne mloo Diox wlipaa nke leettsoo Diox reʼaa, kona mxek leettsoo Diox mne Diox reʼaa lo reta kuu went kuu mtsowaa ndala,

²⁶tsa ne re men nal tyemp ree lee Diox wlipaa nali nak, ne tsa ne re men lee Diox kayaa men, taxal zha nali tak nyelaaz men Jesucrist.

²⁷Kona, ¿plo nyaan yalbrub chaan re men lo Diox? ¡Mluzhe! Tak gagt gak zha zha nali lo Diox, tak nzhon zha kuu nzhab lo ley chaan Moisés; sinke tak nyelaaz zha Jesucrist, kona nak zha zha nali lo Diox.

²⁸Kuu yelo nin lo goo nak, nkib Diox falt zha, tsa gak zha zha nali lo Diox, tak nyelaaz zha Jesucrist, ne nagte, tak nzhon zha diiz kuu nzhab lo ley.

²⁹¿Chu anta Diox re zha Israel nak Diox? ¿Chu nagt Diox, Diox reta zha kuu nagt zha Israel? Wlipaa lee Diox nak Diox chaan reta men kuu nzi dita lo yezlyu,

³⁰tak thibka Diox nzo; ne lee Diox kayaa re zha taxal zha nali tak nyelaaz zha Jesús, tegal nke seny re zha Israel zha o nkete zha.

³¹Kona, ¿kwan ntsow goo xgab? ¿Chu ntsow nataagtaa ley tak nyelaazaa Jesucrist? ¡Nagte tata! Sinke tata mod nlooʼaa nataaka ley.