Read Ozolotepec Zapotec 1ª de Corintios 5 Bible Online

1ª de Corintios 5 - Ozolotepec Zapotec bible

1ª de Corintios 5

¹Kwathoz nyath lee thib re goo nzhak rop kon tsaal xut. ¡Ne koree nak thib kuu thitanax went, neeka re zha kuu nyelaazt Jesucrist ntsowt kona!

²¡Ne bee naro nzhak goo! ¡Mas wen ndoblo nabil yo leettsoo goo, ne ndoblo koo goo zha kuu mtsow kona xid goo!

³Tegal ndotʼn lo goo per lee xgab da ndo lo goo, ne mlobeeʼa na kwan gak kon zha kuu tata mtsowa.

⁴Leettsa kaltaa goo par texnet goo kwent ree, lee xgab da to kon re goo ne kon yalnabee chaan Jesucrist,

⁵btaa goo zhaʼa lo yalnabee chaan Maxuuy, tsa lux re kuu nlaaz kwerp zha, tsa lee xbi zha tsow gan ndya yibaa wiz kuu bretab Jesucrist.

⁶Ndoblot naro tsow goo por re kuu went kuu ntsow goo, o ¿chu net goo lut lebadur ntsow nyezhoob dita koob?

⁷Kona bloo goo lebadur kuu nap goo lee, tak lee lebadura ntsow nyezhoob koob, bloo gooy tsa gak goo taxal pan kuu mdexkwaa kon koob kub kuu nyoot lebadur, kuu nzhow zha lo ani Paskw. Tak Jesucrist mke lo kruz, ne lee Jesucrist ngok mbak zhiil lo ani Paskw.

⁸Kona ndoblo tsowaa ani Paskw, thib mod wen ne nali, kuu nak taxal pan kuu nyoot lebadur, ne tsowtleey kon re kuu went ne kon re kuu nambit, kuu nak taxal lebadur.

⁹Lo tedib xkeetsʼn kuu mkeen lo goo, nin lo goo ndoblot kaltaa goo kon zha kuu nzhak rop kon ndota zha.

¹⁰Ne leettsa mnin koree lo goo, nitʼn lo goo lee goo ndoblot kaltaa goo kon reta zha yezlyu ree, re zha kuu nzhak rop kon ndota zha, re zha kuu ndablaaz, zha wann, zha kuu nyelaaz re diox kuu wlit nak Diox, tak os lee goo nlaazt goo kaltaa goo kon re zhaʼa, tsasi thitanax ndoblo roo goo yezlyu ree.

¹¹Kuu nlazʼn nin lo goo nak: Ndoblot kaltaa goo kon thib zha kuu mbez nyelaaz Jesús ne nzhak rop zha kon ndota zha, zha ndablaaz, zha nyelaaz re diox kuu nagt Diox, zha nlooz, zha gwiy, zha wann, neeka ndoblot tob goo wu goo kon re zha kuu tabaa nak.

¹²Tak ndoblotʼn naabʼn kwent lo re zha kuu nagt zha Jesús, Diox naab kwent lo re zhaʼa. Per lee re goo ndoblo naab goo kwent lo re zha kuu nyelaaz Jesús, kona ndoblo koo goo zha kuu tata ntsowa xid goo.