Read Ozolotepec Zapotec 2ª de Corintios 13 Bible Online

2ª de Corintios 13 - Ozolotepec Zapotec bible

2ª de Corintios 13

¹Koree gak myon welt yalʼn lo goo. Ne kuu gab chop o tson testig tata texnet reta kuu.

²Lo re goo kuu mtsow kuu went ndala, ne lo reta goo mniʼa na leettsa ngwan lo goo mrop welt, ne lee nal kuu ndon tith bren nin lo goo tedib welt, os leen yalʼn lo goo, latta leettsoon nen goo.

³Tak lee re goo nkwaan goo thib kuu wlipaa loo lee na ni kwent Jesucrist lo goo. Lee Jesucrist nagt Jesucrist thib zha neyt lo goo, sinke wlipaa nloo Jesucrist lo goo lee Jesucrist ney.

⁴Wli taxal thib zha neyt mke Jesucrist lo kruz, per naban Jesucrist kon yalney chaan Diox. Ne leeka tata, lee nee nak nee taxal zha neyt por Jesucrist, per kon yalney chaan Diox wlipaa tabanaa kon Jesucrist.

⁵Leeka goo wii goo naa xomod nak goo ne bloo goo mod kuu nak goo, tsa ne goo naa chu wli nali ndo goo nyelaaz goo Diox. O ¿chu net goo lee Jesucrist nzo leettsoo goo? ¡Per nzot Jesucrist leettsoo goo, os lee goo mlaa goo Jesucrist!

⁶Per nlazʼn yen goo, lee nee nagt nee zha kuu nzhont diiz lo Diox nali nzi nee lo Diox.

⁷Ne thibka naab nee lo Diox, tsa tsowt goo neeka thib kuu went, ne nagte tak nlaaz nee loo nee wen nak nee, sinke nlaaz nee tsow goo kuu wen, tegal lee nee, nak nee taxal zha kuu nataagt lo goo.

⁸Tak ndoblot ni nee kuu wlit, sinke beeta kuu wli ni nee.

⁹Kona naley nzo leettsoo nee, leettsa nak nee taxal zha neyt, tsa lee goo to ney goo lo Diox, ne thibka tenaabka nee lo Diox tsa thib wiz ne tedib wiz nali to goo lo Diox.

¹⁰Kona ngekeen yeets ree lo goo nal kuu bee ter yalʼn lo goo, tsa leettsa yalʼn lo goo, yiitʼn lo goo kon yalnabee kuu mndaa Zha Nabee lon, mndaa zha yalnabee ree lon, per nagte par luuzhʼn goo, sinke leey nak par ney to goo lo Diox. Lee Paba mni “diox” bluz

¹¹Kuu yelo nin lo re goo wetsʼn ne btan na nak, naley bloo goo leettsoo goo, nali gwatsin goo lo Diox, bteni goo altaa goo, thibka kuu btsow re goo xgab, wen brin goo ne lee Diox kuu nke leettsoo lee, ne ntsow wen nziʼaa, to kon reta goo.

¹²Bni goo “diox” lo altaa goo, ne dow goo thib chut kwat altaa goo, thib mod nali.

¹³Reta zha kuu nyelaaz Jesucrist, zha kuu nzi nzhee, ni “diox” lo re goo.

¹⁴Nlazʼn thibka taa Jesucrist yalwen chaan Jesucrist lo goo, noga nlazʼn thibka ke leettsoo Diox goo ne lee Mbi Nayon chaan Diox nzo leettsoo goo. ¡Tbaa gake! Paba