Read Ozolotepec Zapotec 2ª de Corintios 3 Bible Online

2ª de Corintios 3 - Ozolotepec Zapotec bible

2ª de Corintios 3

¹Leettsa ni nee re koree, ndak goo ndrub nee, tak lee Diox mtaal nee lo goo. Ne ser ndak goo ndoblo nee loo nee thib yeets goo, kuu nke naa cho mtaal nee lo goo, o ndak goo ndoblo naab nee lo goo, tsa taa goo thib yeets lo nee, taxal ntsow tedib net zha.

²Goo nak taxal yeets kuu nke leettsoo nee kuu ndaa kwent, lee nee nak apóstl chaan Jesucrist; yeets kuu reta men nlebee ne nlab.

³Ne goo nak taxal yeets kuu mkee Jesucrist, tak mkayaa goo xkiiz Diox kuu mndaa nee kwent lo goo ne nzhon goo diize. Goo nak taxal thib yeets kuu mket kon tint laps, sinke leey mke kon Mbi Nayon chaan Diox kuu naban; ne nagte diiz kuu mke lo ke, taxal kuu mndaa Diox lo Moisés, sinke leey mke leettsooʼaa.

⁴Ne por Jesucrist ne nee wli koree, kona ne neey lo goo.

⁵Gagt gab nee anta nee ntsow thib kwaa, tak gagt kwan tsow nee anta nee; reta kuu ntsow nee, Diox ntsow ayud nee kona ntsow neey.

⁶Ne lee Diox mteteed nee, kona nke nee tsiin lo trat kub kuu mtaan Diox. Ne nagte diiz kuu mke lo ke, taxal ley kuu mndaa Diox lo Moisés; leey nak diiz kuu mkee Mbi Nayon leen leettsoo men. Lee ley kuu mke lo ke ntsow nzhath men, per lee Mbi Nayon chaan Diox ndaa yalnaban lo men.

⁷Lee ley kuu mke lo ke kuu mndaa Diox lo Moisés, kon xni thoz mndaa Diozhe, kona lee re tey nee zha Israel zha ndala, ngogt raa gawii zha lo Moisés, tak kwathoz nla xni lo Moisés, per lee xniʼa zhega zhega myuye. Lee ley kuu ntsow nzhath re men mndaa Diozhe kon kwathoz xni,

⁸¡per masraa wen thoz nak xni chaan trat kub kuu mndaa Diox kon Mbi Nayon chaan Diox!

⁹Ne os lee ley kuu mtsow nzhath men mndaa Diozhe kon xni thoz, ¡masraa kwathoz nataak trat kub kuu mndaa Diox loʼaa, tsa nali toʼaa lo Diox!

¹⁰Tak lee xni chaan ley kuu mndaa Diox lo Moisés, neeka lut yewalt naka kon xni thoz chaan trat kub.

¹¹Os lee ley chaan Moisés kuu nlux nake, ne ngoke thib kuu nataak, kona masraa nataak trat kub kuu luxt thitanax.

¹²Ne tak ne nee wli koree, kona kon dib ndroo leettsoo nee ndaa nee kwente lo goo.

¹³Ne ntsowt nee taxal mtsow Moisés, leettsa mtow Moisés lo Moisés kon thib le lar, tsa wiit re tey nee zha Israel naa xa yuyy xni kuu zhega zhega myuyya.

¹⁴Per lee re tey nee zha ndala mkow yek zha. Ne asta nal leettsa nlab zha trat gol, lee lara ndaat diiz yen zha naa kwan nzhabe, tak ter yiib lara lo zha; ne lee lara ngiib leettsa nyelaaz zha Jesucrist.

¹⁵Per asta nal, leettsa nlab zha ley kuu mndaa Diox lo Moisés, lee lara ntowka yek zha kona nyent zha xkiiz Diox.

¹⁶Per leettsa lee thib zha nyelaaz Jesucrist Zha Nabee loʼaa, ora lee lara ngiib lo zha.

¹⁷Tak Mbi Nayon nak Zha Nabee; ne leettsa nabee Mbi Nayon chaan Zha Nabee leettsoo thib zha, mlaa zha lo ley.

¹⁸Ne nowt raa lara loʼaa nal, ne nakaa taxal thib spej ta nloo xni chaan Zha Nabee, ne lee Mbi Nayon chaan Zha Nabee, ngetsee modaa thib wiz ne tedib wiz, tsa gakaa taxal lee zha.