Read Ozolotepec Zapotec 2ª de Corintios 4 Bible Online

2ª de Corintios 4 - Ozolotepec Zapotec bible

2ª de Corintios 4

¹Ne tak mlat leettsoo Diox ne Diox nee, kona mndaa Diox tsiin ree ntsow nee, ne thib nzo yek nee tsow neey.

²Mlaa nee re kuu went kuu ntsow zha xgaats, re kuu nathoy, ne ndiyt nee nkedi nee, ne neeka ntseet nee kuu nzhab xkiiz Diox. Sinke pur kuu wli ni nee lo re men, tsa yen zha kuu wli; ne lee Diox ney.

³Per os nyent zha Diiz Chul kuu ndaa nee kwent, re zha kuu lux nak re zha kuu nyente.

⁴Tak nyelaazt zhay, kona lee Maxuuy kuu nabee lo yezlyu ree, mtekow yek re zha, tsa gagt wii zha xni thoz chaan Diiz Chul chaan Jesucrist, zha kuu nak taxal lee Diox.

⁵Ne ndaat nee leeka kwent nee, sinke ndaa nee kwent chaan Jesucrist Zha Nabee loʼaa. Ne beeta zha kuu nke tsiin xid goo nak nee, tak nzhon nee diiz lo Jesucrist.

⁶Tak leeka Diox kuu mnabee tsa yo xni lo yalkow, leeka Diox mtsow mla xni leettsooʼaa, tsa kon xniʼa lebeeʼaa xni thoz chaan Diox, kuu nak Jesucrist. Tegal ndakti men nyelaaz men Diox

⁷Lee xni ree nzo leettsooʼaa. Ne nakaa taxal thib yet yu, tsa loo lee yalney ree nak chaan Diox ne nagte chaanaa.

⁸Tegal ndota re yalti ndriidaa, per nzot nabil leettsooʼaa, ne tegal ntsowaa xgabe per nyobt leettsooʼaa.

⁹Tegal ndralno zha lee, per ndot anta leeʼaa, ne tegal ngin zha leeʼaa per nzhutht zha lee.

¹⁰Loka pa ta nda re lee tak kuth zha lee, tsa loo yalnaban chaan Jesucrist lo kwerpaa.

¹¹Dita lo nabanaa tak kuth zha lee tak nyelaazaa Jesucrist, tsa loo yalnaban chaan Jesucrist lo kwerpaa kuu nzhath.

¹²Kona nin, leeka taxal ndo yalguth lo nee, leeka tata ndo yalnaban lo goo.

¹³Tak lo xkeets Diox nzhab: “Ngwalazʼn Diox, kona ndan kwent chaan Diox”, [Sal. 116:10] ne leeka tata nyelaazaa Jesucrist, kona ndaaʼaa kwent chaan Jesucrist.

¹⁴Tak neʼaa lee Diox mteroban Jesucrist, Zha Nabee loʼaa lo yalguth, kona neʼaa teroban Diox reʼaa kon Jesucrist, tsa teno Diox reʼaa lo Diox.

¹⁵Reta koree ngok tsa wen yo goo, ne tsa kwathoz zha kayaa kuu wen lo Diox; ne tsa kwathoz zha taa texkix lo Diox por kuu wen kuu ndaa Diox lo zha.

¹⁶Kona ndoblot yetsayaa. Tegal gandata wiz lee kwerpaa ndeyaax, per lee leettsooʼaa gandata wiz mas ngeyak kub ne masraa ney ndoʼaa nyelaazaa Diox.

¹⁷Reta yalti kuu ndriidaa lo yezlyu ree gatilta ndriidaay, ne lijerta ndriide, per ntsowe kayaaʼaa re kuu thoz ne re kuu ro kuu xek thitanax kuu masraa nataak nake re yalti.

¹⁸Tak ngwiitaa lo re kuu nloo, sinke leeʼaa ngwii lo re kuu nloot; tak lee re kuu nloo talux, per lee re kuu nloot luxt thitanax.