Read Ozolotepec Zapotec 2ª de Corintios 6 Bible Online

2ª de Corintios 6 - Ozolotepec Zapotec bible

2ª de Corintios 6

¹Ne tak nke nee rtsin Diox, kona naab nee lo goo kon dib ndroo leettsoo nee, bkayaa goo re kuu wen kuu ndelaaz Diox, per kayaat gooy taxal thib kuu nataagt.

²Tak lo xkeets Diox nzhab:Wen or mbin na xkiza,ne mtsowʼn ayuda,wiz kuu mlaa re men. [Is. 49:8] Ne nal nak wiz kuu nzhon Diox xkiizaa. Nal nak wiz kuu mlaa reʼaa.

³Neeka thib welt mtsowt nee neeka thib kuu went lo neeka thib zha, tsa yent cho looz rtsin nee.

⁴Sinke nloo nee, lee nee nak zha kuu nke rtsin Diox, asta nxek nee ndriid nee yalti por re kuu ndeche nee ne por ndota re kuu went,

⁵mdin zha nee, mloo zha nee tsib, mrezno zha nee, mke zha nee tsiin kuu kwathoz nati; nzo welt mdatta nee ne noga mriid nee win.

⁶Ne lo reta kuu mriid nee, mloo nee nali nak nee, tak nlebee nee kuu wli, mxek nee reta yalti kuu mriid nee, wen ngok nee, tak nap nee Mbi Nayon chaan Diox, ne wlipaa nke leettsoo nee taben nee.

⁷Noga mloo nee, lee nee nak zha kuu nke rtsin Diox, tak pur kuu wli ni nee, ne nap nee yalney chaan Diox, ne nlortsin nee xkiiz Diox kuu wli, par ntak nee ne par ngyo nee.

⁸Nzo leettsa ntsow nataak zha nee ne nzo leettsa ngoo zha yalnathoy nee, nzo leettsa wen ni zha nee ne nzo leettsa nlooz zha nee. Mbez zha lee nee nkedi, per wlipaa kuu wli ndediz nee.

⁹Nzo leettsa ntsowno zha nee taxal zha kuu nlebeet zha, tegal wen wen nlebee zha nee. Mera aguth zha nee, per bee nabanka nee; nteti zha nee, per nzhuth zha nee.

¹⁰Tegal nabil nzhak nee, per thibka naley nzo leettsoo nee; tegal prob nee, per kwathoz zha mtsow nee ngok rik; ne tegal yent kwan nap nee, per reta kwaa nkeno nee.

¹¹Re goo wetsʼn ne btan na, zha yez Corinto, mndaa nee kwent pur kuu wli lo goo, kon dib ndroo leettsoo nee.

¹²Nke leettsoo nee goo, nabizt ngok nee lo goo, per goo nket leettsoo goo nee, nabiz ngok goo lo nee.

¹³Kona naabʼn lo goo, taxal naab thib zha lo zhiinn zha, bke leettsoo goo nee taxal nke leettsoo nee goo. Reʼaa nak gwodoo chaan Diox kuu naban

¹⁴Ndoblot tseya goo kon zha kuu nyelaazt Diox, tak gagt yo kuu wen kon kuu went, ne gagt tsaal xni kon yalkow.

¹⁵Nzaalt leettsoo Jesucrist kon Maxuuy, kona gagt yo thib zha kuu nyelaaz Jesucrist kon thib zha kuu nyelaazt Jesucrist.

¹⁶Neeka thib kuu yewalt nak kon gwodoo Diox ne kon gwodoo re diox re men yezlyu ree. Tak reʼaa nak gwodoo chaan Diox kuu naban. Taxal nzhab Diox:Yon ne tiyʼn xid zha;gakʼn Diox zha;ne lee re zha gak zha yez da. [Lv. 26:12; Ez. 37:27]

¹⁷Kona noga ne Diox:Broo goo xid re zha kuu went nak, beche goo lo re zha;diinnt goo kuu nambit,tsa kayaan goo, [Is. 52:11]

¹⁸ne tsa gakʼn Xut goo,ne re goo gak xgann na ne rtsaap na,tenzhee ne Zha Nabee kuu nzhaak ntsow reta kwaa. [2 Sam. 7:14; 1 Cr. 17:13; Is. 43:6; Jer. 31:9]