Read Ozolotepec Zapotec Efesios 4 Bible Online

Efesios 4 - Ozolotepec Zapotec bible

Efesios 4

¹Nzon tsib tak ntsowʼn rtsin Zha Nabee, kona naabʼn lo goo; ban goo taxal ndoblo ban re zha kuu mrez Diox, ne re goo nak zhaʼa.

²Rubt goo,nadoo gok goo,gok goo zha legal,ne bxek leettsoo goo ne goo thib goo ne tedib goo kon yalnkelaaz.

³Thibka gok goo re goo, laa goo nabee Mbi Nayon leettsoo goo, tsa wen kwin goo.

⁴Taxal nzo thibka kwerp, ne thibka Mbi Nayon, leeka tata thibka kuu ngebet reʼaa kuu mrez Diox.

⁵Nzo thibka Zha Nabee, ne thibka zha kuu nyelaazaa, ne thibka welt nzhak leyyaa kon le zha,

⁶ne thibka Diox kuu nak Xut retalee nzo; lee Diox nabee reta kwaa, nabee Diox lo retalee ne reta ta ndo Diox.

⁷Lo kadta thibaa mndaa Diox yalwen chaan Diox, ne mkayaaʼaa kuu nataak kuu mndelaaz Jesucrist loʼaa taxal nlaaz Jesucrist.

⁸Taxal nzhab lo xkeets Diox:Leettsa mretab zha yibaa,mloo zha lee zha mtsow gan lo re zha kuu nayii ne zha,ne mndelaaz zha kuu nataak lo re men. [Sal. 68:18]

⁹¿Ne kwan nak kuu nzhabe: “Nguxoob zha yibaa”? Lee koree nak, mla Jesucrist ta mas naats leen yezlyu.

¹⁰Ne leeka zha kuu mla leen yezlyu, leeka lee zha nguxoob ta mas ya yibaa, tsa nabee zha lo reta kwaa.

¹¹Ne leeka lee zha mndelaaz re kuu nataak lo re zha zha.Lo thib net zha mndelaaz zha gak zha apóstl,lo tedib net zha mndelaaz zha gak zha profet,lo tedib net zha mndelaaz zha taa zha kwent Diiz Chul,lo tedib net zha mndelaaz zha gak zha, zha kuu kenap re zha kuu nyelaaz Jesús,ne lee lo tedib net zha mndelaaz zha gak zha maestr kuu loo xkiiz Diox.

¹²Tbaa mteteed Jesucrist re zha Jesucrist, tsa tsow zha kuu nabee Jesucrist, tsa masraa gak tyen re zha Jesucrist,

¹³ne tsa thibka gakaa reʼaa tak nyelaazaa Jesucrist ne tsa yelo lebeeʼaa Xgann Diox, tsa gakaa zha ngobee ne thitanax nabee Jesucrist leettsooʼaa.

¹⁴Mteteed Diox reʼaa, tsa gagt raa lee taxal ndyeen bzhizh kuu neyt. Ndoblot yelaazaa xkiiz re zha kuu ndyaad nkedi, re zha kuu nlaaz luuzhaa; tsa teno zha lee net went.

¹⁵Sinke ndoblo tsowaa kuu wli ne ke leettsoo altaaʼaa, ne ndoblo kobeeʼaa lo reta kuu tsowaa taxal nlaaz Jesucrist Zha Nabee loʼaa.

¹⁶Lee reʼaa Jesucrist Zha Nabee loʼaa, nakaa taxal thib kwerp kuu wen nayaal reta ta. Ne leettsa retalee wen nkeʼaa tsiin ne tsowaa ayud altaaʼaa, masraa nteedaa, tsa masraa nali toʼaa lo Diox ne ke leettsooʼaa thibaa ne tedibaa taxal nlaaz Diox. Yalnaban kub kuu nap re zha kuu nyelaaz Jesucrist

¹⁷Koree nin lo goo kon yalnabee chaan Zha Nabee: Ndoblot raa ban goo taxal re zha kuu nyelaazt Diox, re zha kuu ntsow re kuu naxen kuu nzo yek zha,

¹⁸thitanax mkow yek re zha, ne napt zha yalnaban kuu ndaa Diox, tak ngobeet zha ne tak nad leettsoo zha, kona nlebeet zha naa xomod nak Diox.

¹⁹Thitanax nthoyt raa zha, kona ntsow zha reta kuu yu kuu nlaaz kwerp zha, thitanax ndablaaz zha ntsow zha reta kuu went.

²⁰Per leettsa mteed goo re kuu mloo Jesucrist, mteedt goo kuu tata.

²¹Os lee goo wli mbin goo kwent chaan Jesucrist ne mteed goo kuu wli kuu nak chaan Jesucrist, ndoblot ban goo tata.

²²Sinke blaa goo mod went kuu mban goo ndala, re xgab kuu thitanax went kuu ntetsaa men ne nkedi men.

²³Ndoblo tseeʼaa mod kuu ntsowaa xgab,

²⁴tsa gakaa zha kub taxal nlaaz Diox, ne tsa gakaa zha nali ne zha nambi lo Jesucrist taxal nak kuu wli.

²⁵Kona ndoblot raa kediʼaa, ndoblo niʼaa kuu wli lo tabenaa, tak retalee nakaa taxal thibka kwerp.

²⁶Os lee goo yii goo, per tsowt goo kuu went, ndoblot yii goo dita wiz,

²⁷ne taat goo diiz lo Maxuuy.

²⁸Lee zha kuu nlowann, ndoblot raa lowann zha, sinke ndoblo ke zha tsiin kon yaa zha, tsa keno zha kuu talaaz zha lo re zha kuu wlipaa ndeche kwaa.

²⁹Ne niitaa re diiz went, beeta diiz wen ndoblo niʼaa, re diiz kuu tsow ayud re zha kuu gone, tsa masraa ney to zha lo Diox.

³⁰Ndoblot tsowaa yo nabil leettsoo Mbi Nayon chaan Diox, tak mndaa Diox Mbi Nayon loʼaa, tsa neʼaa wlipaa nakaa zha Diox, asta wiz kuu taa Diox yalnaban kuu thitanax lo reʼaa.

³¹Kona bla goo:re kuu went,re zhyan,re yalnayii,kwezt goo,tsalzhoot goo menne neeka kot goo zhyan leettsoo goo.

³²Sinke ndoblo gak goo:zha wen,zha nlat leettsoo ne taben,ndoblo tsow goo perdon lo taben goo, taxal mtuuy Diox reta kuu went kuu mtsow goo lo Diox, por kuu mtsow Jesucrist.