Read Ozolotepec Zapotec Efesios 5 Bible Online

Efesios 5 - Ozolotepec Zapotec bible

Efesios 5

¹Tak nakaa zhiinn Diox ne tak nke leettsoo Diox reʼaa, kona ndoblo banaa taxal nlaaz Diox.

²Ndoblo ke leettsooʼaa tabenaa, taxal mke leettsoo Jesucrist reʼaa, tak leeka lee Jesucrist mndaa Jesucrist lo Diox, taxal thib maa gon kuu ndaa zha lo Diox, ne nak Jesucrist thib tsi kuu nyow leettsoo Diox.

³Kona retalee kuu nak zha yez chaan Diox, zha kuu nali ndo nyelaaz Diox, neeka ndoblot tethaa:kuu nzhak rop zha kon ndota zha,neeka tethtaa tedib net re kuu went,neeka re yaltablaaz.

⁴Neeka ndoblot tedizaa re diiz kuu went,neeka ndoblot tedizaa re diiz bxen,neeka ndoblot tedizaa re diiz rax; mas wen ndoblo taaʼaa texkix lo Diox.

⁵Tak neʼa lee loka zha kuu:nzhak rop kon ndota zha,o zha kuu ntsow re kuu nambit,o zha kuu ndablaaz, ne zha kuu nyelaaz re diox kuu nagt Diox, tabt zha Ta Nabee Jesucrist ne Diox.

⁶Ne laataa kedi zha lee kon diiz bxen, tak dits reta zha kuu ntsow re koree la yalnayii chaan Diox, tak nzhont zha diiz lo Diox.

⁷Kona ndoblot tsaal leettsoo goo kon re zha kuu ntsow re kuu wenta.

⁸Tak ndala ngooʼaa lo yalkow, ne lee nal nziʼaa lee lo xni chaan Zha Nabee, kona ndoblo tsowaa taxal ntsow re zha kuu nzi lo xni,

⁹ne tak nziʼaa lo xni kona:ndoblo gakaa zha wen,ndoblo nali toʼaa lo Diox,ne ndoblo tedizaa kuu wli.

¹⁰Ne thibka ndoblo tsow goo kuu nyow leettsoo Zha Nabee.

¹¹Ne tsowt goo re kuu nlortsint, kuu ntsow re zha kuu nzi lo yalkow na; mas wen btaa goo kwente, tsa yen re men naa xomod nake.

¹²Tak kwathoz nathoy tediz men re kuu ntsow zha xgaatsta;

¹³per leettsa lee reta kuu went roo lo xni, retay nambita nlooy, tak xni ntsow nloo retay.

¹⁴Kona nzhab lo xkeets Diox:Bloo mkaal loʼa, tak lu nak taxal thib zha kuu naxat;gwache xid re zha nguth,ne lee Jesucrist tsow yaxni yeka.

¹⁵Kona ndoblo wiiʼaa naa kwan tsowaa, ndoblot banaa taxal re zha kuu nayez yek, sinke ndoblo banaa taxal zha kuu nzhaak.

¹⁶Reta wiz ndoblo tsowaa kuu wen, tak thitanax went nak re wiz ree.

¹⁷Kona ndoblot gakaa zha nayez yek, sinke ndoblo yenaa naa kwan nlaaz Zha Nabee tsowaa.

¹⁸Natuztaa, tak koree ntsow nluuzhaa leeka leeʼaa, mas wen ndoblo laaʼaa nabee Mbi Nayon leettsooʼaa.

¹⁹Ne mas wen tedizaa lo thibaa ne lo tedibaa, naa xa xomod kwathoz wen nak Diox ne golaa salm ne kant kon dib ndroo leettsooʼaa lo Zha Nabee.

²⁰Ne por reta kwaa ndoblo taaʼaa texkix lo Diox kuu nak Xut retalee, kon yalnabee chaan Jesucrist Zha Nabee loʼaa. Kuu ndoblo tsow re zha kuu nyelaaz Jesús lize

²¹Retalee ndoblo teniʼaa thibaa ne tedibaa, tak nzhonaa diiz lo Jesucrist.

²²Re ngot ndoblo gon ngot diiz lo tsaal ngot, taxal lo Zha Nabee.

²³Tak lee mbyi nak kuu nabee lo ngot, leeka taxal nabee Jesucrist lo re zha Jesucrist. Tak lee Jesucrist mtelaaʼaa lo yalguth, ne lee reʼaa nak taxal kwerp chaan Jesucrist.

²⁴Taxal nzhon re zha Jesús diiz lo Jesús, leeka tata ndoblo gon re ngot diiz lo tsaal ngot lo reta kwaa.

²⁵Lee re mbyi ndoblo ke leettsoo mbyi tsaal mbyi, leeka taxal mke leettsoo Jesucrist re zha Jesucrist, tak leeka lee Jesucrist mndaa Jesucrist nguth por re zha Jesucrist,

²⁶mtsow Jesucrist koree par mloo zhaa Jesucrist re zha Jesucrist, ne mtsow nambi Jesucrist re zha leen nit por xkiiz Diox.

²⁷Tata mtsow Jesucrist, tsa lee re zha kuu nyelaaz Jesucrist, re zha kuu nak gwodoo chaan Jesucrist, gak zha, zha nambi, zha nayon ne zha nali lo Jesucrist.

²⁸Ndoblo ke leettsoo mbyi tsaal mbyi, taxal nke leettsoo mbyi kwerp mbyi. Tak lee zha kuu nke leettsoo tsaal leeka lee zha nke leettsoo zha zha.

²⁹Tak neeka thib zha nayiit zha ne zha leeka kwerp zha, sinke nke leettsoo zhay ne nkenap zhay, leeka taxal nke leettsoo Jesucrist re zha Jesucrist,

³⁰tak lee reʼaa nak kwerp chaan Jesucrist.

³¹“Kona lee mbyi ndoblo roo zhaa lo xut ne lo xnaa, tsa tseya mbyi kon ngot mbyi, ne lee rop zha gak taxal thibka zha”. [Gn. 2:24]

³²Kwent chaan thib kuu thoz kuu ngoo gaats ndala, kuu nagan yen men mndan kwent lo goo, koree nak kwent chaan Jesucrist ne kwent chaan re zha kuu nyelaaz Jesucrist, kuu nak gwodoo chaan Jesucrist.

³³Ndoblo kadta thib goo ke leettsoo goo tsaal goo, taxal nke leettsoo goo leeka goo, ne leeka tata lee tsaal goo ndoblo gon diiz lo goo.