Read Ozolotepec Zapotec Colosenses 3 Bible Online

Colosenses 3 - Ozolotepec Zapotec bible

Colosenses 3

¹Ne tak mrobana lee kon Jesucrist, kona ndoblo kwaanaa re kuu yibaa, ta ndob Jesucrist lad ban lo Diox, ta nabee Diox.

²Ndoblo tsowaa xgab re kuu yibaa, ne ndoblot tsowaa xgab re kuu yezlyu ree,

³tak ngutha lee kon Jesucrist, kona lee Diox nkenap yalnabanaa.

⁴¡Lee Jesucrist ndaa yalnaban loʼaa! Ne leettsa yaad Jesucrist tedib welt, noʼaa bi kon Jesucrist lo xni thoz chaan Jesucrist ta nabee Jesucrist. Xomod ngokaa ndala ne xomod nakaa nal

⁵Ndoblo tsowaa tsa lux re xgab yezlyu ree loʼaa:Ne ndoblot gak ropaa kon ndota zha,tsowtaa re kuu nambit,neeka ndoblot tsowaa re kuu rax,kuu nlortsint kuu nlaaz kwerpaa,neeka ndoblot tablaazaa re kuu yezlyu ree kuu lalka nak, taxal nyelaaz zha re diox kuu wlit nak Diox.

⁶Kona lee yalnayii chaan Diox la dits re zha kuu nzhont diiz ne ntsow re koree,

⁷ne retalee mtsowaa re koree ndala.

⁸Per lee nal ndoblo laaʼaa re:yalnayii,zhyan,tsowtaa kuu went kuu tak tedib men,ne kweztaa ndota kuu lo re men,noga ndoblo laa reʼaa re diiz went kuu ndedizaa.

⁹Keditaa thibaa ne tedibaa. Tak mlaaʼa lee mod kuu ngokaa ndala ne re kuu mtsow lee ndala,

¹⁰lee nal nabanaa lo yalnaban kub, ne gandata wiz ngetsow kub Diox yalnaban ree, tsa mas wen lebeeʼaa Diox.

¹¹Ne lo yalnaban kub ree, nataagt naa chu zha Israel nak zha o nagt zha zha Israel, ne chu nke seny zha o nkete zha, chu zha tith nak zha o nagt zhay, chu mos nak zha o nagt zha mos. Kuu nataak nak Jesucrist, tak lee Jesucrist nabee leettsoo retalee.

¹²Nke leettsoo Diox retalee, ne mli Diox reʼaa tsa gakaa zha Diox. Kona tenzhee ndoblo banaa lo yalnaban kub ree:ndoblo lat leettsooʼaa neʼaa tabenaa,ndoblo gakaa zha kuu wen nak,ndoblo gakaa zha nadoo,ndoblo gakaa zha naguuz,ndoblo xek leettsooʼaa,

¹³ne ndoblo xek leettsooʼaa neʼaa thibaa ne tedibaa,ndoblo la leettsooʼaa lo re kuu went kuu ntsow tabenaa loʼaa,leeka taxal mla leettsoo Jesucrist lo re faltaa.

¹⁴Ne kuu masraa nataak lo re koree nak: Ndoblo ke leettsooʼaa tabenaa, tak koree ntsow thibka nzhakaa ne tsowe nzhak naliʼaa.

¹⁵Ne lee yalwen chaan Diox nabee leen leettsooʼaa, tak par kona mrez Diox reʼaa, tsa gakaa thibka kwerp, ne ndoblo taaʼaa texkix lo Diox.

¹⁶Ndoblo thibka yo yekaa xkiiz Jesucrist, ne ndoblo teedaa teniʼaa thibaa ne tedibaa kon yalnzhaak kuu ndaa Diox loʼaa. Ne ndoblo golaa salm ne kant, tak nlaazaa taaʼaa texkix lo Diox.

¹⁷Ne reta kuu ntsowaa o kuu niʼaa, ndoblo tsow leey kon yalnabee kuu ndaa Jesucrist Zha Nabee loʼaa, ne ndoblo taaʼaa texkix lo Diox kuu nak Xutaa por Jesucrist. Xomod ndoblo yoʼaa lizaa

¹⁸Lee re ngot ndoblo gon diiz lo tsaal, tak koree ndoblo tsow re zha kuu nyelaaz Jesucrist Zha Nabee loʼaa.

¹⁹Ne lee re goo mbyi ndoblo kelaaz goo tsaal goo, ne yiit goo lo zha.

²⁰Lee re goo mndyeen ndoblo gon diiz lo xut lo reta kwaa, tak koree nyow leettsoo Zha Nabee.

²¹Ne lee re goo xut mndyeen ndoblot tsow goo kezhyan zhiinn goo, tsa yot nabil leettsoo zhiinn goo.

²²Lee re goo kuu nak mos ndoblo gon goo diiz lo zha kuu nabee lo goo lo yezlyu ree, lo reta kuu yezlyu ree. Ne tsowt gooy beeta leettsa ndewii zha lo goo par wen yaan goo lo zha, sinke kon dib ndroo leettsoo goo bke goo tsiin lo zha, tak nzeb goo lo Zha Nabee kuu ndob yibaa.

²³Reta kuu tsow goo, btsow gooy kon dib ndroo leettsoo goo, taxal zha kuu ntsow rtsin Zha Nabee, tsowt gooy taxal lo men.

²⁴Tak neʼa goo lo Zha Nabee kayaaʼaa kuu tsowaa gan, tak lo Jesucrist nkeʼaa tsiin ne lee zha nak Zha Nabee loʼaa.

²⁵Tak lee zha kuu ntsow kuu went, leeka kuu went kuu mtsow zha gax lo zha, tak lo Diox lalka nak re men.