Read Ozolotepec Zapotec Tito 3 Bible Online

Tito 3 - Ozolotepec Zapotec bible

Tito 3

¹Btsow tsa telaaz re zha gon zha diiz lo re gobyern ne lo re zha nak tsiin, ne thibka to list zha par tsow zha reta kuu wen,

²ne loozt zha neeka thib men, neeka ndoblot kwaan zha zhoo, sinke ndoblo wen ne nadoo gak zha lo reta men kon dib ndroo leettsoo zha.

³Tak noga lee ndala ngokaa zha nad mbintaa diiz lo Diox, mndabaa ne ngokaa mos lo re kuu went kuu mndablaaz kwerpaa, lo re kuu wenta mbanaa ne went ngok leettsooʼaa mneʼaa chaan tedib net men; mnayii re men mneʼaa, ne mnayiiʼaa mneʼaa re men.

⁴Per leettsa lee Diox kuu mtelaa reʼaa, mloo yalwen ne yalnkelaaz chaan lo reta men yezlyu ree,

⁵tsa mtelaa Diox reʼaa lo yalguth, ne nagte tak mtsowaa kuu wen, sinke mtsow zhay tak mlat leettsoo zha mne zha lee. Mtembi zha lee ne mtsow zha ngolaa tedib welt, leettsa mndaa zha Mbi Nayon lo reʼaa, tsa kenoʼaa yalnaban kub,

⁶ne mkat leettsoo Diox mndaa Diox Mbi Nayon lo reʼaa kwent chaan Jesucrist kuu mtelaa reʼaa,

⁷tsa por yalwen chaan zha, tsinaa gakaa zha nali lo zha, ne kayaa reʼaa yalnaban kuu thitanax kuu ngebetaa.

⁸Ne kwathoz wli re koree, kona nlazʼn thibka ko yeka taaʼa kwent re koree, tsa lee re zha kuu nyelaaz Diox thibka tsow zha xgab tsow zha re kuu wen. Re koree nak kuu wen ne nlortsine lo re men.

⁹Per taata diiz yo re men lo re kwent kuu naxen, kuu nak chaan re teyaa zha ndala, neeka taata diiz yo re altaa re men, neeka taata diiz yodiz re men kwent re kuu nzhab lo ley chaan Moisés. Tak lo re koree ngyodiz re men ne nlortsinte neeka nataagte.

¹⁰Os nzo cho ntsow nzhak chop net re zha kuu nyelaaz Jesús, bni lo zha thib welt o chop welt; per os lee zha gont zha diiz, bloo zha xid re zha kuu nyelaaz Jesús.

¹¹Ne ndoblo neʼa lee mbyiʼa mndab, ne leeka re kuu went kuu ntsow zha, tsow lux zha. Kuu mnabee Paba lo Tito

¹²Leettsa taalʼn Artemas o Tíquico loʼa, btsow tsa tak yaada lon yez Nicópolis, tak mtsowa na xgab tya betʼn re mbee kuu nla yig.

¹³Btsow ayud Lisenciad Zenas ne Apolos, ne btaa re kuu ndeche zha, tsa ndaka zha xnet zha ne gagt falt neeka thib kwaa lo zha.

¹⁴Ne ndoblo teed re zha kuu nyelaaz Jesús, tsow zha re kuu wen ne tsow zha ayud re zha kuu wlipaa ndechey, tsa gak zha taxal thib ya kuu ndaa xle. “Diox” bluz kuu mni Paba lo Tito

¹⁵Reta zha kuu ndo kon na ni “diox” loʼa. Ne bni “diox” kwent chaan da lo re zha kuu nyelaaz Jesús kuu nke leettsoo lee. Nlazʼn lee Diox thibka taa yalwen chaan lo re goo. ¡Tbaa gake! Paba