Read Ozolotepec Zapotec Hebreos 10 Bible Online

Hebreos 10 - Ozolotepec Zapotec bible

Hebreos 10

¹Tak lee ley chaan Moisés nak beeta xinn, chaan re kuu wen kuu yaadno Jesucrist kuu nak kuu wlipaa. Kona ngogt gatsow nali ley re men kuu mbig lo Diox kadta liin kon re maa kuu nzhuth zha ndaa lo Diox, taxal nabee ley.

²Ne os lee ley gatsow nambi re men lo re falt men lo Diox, ganet re men lee re men nap falt, ne gataat re men maa lo Diox.

³Per kuu wli nak, lee gon kuu ndaa zha ntsow ntelaaz zha re falt zha kadta liin,

⁴tak lee ren re ngon ne ren re chib te gagt kibe falt men.

⁵Kona leettsa myaad Jesucrist yezlyu ree, nzhab Jesucrist lo Diox:Nlaazta kuth zha maa taa zha loʼa,neeka nlaazta taa zha gon loʼa,sinke mndaaʼa thib kwerp lon.

⁶Nyowt leettsooʼa kuth zha maa taa zha loʼa,ne nyowt leettsooʼa teyy zha re maa gon loʼa por re falt zha.

⁷Tsa nzhapʼn:“Leen ndo nzhee,taxal ndaa xkeets Diox kwent chaan da,Xutʼn Diox, nlazʼn tsowʼn kuu nlaaza”. [Sal. 40:6-8]

⁸Lee ner nzhab Jesús: “Nlaazta kuth zha maa taa zha loʼa, neeka nlaazta taa zha gon loʼa, neeka nlaazta tey zha maa gon loʼa por re falt zha”, ne tegal tata nabee ley.

⁹Tsaraa nzhab Jesús: “Lee na ndyal par tsowʼn kuu nlaaza”, koree nak, mluux Jesús trat gol, tsa lee trat kub telo.

¹⁰Ne mtsow Jesucrist ngok nambiʼaa lo Diox, tak mtsow Jesucrist kuu nlaaz Diox, leettsa mndaa zha leeka lee zha mke lo kruz thibka welt ne thitanax.

¹¹Ne reta ngwleyy, gandata wiz bee ntsow zha rtsin zha, nzhuth zha maa nda zha lo Diox, ne tegal gagt tuyy koree re falt men.

¹²Per lee Jesucrist thibka welt mndaa zha leeka lee zha nguth, tsa mtuyy zha re faltaa thitanax, ne ndya zha ndob zha lad ban lo Diox.

¹³Tya ndob zha ngebet zha, asta leettsa tetsin Diox re zha kuu nayii ne zha xann nii zha, tsa tobxub re zhaʼa lo zha.

¹⁴Ne por thibka gon kuu mndaa zha leeka lee zha, mtsow nambi zha re men thitanax lo Diox.

¹⁵Ne noga Mbi Nayon mndaa kwent re koree, leettsa nzhab Diox:

¹⁶“Lee trat kub kuu tsowʼn lo re zha, re wiza, nak koree,ne Zha Nabee:Leen leettsoo zha keen ley da,ne kee nay leen xgab zha”. [Jer. 31:33]

¹⁷Ne noga ne Diox:Thitanax nithlazʼn re falt chaan zha ne re kuu went kuu mtsow zha. [Jer. 31:34]

¹⁸Kona leettsa lee re falt ngwaloʼa myuy, ndoblot raa taa zha mas gon por re falt. Ndoblo bigaa lo Diox

¹⁹Kona re goo wetsʼn ne btan na, lee nal kon dib ndroo leettsooʼaa tak tabaa leen gwodoo, asta Ta Kwathoz Nayon por ren Jesucrist,

²⁰ne tekeʼaa dits net kub kuu ndaa yalnaban. Tak Jesucrist mxaal net ne mchat zha lar kuu ntow loʼaa Ta Kwathoz Nayon, leettsa nguth Jesucrist.

²¹Ne lee nal napaa thib ngwleyy kuu kwathoz nataak leen gwodoo chaan Diox;

²²kona ndoblo bigaa lo Diox kon dib ndroo leettsooʼaa, tak wen neʼaa lee Diox kayaaʼaa; ne lee Diox mtembi leettsooʼaa lo re kuu went kuu mtsowaa, ne mteech Diox kwerpaa kon nit nambi.

²³Thibka ney toʼaa ne gagt chop xgabaa lo kuu ngebetaa, tak nali nak Diox ne tetaa Diox kuu ne Diox loʼaa.

²⁴Noga ndoblo koneyaa leettsoo altaaʼaa kon yalnkelaaz ne tsowaa kuu wen.

²⁵Ndoblot laaʼaa kaltaataa par golaa lo Diox, taxal ntsow tedib net zha, sinke ndoblo koʼaa gan leettsoo altaaʼaa, ne masraa ndoblo tsow leey nal, tak ndetsin gaxa wiz kuu lee Zha Nabee bretab.

²⁶Tak os ndaaka lee falt taxal nlaazaa, leettsa neʼaa lee kuu wli, yent raa cho kib faltaa;

²⁷beeta ngebetaa thib yalti thoz leettsa naab Diox kwent loʼaa, ne ko Diox reʼaa lo bel ta lux re zha kuu nayii ne Diox.

²⁸Leettsa lee thib zha nzhont diiz lo ley chaan Moisés, ne nzo chop tson zha gab wliy, tsa nabee zha kuth zha zhaʼa ne latta leettsoo zha ne zha zhaʼa.

²⁹¿Chu ndagt goo masraa naroob yalti ndoblo rid re zha kuu ngithno Jesucrist Xgann Diox, tak ndak zha nataagt ren Jesucrist, ne tabaa mod ntsow zha kuu went lo Mbi Nayon chaan Diox kuu nke leettsoo lee? Ne lee ren Jesús nak trat kub ne kon leey ngok nambi reʼaa.

³⁰Noga neʼaa lee Zha Nabee nzhab: “Na naab kwent lo re men; na yizh lo zha”. [Dt. 32:35] Ne noga nzhab zha: “Lee Zha Nabee naab kwent lo re zha zha”. [Dt. 32:36]

³¹¡Kwathoz nathoz yalti rid men, os lee men tsow men kuu went lo Diox kuu naban!

³²Per btelaaz goo re wiz, leettsa mxaal Diox yek goo par mkayaa goo xni chaan Diox ne xomod mxek goo mriid goo yalti,

³³nzo chop tson goo mtsalzhoo zha goo ne mndeno zha goo lo re men, ne techop tson goo mkaltaa kon re wets goo, ne no goo mriid goo yalti kon re zhaʼa.

³⁴Ne mlat leettsoo goo mne goo re zha kuu nzo tsib, ne asta laz goo leettsa mkib zha re kuu nap goo, tak neʼa goo leen yibaa nap goo mas kuu wen kuu xek thitanax.

³⁵Thibka bloo goo yek goo gwalaaz goo Zha Nabee, tak tabaa mod kayaa goo kuu tsow goo gan.

³⁶Ne bxek leettsoo goo rid goo yalti, tsa leettsa mtsowa goo kuu nlaaz Diox, tsa kayaa goo kuu ne Diox taa Diox.

³⁷Tak lo xkeets Diox nzhab:Tak telutta ndo,yaad zha kuu naka diiz yaad,ne laket raa zha.

³⁸Lee zha kuu thibka nali ndo lon,taban zha tak nyelaaz zha na.Os lee zha bre zha lo kuu yezlyu,went yo leettsoon nen zha. [Hab. 2:3-4]

³⁹Ne leeʼaa nagtaa zha kuu bre yelaaz kuu yezlyu ree, tsa ridaa yalti, sinke leeʼaa nakaa zha kuu nyelaaz Jesucrist, ne tsowaa gan yalnaban kuu thitanax.