Read Ozolotepec Zapotec Hebreos 4 Bible Online

Hebreos 4 - Ozolotepec Zapotec bible

Hebreos 4

¹Kona ndoblo tsebaa, tak bee ndaa Diox diiz taabaa roxkwanaa ta mdexkwaa Diox par roxkwanaa, tak cha nzo cho tsowt gan tab.

²Tak no loʼaa mndaa zha kwent Diiz Chul, leeka taxal mndaa zha kwente lo re zhaʼa; per mlortsint mbin re zhay, tak ngwalaazt re zha Diox.

³Per lee reʼaa kuu nyelaaz Jesucrist, nak re zha kuu tab roxkwan taxal nzhab Diox:Kona lo zhyan da nzhapʼn lo re zha:“Tabt zha roxkwan zha ta mdexkwaan roxkwan zha”. [Sal. 95:11] Ne tegal nzhab Diox koree, per ngwaloʼa mdexkwaa Diox reta kwaa, desde leettsa mdexkwaa Diox yezlyu ree;

⁴tak tedib ta lo xkeets Diox ndaa kwent chaan wiz gaz, ta nzhab:Mroxkwan Diox wiz gaz,leettsa ngwalo mtsow Diox reta rtsin Diox. [Gn. 2:2]

⁵Ne noga tedib ta lo xkeets Diox nzhab:Tabt zha roxkwan zha ta mdexkwaan roxkwan zha. [Sal. 95:11]

⁶Per bee nzhak falt tab tedib net zha roxkwan, ne lee re zha kuu mbin xkiiz Diox ndala, mndaabt zha tak mbint zha diize;

⁷kona lee Diox mre mli tedib wiz, kuu nak naltseree. Kuu mndaa rey David kwent bluz lo xkeets Diox, ta nzhab:Os lee goo gon goo kuu ne Diox naltseree,ndoblot tsow nad goo leettsoo goo. [Sal. 95:7-8]

⁸Tak os lee Josué gataa ta garoxkwan re zha Israel, gatetht Diox tedib wiz.

⁹Kona bee tak neyy re zha kuu nyelaaz Diox;

¹⁰tak lee zha kuu ndaab ndroxkwan lo Diox, taneyy zha lo re rtsin zha, leeka taxal mneyy Diox, leettsa ngwalo mdexkwaa Diox re kwaa.

¹¹Ndoblo tsow neyaa lee, tsa tabaa tya ta roxkwanaa, tsa yent cho gak nad leettsoo, taxal ngok nad leettsoo re teyaa zha ndala, tak mbint zha diiz lo Diox.

¹²Tak lee xkiiz Diox nabane ne neye, ne masraa naleey nake thib spad kuu nale rop lad, ne ndaabe asta pa mas naats leen leettsoo men, ne ndriide asta mbi naban men, asta xgab men, noga ndriide ta nayaal re tsidth ne ndriide leen tut men. Ne nambita ney re xgab men ne re kuu nzo leettsoo men tsow men.

¹³Ne neeka thib re kuu mdexkwaa Diox gagt gaatse lo Diox; tak retay nloo lo Diox, ne lo Diox taaʼaa kwent. Jesucrist nak ngwleyy kuu kwathoz nataak

¹⁴Jesús nak Xgann Diox ne lee zha nak ngwleyy kuu kwathoz nataak loʼaa, ne lee zha mndaab yibaa lo Diox. Kona thib nali yo yeka yelaazaa zha.

¹⁵Tak lee zha nak ngwleyy kuu kwathoz nataak, ne nlat leettsoo zha ne zha lee lo re faltaa; tak no zha mriid re yalti leeka taxal ndriidaay nal, per mndaat zha falt.

¹⁶Kona ndoblo bigaa lo Diox kon dib ndroo leettsooʼaa, lo Diox kuu ndob nabee yibaa, tsa ke leettsoo Diox reʼaa ne lat leettsoo Diox ne Diox reʼaa por yalwen chaan Diox, ne tsow Diox ayudaa lo re kuu ndecheʼaa.