Read Ozolotepec Zapotec 1ª de Pedro 5 Bible Online

1ª de Pedro 5 - Ozolotepec Zapotec bible

1ª de Pedro 5

¹Lee nal naabʼn lo re zha gol kuu nabee lo re goo, tak noga na nakʼn zha gol taxal re zhaʼa, ne mwiin re yalti kuu mriid Jesucrist ne noga na ndoblon diinn na ton lo xni thoz chaan Jesucrist kuu loo bluz.

²Ndoblo kenap goo re zha kuu nyelaaz Jesucrist, btsow gooy kon dib ndroo leettsoo goo taxal nlaaz Diox, ndoblot tsow gooy lafwers, neeka tsowt gooy por temi, sinke btsow gooy kon dib ndroo leettsoo goo,

³ne ndoblot tsow goo taxal goo nak bzhaan re zha kuu nkenap goo, sinke ndoblo goo loo goo lo re zha naa xomod ndoblo ban zha.

⁴Tsa leettsa yaad Jesucrist Zha Kuu Nkenap retalee kuu nak zha Diox, tsa leeʼaa kayaa thib koron kuu nzhuyy kuu thitanax luxt. Pey mteni reta zha kuu nyelaaz Jesús

⁵Ne leeka tata, re goo zha kuu mndyeen, bin goo diiz lo re zha gol kuu nabee lo goo. Ne ndoblo gon goo diiz lo thib goo ne lo tedib goo thib mod nadoo:Tak nayii Diox ne Diox re zha rub,ne por yalwen chaan Diox ntsow Diox ayud re zha kuu nadoo nak. [Pr. 3:34]

⁶Ndoblot tsow nataakaa lee lo Diox kuu kwathoz ney, tsa lee Diox tsow gakaa zha nataak leettsa ndobloy, tak lee Diox nak kuu nabee loʼaa.

⁷Blaa goo reta kuu ntsow goo xgab lo Diox, tak lee Diox thibka ntsow xgab re goo.

⁸List gwatsin goo ne blobee goo lo re kuu tsow goo, tak lee Maxuuy kuu nayii neʼaa, ndiy taxal mbeez kuu nzhax yen nkwaan chu wu.

⁹Taat goo diiz tsow Maxuuy gan lo goo, thibka ney bto goo gwalaaz goo Jesucrist, tak neʼaa lee re wetsaa ne re btanaa kuu nyelaaz Jesucrist dib naxta lo yezlyu tabaaka ndriid yalti.

¹⁰Ne lee Diox kuu ndaa reta yalwen loʼaa ne mrezaa por Jesucrist, tsa ndyaʼaa ta nzo Diox, ta thitanax luxtaa, ne bluz leettsa yelo ridaa yalti, tsa lee Diox tsow gakaa zha nali taxal ndoblo gakaa, ne tsow ney Diox reʼaa tsa nali banaa thitanax.

¹¹Chaan Diox nak yalnabee thitanax. Tata gake. Re diiz bluz kuu nzhab Pey

¹²Wets Silvano kuu kwathoz nali nak mkee yeets ree, taxal nzhap nay lo zha. Lo yeets ree mnin chop tson lan diiz, ta mtenin goo ne mndan kwent lo goo lee re koree, nak wlipaa yalwen chaan Diox. Kona thibka nali bto goo lo yalwen chaan Diox.

¹³Lee re zha kuu nyelaaz Jesús kuu nzo yez Babilonia, re zha kuu mli Diox taxal lee, ni “diox” lo goo, ne noga Mark kuu ndakʼn taxal xgann na ni “diox” lo goo.

¹⁴Noga bni goo “diox” lo thib goo ne lo tedib goo, ne dow goo thib chut kwat thib goo ne tedib goo thib mod nali. Nlazʼn wen kwin reta goo zha kuu nak zha Jesucrist. ¡Tbaa gake! Pey