Read Ozolotepec Zapotec 1ª de Juan 1 Bible Online

1ª de Juan 1 - Ozolotepec Zapotec bible

1ª de Juan 1

¹Jesús nak diiz kuu ndaa yalnaban; ne desde leettsa mdexkwaa Diox yezlyu nzoʼa Jesús, ne re nee kuu nak apóstl Jesús mbin nee re diiz kuu mni Jesús, mwii nee Jesús kon prop lo nee ne mdiinn nee Jesús.

²Jesús nak diiz kuu ndaa yalnaban, re nee mwii Jesús, ne ndaa nee kwent chaan Jesús; ne ndaa nee kwent chaan yalnaban kuu thitanax kuu ndaa Jesús. Ndala mndo Jesús lo Xut Jesús, per lee nal mwii nee Jesús.

³Ne kuu mwii nee ne kuu mbin nee ndaa nee kwent, tsa thibka gak goo kon nee, ne tsa thibka gakaa kon Diox kuu nak Xutaa ne kon Jesucrist Xgann Diox.

⁴Kona mkee nee re koree lo goo tsa thitanax naley yo leettsoo goo. Lee Diox nak xni

⁵Ne koree nak Diiz Chul kuu mloo Jesucrist lo nee, ne leeka leey nloo nee lo goo; lee Diox nak xni, ne neeka lut yalkow yent lo Diox.

⁶Os leeʼaa mbezaa thibka nakaa kon Diox, ne ntsowaa kuu went kuu ntsow re zha kuu ndiy lo yalkow, nkediʼaa ne ntsowtaa kuu nzhab xkiiz Diox, kuu nak kuu wli.

⁷Per os leeʼaa ntsowaa kuu wen kuu ndoblo tsow re zha kuu nyelaaz Diox, tsasi ndiyaa lo xni, leeka taxal ndo Diox lo xni, ne wlipaa thibka nakaa thibaa ne tedibaa, ne lee ren chaan Jesucrist Xgann Diox, ntembiʼaa lo reta faltaa.

⁸Os leeʼaa mbezaa naptaa falt, nkediʼaa leeka leeʼaa ne nzot kuu wli leettsooʼaa.

⁹Per os leeʼaa xoobdola re faltaa lo Jesús, wlipaa tetuyy Jesús re faltaa ne tetembi Jesús reʼaa lo reta kuu went kuu mtsowaa, tak nali nak Jesús ne thibka ntsow Jesús kuu ni Jesús.

¹⁰Per os leeʼaa mbezaa naptaa neeka thib falt, tsa ntoʼaa Diox taxal thib zha kuu nkedi, ne wlit mkayaaʼaa xkiiz Jesús leen leettsooʼaa.