Read Ozolotepec Zapotec 1ª de Juan 2 Bible Online

1ª de Juan 2 - Ozolotepec Zapotec bible

1ª de Juan 2

¹Reta goo kuu nak taxal zhiinn na, ngekeen re koree lo goo tsa taat goo neeka thib falt. Per os lee thib goo taa falt, napaa thib zha kuu teriid xkiizaa lo Xutaa Diox, ne zhaʼa nak Jesucrist kuu nali nak.

²Lee zha mdix reta faltaa kon yalnaban chaan zha, tsa tuyy Diox faltaa; ne nagt beeta por faltaa nguth zha, sinke noga por re falt chaan reta men kuu nzi dib naxta lo yezlyu nguth zha.

³Os leeʼaa wlipaa nzhonaa diiz lo reta diiz kuu nabee Diox, wlipaa nlebeeʼaa Diox.

⁴Per os lee thib goo mbez: “Nlebeen Diox”, ne nzhont goo diiz xkiiz Diox, nkedi goo; ne wlit goo kuu mbez goo.

⁵Per os lee goo nzhon goo diiz xkiiz Diox, wlipaa nzo yalnkelaaz chaan Diox leettsoo goo; ne tata neʼaa thibka nakaa kon Diox.

⁶Loka cho kuu mbez: “Thibka nzhon diiz lo Diox”, ndoblo ban zha taxal mloo Jesucrist. Diiz kub kuu mas nataak kuu nak ke leettsoo men altaa men

⁷Re goo wetsʼn ne btan na, ngekeetʼn tedib diiz kub kuu nataak lo goo; leey nak leeka diiz nataak kuu mndaa Diox lo re men desde ndala. Leeka diza nak kuu mbin goo lo nal.

⁸Ne tegal tatay, lee kuu ngekeen lo goo nak thib diiz kub, leey nak kuu wli kuu mtsow Jesucrist ne kuu ntsowaa, kuu nak ke leettsooʼaa Diox ne tabenaa, tak lee yalkow na nderiida, ne lee xni kuu wlipaa nak xni ngeteniʼa.

⁹Ne lee zha kuu mbez: “Lo xni ndon”, ne nayii zha ne zha wets zha, bee ndo zhaʼa lo yalkow.

¹⁰Per lee zha kuu nke leettsoo wets, lo xni ndo zhaʼa; ne lat zha lo kuu went, ne neeka tsowt zha la tedib zha lo kuu went.

¹¹Per lee zha kuu nayii ne wets lo yalkow ndo zha ne ndiy zha lo yalkow, ne net zha naa pa nda zha, tak lee yalkow ntow lo zha.

¹²Re goo kuu nak taxal zhiinn na, ngekeen koree lo goo,tak mtuyya Diox re falt goo por kuu mtsow Jesucrist.

¹³Ngekeen re koree lo goo zha kuu nak zha gol kuu nabee lo re zha Jesucrist,tak mlebeeʼa goo zha kuu nzo desde ndala.Ngekeen re koree lo goo zha mndyeen,tak mtsow goo gan lo Maxuuy.

¹⁴Ngekeen re koree lo goo ndyeen bzhizh,tak mlebeeʼa goo zha kuu nak Xutaa.Ngekeen re koree lo goo zha kuu nak zha gol kuu nabee lo re zha Jesucrist,tak mlebeeʼa goo zha kuu nzo desde ndala.Ngekeen re koree lo goo zha mndyeen,tak ney ndo goo ne mkayaa goo xkiiz Diox leen leettsoo goo, ne mtsow goo gan lo Maxuuy.

¹⁵Tablaazt goo yezlyu ree, neeka re kuu nzo lo yezlyu ree. Tak loka cho kuu ndablaaz re kuu yezlyu ree, nket leettsoo zhaʼa Xutaa Diox;

¹⁶tak reta kuu went kuu nzo lo yezlyu ree, ndyaadte lo Xutaa Diox, sinke leeka lo yezlyu ree ndrooy. Ne re koree nak: Re xgab went kuu ndablaaz zha tsow zha re kuu nlaaz kwerp zha, ndablaaz zha keno zha re kuu ngwii zha, ne ndrub zha re kuu nap zha lo yezlyu ree.

¹⁷Lee yezlyu ree lux, kon reta kuu went kuu nzo lo yezlyu ree; per lee zha kuu ntsow kuu nlaaz Diox taban zha thitanax. Yalkedi ne kuu wli

¹⁸Nin lo re goo kuu nak taxal zhiinn na, re wiz ree nak re wiz bluz. Mbina goo yaad thib zha kuu yii ne Jesucrist; ne lee nal kwathoza re zhaʼa mzin, kona neʼaa mera tsin wiz bluz.

¹⁹Leeka xidaa mroo re zhaʼa, per nagt zha, zhaʼaa, tak os gagak zha, zhaʼaa, gayaanka zha loʼaa. Per mroo zha xidaa, tsa loo ret men nak zhaʼaa.

²⁰Per lee lo goo mndaa Crist Mbi Nayon chaan Crist ne nlebee goo kuu wli.

²¹Ngekeen re koree lo goo, per ngekeet nay tak nlebeet goo kuu wli, sinke ngekee nay tak nlebeeʼa goo kuu wli, ne wen ne goo lee yalkedi ndroote lo kuu wli.

²²¿Cho nak zha kuu nkedi? Lee zha kuu nkedi nak zha kuu mbez, lee Jesús nagt Crist, ne mbezga zha nagt Diox Xut Jesús, ne neeka nagt Jesús Xgann Diox, zhaʼa nak zha kuu nayii ne Crist.

²³Reta zha kuu mbez lee Jesús nagt Xgann Diox, nagt zhaʼa zhiinn Diox; per lee zha kuu mbez lee Jesús nak Xgann Diox, zhaʼa nak zhiinn Diox.

²⁴Kona, blotsow goo re diiz kuu mbin goo desde ner leen leettsoo goo, ne os lee re diiz kuu mbin goo ner myaane leen leettsoo goo, no goo thibka nak goo kon Xgann Diox ne kon Diox.

²⁵Ne neʼa Jesucrist taa Jesucrist yalnaban kuu thitanax loʼaa.

²⁶Ngekeen re koree lo goo, tak nzo zha kuu nlaaz kedi goo.

²⁷Per leeʼaa napaa Mbi Nayon kuu mndaa Jesucrist loʼaa, ne ndechet raa goo naa cho loo lo goo, tak Mbi Nayon nak kuu nloo reta kwaa lo goo, ne lee kuu nloo Mbi Nayon nak kuu wli, nagte kuu wlit. Thibka gok goo kon Jesucrist, taxal nloo Mbi Nayon lo goo.

²⁸Nin lo re goo kuu nak taxal zhiinn na, thibka gok goo kon Jesucrist, tsa leettsa yaad Jesucrist, kon dib ndroo leettsooʼaa bigaa lo zha ne neeka thoytaa lo zha.

²⁹Ne neʼa goo lee Jesucrist nali nak, kona noga ndoblo ne goo lee re zha kuu nali nak zha lo re kuu ntsow zha, zhiinn Diox nak re zhaʼa.