Read Ozolotepec Zapotec Apocalipsis 11 Bible Online

Apocalipsis 11 - Ozolotepec Zapotec bible

Apocalipsis 11

¹Tsa mndaa zha thib yi lon kuu nak taxal thib metr kuu nchiix men, ne ne zha lon: ―Gwateli, ne bchiix gwodoo chaan Diox, ne bkoog ne btsow kwent naa plal re zha kuu nzhool lo Diox tya.

²Per chiixta lee gwodoo, tak leey mkayaaʼa re zha kuu nagt zha Israel, ne chalni re zha yez nayon chop gal bchop mbee.

³Ne lee na taalʼn chop zha da, kuu taa kwent kuu gapʼn lo zha, ne thib mil chop gayoo tson gal wiz taa zha kwent, ne gok zha lar kuu nambaat nak.

⁴Rop zhaʼa nak rop ya olib ne rop kandeler kuu ndo lo Zha Nabee lo yezlyu.

⁵Ne os cho nlaaz tsow kuu went lo rop zha, tsa lee rop zha koo bel roo, kuu thitanax tey re zha kuu nayii ne zha, ne tbaaka gath reta zha kuu nlaaz tsow kuu went lo rop zha.

⁶Rop zhaʼa nap yalnabee tow lobee, tsa lat yi dita thib tyemp kuu taa zha kwent chaan Diox; ne noga nap zha yalnabee, tsa tsow zha lee nit reyal ren, ne tsow zha rid yezlyu ree yalti kon relota kuu went, loka plal welt nlaaz zha.

⁷Ne leettsa yelo taa zha kwent, lee thib maa kuu kwathoz nathoz na roo leen yeerdoo, yo kon rop zhaʼa, ne tsow maa gan lo rop zha ne kuth maa rop zha.

⁸Ne lee kwerp rop zhaʼa gax ndrol yez, leeka leen yez ta mbeth re men Zha Nabee, ne diiz nanzee lee le yeza nak Sodoma ne Egipto.

⁹Ne tson wiz narol, lee re men reta yez, re men reta raz, ne re men kuu ndediz zhaapaa zhaapaa diiz lo dib naxta lo yezlyu, wii lo kwerp rop zhaʼa ne taat zha diiz gaats rop zhaʼa.

¹⁰Ne lee re zha kuu naban lo yezlyu ree, laz zha wii zha lo rop profeta, ne asta talaaz zha re kwaa lo altaa zha; tak kwathoz yalti mriid re zha lo rop profeta.

¹¹Per leettsa mriid tson wiz narol, lee Diox mteroban rop zha ne ngwateli zha tedib welt, ne reta men kuu mwii lo rop zha, kwathoz mzeb zha.

¹²Tsa lee rop zha mbin thib bos nex kuu mroo yibaa kuu nzhab lo rop zha: ―¡Kendab goo nzhee! Tsa mkendab rop zha ndya zha yibaa leen thib xkow, ne reta zha kuu nayii ne zha mwii lo zha.

¹³Ne leeka ora mwin thib zho thoz, ne thib part lo tsii part yeza mla yiyoo ne gaz mil men nguth lo zhoʼa. Ne lee re zha kuu nabanka kwathoz mzeb zha ne mbil zha lo Diox kuu ndob yibaa.

¹⁴Nguloʼa mriid re yalti ree; per ndyaada tedibe. Trompet gaz

¹⁵Tsa lee mandad gaz mteez trompet chaan, ne mbin na tyen bos kuu kwathoz nex kuu mroo yibaa, kuu nzhab:Lee yalnabee chaan yezlyu ree,nal leey nak chaan Diox, Zha Nabee lo reʼaa,ne chaan Jesucrist, Kuu Mtaal Diox Nabee,ne lee zha nabeey thitanax.

¹⁶Tsa lee re galbthap zha gol kuu ndob delant lo Diox, mkiits zha yek zha lo yu ne mbil zha lo Diox,

¹⁷ne nzhab zha:Ndaa nee texkix loʼa Diox, Zha Nabee,tak lu nzhaak ntsow reta kwaa,lu nak, lu ngok ne lu bre yaad,tak mkayaaʼa lu yalney chaana,ne mndeloʼa lu nabeeʼa lo yezlyu ree kon yalney chaana.

¹⁸Kwathoz nayii re men re yez kuu nzi lo yezlyu,per mzina wiz kuu leeʼa teti re men,leettsa naaba kwent lo re zha nguth.Ne taaʼa lo re mosa kuu ndoblo zha kayaa zha,lo re profet, lo re zha kuu nyelaaz lu ne lo re zha kuu nambi ndo loʼa,ne noga lo re zha kuu nzhon diiz loʼa,tegal zha nataake o zha nataagte,ne luuzha re zha kuu nluux yezlyu.

¹⁹Tsa mzhaal pwert gwodoo chaan Diox kuu ndob yibaa, ne lee leen gwodoo mloo kaj kuu nzo xkiiz Diox. Ne mla bel bti, mke bi thoz, ngots ngundii, mwin zho thoz ne mla kwathoz yike.