Read Ozolotepec Zapotec Apocalipsis 21 Bible Online

Apocalipsis 21 - Ozolotepec Zapotec bible

Apocalipsis 21

¹Tsaraa mwiin thib yibaa kub ne thib yezlyu kub, tak lee yibaa ne yezlyu kuu ner mnith ne noga nitdoo mnithlo.

²Ne lee na Juan, mwiin yez nayon kuu naro, kuu nak Jerusalén kub, kuu ndyaadla lobee mroo lo Diox. Kuu chul na taxal thib nzaa yeen kuu nok xab par tseya.

³Ne mbin na thib bos kuu nex kuu mroo ta ndob Diox ne nzhab: ―Tree nak ta nzo Diox kon re men. Yo Diox kon re men, ne re men gak yez chaan Diox, ne leeka Diox gak Diox re men.

⁴Lee Diox tsow gonnt raa re zha, ne yot raa yalguth, neeka kotset raa zha, neeka yot raa nabil, neeka yalne, tak reta kuu ngoo ner mriida.

⁵Tsa ndob Diox ta nabee Diox, ne nzhab Diox: ―Lee na ntsow kubʼn reta kwaa. Noga ne Diox: ―Bkee reta diiz ree, tak retay wlipaa naka ne ndoblo yelaaz re mene.

⁶Tsaraa ne Diox lon: ―Retay ngwaloʼa ngok. Na nak zha ner ne zha bluz, na nak taxal letr kuu ner ne kuu bluz. Loka cho nzheek leettsoo, tbaata tan nit kuu nak chaan yalnaban gu zha.

⁷Ne loka zha kuu tsow gan lo re kuu went, kayaa re koree, na gak Diox zha ne lee zha gak zhiinn na.

⁸Per lee re zha kuu neyt leettsoo, re zha kuu nyelaazt Diox, re zha kuu nzo zhyan leettsoo, re zha kuu nzhuth men, re zha kuu nzhak rop kon tyen zha, re zha kuu nak wez, re zha kuu nyelaaz re diox kuu nagt Diox, ne re zha kuu nkedi. Reta zhaʼa ndya leen yaal bel kuu nzheek kon azufre, ne koree nak yalguth mrop. Jerusalén kub

⁹Tsa myaad thib re gaz mandad, kuu nden thib re gaz kop kuu tseta nzo re gaz yalti kuu rid bluz, ne ne mandad lon: ―De nzhee, tsa lon nzaa yeen kuu tseya loʼa, kuu nak tsaal Mbak zhiil Diox.

¹⁰Ne lee Mbi Nayon mndenon, asta yek thib yii kuu kwathoz naro, ne mlooy yez nayon kuu naro lon, kuu nak Jerusalén kuu mroo lo Diox ndyaadla lobee.

¹¹Ne kon xni Diox nteni Diox yez naroʼa, ne nzhuyy nay taxal thib ke kuu kwathoz chul na, taxal thib ke kuu le jaspe, kuu nke xni taxal bidr.

¹²Ne re ladta yeza nke bla kuu nabii ne ya ndab, ne nape tsiibchop pwert, ne thibga mandad ndo roo kadta pwert; ne lee yek kadta pwert nke le thibga re tsiibchop raz zha Israel.

¹³Tson pwert ndob lad ta ntsetab wiz, tetsone lad ta mbix wiz, tetsone lad norte ne tetsone lad sur.

¹⁴Ne lee bla kuu nke re ladta yez, nap tsiibchop ke simyent, ne dits kadta thib ke nke, thibga le re tsiibchop apóstl chaan Mbak zhiil Diox.

¹⁵Ne lee mandad kuu mni lon nden thib bar or, par chiix mandad yeza, re pwert ne bla chaan yeza.

¹⁶Ne kwadrad nak yez, yewal nole ne nazhene. Tsa lee mandad mchiix yez kon bara, ne teeka chop mil kon chop gayoo kilometro nole, ne tataga ya ndabe ne nazhene.

¹⁷Tsaraa mchiix mandad bla, ne thib gayoo chop galbthap tsidth yaa mbyi nay ne medida mlortsin mandad.

¹⁸Lee bla natexkwaa kon ke kuu le jaspe, ne lee yez natexkwaa kon or, kuu na taxal bidr kuu nambi.

¹⁹Lee simyent bla natexkwaa kon relota ke kuu kwathoz nataak ne kuu chuldoo na:lee ke ner chaan simyent nak ke jaspe,lee ke chop le safiro,lee ke tson le ágata,lee ke thap le esmeralda,

²⁰lee ke gaay le ónice,lee ke xoop le kornalina,lee ke gaz le krisólito,lee ke xon le berilo,lee ke yee le topasio,lee ke tsii le krisopraso,lee ke tsiibthib le jacinto,lee ke tsiibchop le amatista.

²¹Ne lee re tsiibchop pwert natexkwaa kon tsiibchop ke, kadta thib pwert natexkwaa kon thib thib ke kuu le perla. Ne lee kay yez natexkwaa kon or, taxal bidr kuu nderid xni.

²²Mwiitʼn neeka thib gwodoo leen yez, tak lee Diox kuu nak Zha Nabee kuu kwathoz ney ne Mbak zhiil nak gwodoo tya.

²³Lee yeza ndechet raay xni wiz, neeka xni mbee kuu teniy, tak lee xni chaan Diox nteniy, ne Mbak zhiil nak xni chaane.

²⁴Ne lee re men kuu mlaa tiy lo xni yeza, ne lee re zha kuu nak rey yaadno re chaan kuu nataak lo yeza.

²⁵Lee re pwert yeza yowte tse, tak tya yot yaal.

²⁶Ne lee yeza kayaa reta yalnaro ne yalnataak chaan re yez kuu nzi lo yezlyu.

²⁷Neeka thib kuu yu tabt tya, ne neeka thib re zha kuu ntsow kuu nakap, ne neeka thib zha kuu nkedi; beeta re zha kuu nke le lo libr kuu nak chaan yalnaban chaan Mbak zhiil tab tya.