Read ახალი აღთქმა წიგნი მათესი 10 Bible Online

წიგნი მათესი 10 - ახალი აღთქმა bible

წიგნი მათესი 10

¹და მოუწოდა თავის თორმეტ მოწაფეს და მისცა მათ ხელმწიფება არაწმინდა სულებზე, რათა განედევნათ ისინი და განეკურნათ ყველა სენი და ყველა უძლურება.

²ხოლო თორმეტი მოციქულის სახელები არის: პირველი — სიმონი, რომელსაც ეწოდა პეტრე, და ანდრია, ძმა მისი; იაკობ ზებედესი და იოანე, ძმა მისი;

³ფილიპე და ბართლომე, თომა და მათე მეზვერე, იაკობ ალფესი და ლებეოსი, რომელსაც ეწოდა თადეოზი.

⁴სიმონ კანანელი და იუდა ისკარიოტელი, რომელმაც გასცა იგი.

⁵ეს თორმეტი გაგზავნა იესომ და ამცნო მათ და უთხრა: წარმართთა გზით ნუ წახვალთ და სამარიელთა ქალაქში ნუ შეხვალთ,

⁶არამედ მიდით უპირატესად ისრაელის სახლის წარწყმედილ ცხვრებთან;

⁷ხოლო როცა მიხვალთ, უქადაგეთ და უთხარით, რომ მოახლოებულია სასუფეველი ცათა.

⁸უძლურნი განკურნეთ, მკვდრები აღადგინეთ, კეთროვნები განწმინდეთ, ეშმაკები განდევნეთ; უსასყიდლოდ მიგიღიათ, უსასყიდლოდ გაეცით.

⁹ნუ გექნებათ ოქრო, ნურც ვერცხლი, ნურც რვალი თქვენს სარტყლებში,

¹⁰ნურც აბგა გზაში, ნურც ორი პერანგი, ნურც ხამლი, ნურც კვერთხი, რადგან ღირსია მუშაკი თავისი საზრდოსი.

¹¹რომელ ქალაქშიც და დაბაშიც შეხვალთ, გამოიკითხეთ, ვინ არის მასში ღირსი, და იქ გაჩერდით, სანამ გამოხვალთ;

¹²ხოლო, როცა შეხვალთ სახლში, მოიკითხეთ იგი და თქვით: მშვიდობა ამ სახლს.

¹³და თუ იქნება ის სახლი ღირსი, მივა თქვენი მშვიდობა მასზე, ხოლო თუ არ იქნება ღირსი, თქვენი მშვიდობა თქვენვე მოგიბრუნდებათ.

¹⁴და თუ არავინ მიგიღებთ თქვენ და არც ისმენს თქვენს სიტყვას, როცა გამოხვალთ იმ სახლიდან ან ქალაქიდან, დაიბერტყეთ მტვერი თქვენი ფეხებიდან.

¹⁵ამინ გეუბნებით თქვენ, უფრო ასატანი იქნება სოდომისა და გომორის ქვეყნისთვის განკითხვის დღე, ვიდრე იმ ქალაქისთვის.

¹⁶აჰა, მე გგზავნით თქვენ, როგორც ცხვრებს, მგლებს შორის; ამიტომ იყავით გონიერნი, როგორც გველნი, და უმანკონი, როგორც მტრედნი.

¹⁷უფრთხილდით ადამიანებს, რადგან გადაგცემენ თქვენ საკრებულოს და თავის შესაკრებლებში დაგტანჯავენ თქვენ;

¹⁸და მთავართა და მეფეთა წინაშე მიგიყვანენ ჩემ გამო მათთვის და წარმართთათვის დასამოწმებლად.

¹⁹და როცა გადაგცემენ თქვენ, ნუ იზრუნებთ, როგორ ან რა თქვათ, რადგან მოგეცემათ თქვენ იმ დროს, რა თქვათ;

²⁰რადგან არა თქვენ იქნებით მეტყველნი, არამედ სული თქვენი მამისა, რომელიც იმეტყველებს თქვენში;

²¹რადგან გადასცემს ძმა ძმას სასიკვდილოდ და მამა შვილს; და აღდგებიან შვილები მშობლებზე და დახოცავენ მათ.

²²და იქნებით მოძულებული ყველასგან ჩემი სახელის გამო, ხოლო ვინც მოითმენს ბოლომდე, ის ცხონდება.

²³როცა დევნას დაგიწყებენ თქვენ ამ ქალაქში, გაიქეცით სხვაში, რადგან, ამინ გეუბნებით თქვენ, ვერ დაასრულებთ ისრაელის ქალაქებს, ვიდრე არ მოვა ძე კაცისა.

²⁴არ არის მოწაფე თავის მოძღვარზე აღმატებული, არც მონა თავის ბატონზე აღმატებული.

²⁵საკმარისია მოწაფისთვის, რათა იყოს, როგორიც თავისი მოძღვარი, და მონისთვის — როგორიც თავისი ბატონი. თუ სახლის პატრონს ბელზებული უწოდეს, რამდენად უფრო — მის სახლეულს?

²⁶ნუ გეშინიათ მათი, რადგან არაფერია დაფარული, რაც არ გაცხადდება, და არც საიდუმლო, რომელიც ცნობილი არ გახდება.

²⁷რასაც გეუბნებით თქვენ ბნელში, თქვით ნათელში და, რასაც ყურით ისმენთ, იქადაგეთ ერდოებზე.

²⁸და ნუ გეშინიათ მათი, ვინც კლავს სხეულს, ხოლო სულის მოკვლა არ შეუძლია; არამედ გეშინოდეთ უფრო იმისი, ვისაც შეუძლია, სულიც და სხეულიც წარწყმიდოს გეენაში.

²⁹განა ორი ჩიტი ასარად არ იყიდება? და ერთი მათგანიც არ დავარდება მიწაზე თქვენი მამის გარეშე;

³⁰ხოლო თქვენს თავზე ყოველი თმაც კი დათვლილია.

³¹ნუ გეშინიათ, რადგან ბევრ ჩიტზე უმჯობესნი ხართ თქვენ.

³²ყველას, ვინც მაღიარებს მე კაცთა წინაშე, მეც ვაღიარებ მას ჩემი ზეცათა მამის წინაშე;

³³ხოლო ვინც უარმყოფს მე კაცთა წინაშე, მეც უარვყოფ მას ჩემი ზეცათა მამის წინაშე.

³⁴ნუ გგონიათ, რომ მოვედი მშვიდობის მოსაფენად ქვეყანაზე. მოვედი არა მშვიდობის მოსაფენად, არამედ მახვილისა,

³⁵რადგან მოვედი გასაყოფად კაცისა თავისი მამისგან და ასულისა თავისი დედისგან და რძლისა თავისი დედამთილისგან.

³⁶და მტერი კაცისა იქნება მისი სახლეული.

³⁷ვისაც უყვარს მამა ან დედა ჩემზე მეტად, არ არის ჩემი ღირსი; და ვისაც უყვარს ძე ან ასული ჩემზე მეტად, არ არის ჩემი ღირსი.

³⁸და ვინც არ აიღებს თავის ჯვარს და შემომიდგება მე, არ არის ჩემი ღირსი.

³⁹ვინც მოიპოვებს თავის სულს, წარწყმედს მას; და ვინც წარწყმედს თავის სულს ჩემ გამო, მოიპოვებს მას.

⁴⁰ვინც გიწყნარებთ თქვენ, მე მიწყნარებს; და ვინც მე მიწყნარებს, იწყნარებს ჩემს მომავლინებელს.

⁴¹ვინც იწყნარებს წინასწარმეტყველს წინასწარმეტყველის სახელით, წინასწარმეტყველის საზღაურს მიიღებს; და ვინც იწყნარებს მართალს მართლის სახელით, მართლის საზღაურს მიიღებს.

⁴²და ვინც დაალევინებს ერთ ამ მცირეთაგანს ერთ სასმის ცივ წყალს მოწაფის სახელით, ამინ გეუბნებით თქვენ, არ დაეკარგება თავისი საზღაური.