Read ახალი აღთქმა წიგნი მათესი 11 Bible Online

წიგნი მათესი 11 - ახალი აღთქმა bible

წიგნი მათესი 11

¹და იყო, როცა დაასრულა იესომ დარიგება თავისი თორმეტი მოწაფისა, წავიდა იქიდან დასამოძღვრად და საქადაგებლად მათ ქალაქებში.

²ხოლო როცა იოანემ გაიგო საპყრობილეში ქრისტეს საქმეები, გაგზავნა თავისი ორი მოწაფე

³და უთხრა მას: შენ ხარ, ვინც უნდა მოვიდეს, თუ სხვას ველოდოთ?

⁴ხოლო იესომ მიუგო და უთხრა მათ: მიდით და აუწყეთ იოანეს, რაც გესმით და რასაც ხედავთ:

⁵ბრმები ხედავენ, ხეიბრები დადიან, კეთროვნები იწმინდებიან და ყრუებს ესმით, მკვდრები აღდგებიან და გლახაკებს ეხარებათ;

⁶და ნეტარია, ვინც არ დაბრკოლდება ჩემ მომართ.

⁷და როდესაც ისინი წავიდნენ, დაიწყო იესომ საუბარი ხალხთან იოანეზე: რის სანახავად გამოხვედით უდაბნოში? ლერწმისა, ქარისგან შერხეულისა?

⁸ან რის სანახავად გამოხვედით? კაცისა, ფაფუკი სამოსით შემოსილისა? აჰა, რომლებიც ფაფუკ სამოსს ატარებენ, სამეფო სახლებში არიან.

⁹ან რის სანახავად გამოხვედით, წინასწარმეტყველისა? ჰო, გეუბნებით თქვენ: და წინასწარმეტყველზე უმეტესისა;

¹⁰რადგან ეს არის, რომლის შესახებ წერია: აჰა, მე მივავლენ ჩემს ანგელოზს შენი პირის წინაშე, რომელიც გაამზადებს შენს გზას შენ წინაშე (გამ.23,20; მალ.3,1).

¹¹ამინ გეუბნებით თქვენ: არ აღმდგარა დედაკაცის ნაშობთა შორის იოანე ნათლისმცემელზე დიდი, ხოლო უმცირესი ცათა სასუფეველში დიდია მასზე.

¹²და იოანე ნათლისმცემლის დღეებიდან აქამდე ცათა სასუფეველი იძულებით მიიღწევა და ვინც აიძულებს თავს, მიიტაცებს მას,

¹³რადგან ყველა წინასწარმეტყველმა და სჯულმა იოანემდე იწინასწარმეტყველეს;

¹⁴და თუ გინდათ მიღება, იგი არის ელია, რომელიც უნდა მოვიდეს.

¹⁵ვისაც აქვს ყურები სასმენად, ისმინოს!

¹⁶და ვის ვამსგავსო ეს მოდგმა? მსგავსია ყრმებისა, რომლებიც სხედან მოედნებზე და უხმობენ თავის მეგობრებს

¹⁷და ეუბნებიან: ვუკრავდით თქვენთვის და არ ცეკვავდით; ვგოდებდით თქვენთვის და არა გლოვობდით.

¹⁸რადგან მოვიდა იოანე, არც ჭამს, არც სვამს და ამბობენ: ეშმაკეულია;

¹⁹მოვიდა ძე კაცისა, ჭამს და სვამს და ამბობენ: აჰა, კაცი მჭამელი და ღვინის მსმელი, მეგობარი მეზვერეთა და ცოდვილთა. და გამართლდა სიბრძნე თავის შვილთაგან.

²⁰მაშინ დაიწყო იესომ გაკიცხვა იმ ქალაქებისა, რომლებშიც ყველაზე მეტად გამოვლინდა მისი ძალები, რადგან არ შეინანეს:

²¹ვაი შენ, ქორაზინო, და ვაი შენ, ბეთსაიდა, რადგან ტვიროსსა და სიდონში რომ გამოვლენილიყო ძალები, რომლებიც გამოვლინდა თქვენში, დიდი ხანია, ძაძაში და ნაცარში მსხდომარენი შეინანებდნენ;

²²მაგრამ გეუბნებით თქვენ: ტვიროსისა და სიდონისთვის უფრო ასატანი იქნება განკითხვის დღე, ვიდრე თქვენთვის;

²³ხოლო შენ, კაპერნაუმო, ცამდე არ ამაღლდები, არამედ ჯოჯოხეთამდე ჩაინთქმები, რადგან სოდომში რომ გამოვლენილიყო ძალები, რომლებიც გამოვლინდა შენში, დღემდე იდგებოდა;

²⁴მაგრამ გეუბნებით თქვენ, რომ სოდომის ქვეყნისთვის უფრო ასატანი იქნება განკითხვის დღე, ვიდრე შენთვის.

²⁵იმ დროს ამბობდა იესო და თქვა: გაღიარებ შენ, მამაო, უფალო ცისა და ქვეყნისაო, რადგან დაფარე ეს ბრძენთაგან და გონიერთაგან და გამოუცხადე ეს ჩვილებს.

²⁶ჰო, მამაო, რადგან ასე იყო სათნო შენ წინაშე.

²⁷ყოველივე მომეცა მე ჩემი მამის მიერ. და არავინ იცის ძე, გარდა მამისა; და არც მამა იცის ვინმემ, გარდა ძისა და იმისა, ვისთვისაც ინებებს ძე გამოცხადებას.

²⁸მოდით ჩემთან ყველა მაშვრალი და ტვირთმძიმე და მე მოგასვენებთ თქვენ.

²⁹აიღეთ უღელი ჩემი თქვენზე და ისწავლეთ ჩემგან, რადგან მშვიდი ვარ და მდაბალი გულით, და ჰპოვებთ თქვენი სულების მოსვენებას,

³⁰რადგან უღელი ჩემი ტკბილია და ტვირთი ჩემი — მსუბუქი.